Read Khoekhoegowab 1 Samueli 6 Bible Online

1 Samueli 6 - Khoekhoegowab bible

1 Samueli 6

¹Tsî ǃKhūb di ǂgaes ge hû ǁkhâgu kōse Filisteǁîn di ǃhūb ǃnâ hâ io,

²on ge Filisteǁîna pristergu tsî aimûǀgaru-aogu tsîga ǂgai tsî ge mî: Tare-e da kha nî dī ǃKhūb di ǂgaes ǀkha? ǂAnǂan da re, mati da nî ǁîsa ǃkhais âs ai sîsīsa.

³O gu ge ge mî: Israeli Elob di ǂgaesa du ga sîbēo, tā ǁîsa ǀkhaiǃnâse sîbē, î du ǁîsa ǀhapiǁguiba-e ǁguiba; o du ge ǂuru tsî nî ǂan, tare xū-i ǃaromab ǃommi âba sado xu bē tama ǃkhaisa.

⁴On ge ge mî: Mâsa ǁnā ǀhapiǁguibas hîa da nî ǁguibasa? O gu ge ge mî: Koro ǃhuniǀuritsuigu tsî koro ǃhuniǀuridurugu, Filisteǁîn gaosagu di ǀgaus ǃoa; ǀgui ǁō-aib ǀguib ge a ǁî xui-ao sadu ǂama tsî sadu di gaosagu ǂama.

⁵Î du dī sadu tsuigu di īga, tsî sadu durugu īga, î du Israeli Eloba ǃgôaba mā; ǀnîsib ge ǃommi âba sado xu tsî sadu eloga xu tsî sadu ǃhūba xu nî supu.

⁶Tarexa du kha ǂgaob âdo nî karokaro, Egipteǁîn tsî Faraob tsîn ge ǂgaob âna karokaro khami? Ī tama i ge i, ǁîb ge ǀgaisase ǁîna sîsenū ǃnubain ge ǁîna doe kai on ge ǃgûsa?

⁷Î du ǁnâi ǀasa kuni-e ū tsî dī tsî ǀgam ǁoragomara, ǃnao-i tātsē ǁîra ai hā tama ge hâ ira; î du gomara kunis ǃnâ ǂgāǃao, î du tsâun âra ǁîra khaoǃgâba xu ūǁaru.

⁸Î du ǃKhūb di ǂgaesa ū î du ǁîsa kunis ai mâi î du ǁnā ǃhuniǀuri ǃgomǀgausa xūn hîa du nî ǀhapiǁguibase ǁguibana ǂgaero-i ǃnâ ǁîs xōǀkhā mâi, î du ǁîsa sîbē, îs ǃgû!

⁹Î du kōǃgâ, ǁîs di ǃhūb di ǀkhariba-ūs ga Bet-Semes ǃoa ǃapao, ob ge ǁîba nē kai ǂkhababa ge dī-ū da; xawe ti i ga ī tama io, o du ge nî ǂan, ǁîb di ǃom tamab a ǃkhaisa, sada ge ǂnauba; o i ge ǁause ge hāǂam da.

¹⁰On ge khoena ǁnāti ge dī, ǀgam ǁoragomara ū tsîn ge ǁîra kunis ǃnâ ǂgāǃao, tsî tsâun âra oms tawa ge ǂganam.

¹¹Tsîn ge ǃKhūb di ǂgaesa kunis ai ge mâi tsî ǂgaerosa ǃhuniǀuridurugu tsî ǁîn tsuigu di īgu ǀkha.

¹²Tsî gomara ge ǂhanuse ǁnā daob ai ge ǃgû, Bet-Semes ǃoa gau daob ǀguib ai, tsî ra ge ǃaruǀîǀgui ā rase ge ǃgû tsî ǂgō tama, amǀkhāb ais kas, ǁareǀkhāb ais kas hoasa, tsî Filisteǁîn di gaosagu ge ǁîra ge ǃgôaǃgon, Bet-Semes di ǀkharib kōse.

¹³Tsî Bet-Semes din ge ǃhoroba gere ǃgao, ǃgoaǃnāb ǃnâ, tsî ǃgapakhâin geo, on ge ǂgaesa ge mû, tsîn ge ge ǃgâiaǂgao ǁîsan ge mûo.

¹⁴Tsî kunis ge Josuab, Bet-Semeǁîb di ǃhanab ai ge hā mâ; tsî ǁnāpas ge kai ǀuisa ge hâ i; on ge kunis di haina ǁhā tsî gomara khauǁguibase ǃKhūba ge ǁguiba.

¹⁵Tsî Leviǁîgu ge ǃKhūb di ǂgaesa ūǁnâ tsî ǂgaeros, ǁîs tawa hâs, ǃhuniǀuriǃgomǀgausa xūn ǁîs ǃnâ hâsa tsî ǁnā kai ǀuis ai ge mâi; tsî Bet-Semes khoen ge khauǁguibade ge ǁguiba tsî ǂāǁguibade ǃKhūba ge ǂāba, ǁnā tsēs ǁkhās ai.

¹⁶Tsî koro gaosagu Filisteǁîn digu ge mûo, o gu ge ǁnā tsēs ǁkhās ai Ekrons ǃoa ge oa.

¹⁷Tsî nēgu ge ǃhuniǀuritsuigu, Filisteǁîn ge ǃKhūba ǀhapiǁguibase ǁguibaga: Asdods ǃaroma ǀguib, Gasas ǃaroma ǀguib, Askelons ǃaroma ǀguib, Gats ǃaroma ǀguib, Ekrons ǃaroma ǀguiba;

¹⁸tsî ǃhuniǀuridurugu, ǃādi Filisteǁîn didi hoadi, ǁnā koro gaosagu ǃnaga mâdi di ǀgaus ī khami, ǁaposa ǃāde xu ǃhūb di ǃhaidi kōse; tsî Abels kōse, ǁnā kai ǀuis, ǁîs ain ge ǃKhūb di ǂgaesa mâisa, nētsēs kōse Josuab, Bet-Semeǁîb di ǃhanab ai hâsa.

¹⁹Tsî ǃKhūb ge Bet-Semes di khoen ǃnâ ge ǂnau, ǃKhūb di ǂgaesan ge ǂuiǃnâ xui-ao, ā ǁîb ge ǁaes xa hûdisi aoga ge ǂnau tsî korodisiǀoadisi aoga. ǃNubais ge ǁaesa ge ǃoa, ǃKhūb ge ǁaes ǃnâ kai ǂnau-e ǂnau xui-ao.

²⁰ǃNubain ge Bet-Semes di khoena ge mî: Tari-e nî mâ ǁkhā, ǃKhūb, nē ǃanu Elob di ais aiǃâ? Tsî tari-i ǃoab nî sida xu doeǃapa?

²¹On ge sîsabega ge sî Kirjat-Jearims di ǁansaben ǃoa mî raǃâ: Filisteǁîn ge ǃKhūb di ǂgaesa ǁkhawa go ūhā; ǁgôaxa, î du ǁîsa sadu ǃoa ūǃapa.