Read Khoekhoegowab 1 Samueli 7 Bible Online

1 Samueli 7 - Khoekhoegowab bible

1 Samueli 7

¹ǃNubai gu ge Kirjat-Jearims diga hā tsî ǃKhūb di ǂgaesa ge ūǃapa, tsî gu ge ǁîsa Abinadab di oms, ǃnoms ai mâs ǃnâ ge ūǂgā; tsî gu ge ǁîb di ôab Eleasara ge khai, ǃKhūb di ǂgaesab nî sâuga.

²Tsî i ge ge ī, ǃKhūb di ǂgaes ge Kirjat-Jearims tawa hâ tsēsa xu di ge tsēde ge ǂguiǂguisen tsî ge ǀgamdisi kurigu kō ǃkhaisa; tsî Israeli hoab ge ǃKhūba ge ǃgaeǃgon.

³ǃNubaib ge Samuela Israeli di ommi hoab ǃoa ǃhoa tsî ge mî: Sadu ga ǂgaob hoab ǀkha ǃKhūb ǃoa ǃhobaseno, ǁnâi ǃhao eloga sadu ǁaeguba xu dībē, Astaroti ona î du sadu di ǂgaoba ǃKhūb ǃoa unu, î du ǁîb ǀguiba ǃoaba, ob ge Filisteǁîn di ǃomǁaeba xu nîra tsubuǂui du.

⁴On ge Israeli ôana Baalgu tsî Astaroti tsîna dībē tsî ǃKhūb ǀguiba gere ǃoaba.

⁵ǃAruǀîb ge Samuela ge mî: Israeli hoaba ǀhaoǀhao Mispas tawa, o ta ge tita sado ǃKhūb ǃoa nî ǀgoreba.

⁶On ge Mispas tawa ge ǀhû; tsî ǁgam-e xuri tsîn ge ǁî-e ǃKhūb aiǃâ ge ǂnâǂui; tsî ǁnātsē ǂûtama hâ tsîn ge ǁnāpa ge mî: Sida ge ǃKhūb ǃoagu gere ǁore. Nētib ge Samuela Israeli ôana ge ǂhanuǂhanu, Mispas tawa.

⁷Tsî Filisteǁîn ge ǁnâuo, Israeli ôan Mispas tawa ǀhû hâ ǃkhaisa, o gu ge Filisteǁîn di ǂamsaga Israeli ǃoagu ge ǃapahā. Tsî Israeli ôan ge ǁnâuo, on ge Filisteǁîn di ais aiǃâ ge ǃao.

⁸On ge Israeli ôana Samueli ǃoa ge mî: Tā ǀûxū da, ǃKhūb sida di Elob ǃoa ǂgaisa, îb ǁîba ore da Filisteǁîn di ǃomǁaeba xu, ti.

⁹ǃNubaib ge Samuela dai ra ǁkhaoba ū tsî ǀoasase ǁîba ǃKhūba khauǁguibase ge ǁguiba; tsî Samueli ge Israeli ǃaroma ǃKhūb ǃoa ge ǂgai, tsî ǃKhūb ge ǁîba ge ǁnâu-am.

¹⁰Tsî i ge ge ī, khauǁguibasab ra ǁguiba hîa gu ge Filisteǁîga ge hā, Israeli ǀkha gu nî ǃkhamga; ob ge ǃKhūba ǁnātsē kai ǃgurub ǀkha Filisteǁîgu ǂama ge ǃguru, tsîb ge ǁîga ge ǃhuriǃhuri, Israeli di ais aiǃâ gu ge ǂnauhes kōse.

¹¹O gu ge Israeli aoga Mispasa xu ǂoa tsî Filisteǁîga ge ǃgôaǃgon, tsî gu ge ǁîga ge ǂnau, Bet-Kars ǃnagas kōse.

¹²Ob ge Samuela ǀuisa ū tsî ǁîsa ge ǂnûikhâi Mispas tsî Sens tsîra ǁaegu, tsîb ge ǁîsa Eben-Eser ti ge ǂgai: Nēs kōseb ge ǃKhūba go hui da, tib ra mî xui-ao.

¹³Nētin ge Filisteǁîna ge ǃgamǃgamhe, tsîn ge ǃaruǀî Israeli di ǀkharib ǃnâ hâ tama ge hâ i; ǃKhūb di ǃommi ge Filisteǁîn ǃoagu hâ i xui-ao, Samueli di tsēdi hoade.

¹⁴Tsî ǁnā ǃādi, Filisteǁîn ge Israela xu ūdi ge ǁkhawa ge Israeli di kai, Ekronsa xu Gats kōse; ǁkhātib ge Israela ǁîdi di ǀkhariba Filisteǁîn di ǃomǁaeba xu ge tsubuǂui, tsîb ge ǂkhîba ge hâ i, Israeli tsî Amorǁîn tsîn ǁaegu.

¹⁵Tsî Samueli ge Israela ǁîb di ûitsēdi hoadi kōse gere ǂhanuǂhanu.

¹⁶Tsîb ge kuriba xu kurib ǃoa gere ǃgû Bet-Els, Gilgals tsî Mispas ǃoa, tsîb ge nē ǃādi hoadi ǃnâ Israela ge ǂhanuǂhanu.

¹⁷Tsîb ge ǁkhawa Ramas ǃoa ge oa; ǁnāpab ommi âba ge hâ i xui-ao, tsî ǁnāpab ra Israela ǂhanuǂhanu xui-ao, tsîb ge ǁnāpa ǃKhūba altarsa ge ǂnubiba.