Read Khoekhoegowab 1 Samueli 8 Bible Online

1 Samueli 8 - Khoekhoegowab bible

1 Samueli 8

¹Tsî i ge ge ī, Samueli ge kaira ǃnubaib ge ǁîb di ôakha ǂhanuǂhanu-aose ge mâi Israels ǂama.

²Tsî ǂguroǃnaesabeb âb ge Joel ti ge ǂgaihe, tsî ǀgamǁîb ge Abia ti ge ǀon hâ i; ǁîkha ge ǂhanuǂhanu-ao ge i Bersebas tawa.

³Xawe ǁîb di ôakha ge ǁîb di daogu ǃnâ ǃgû tama ge hâ i, tsî kha ge xūǃgunuxasiba ǂōsenǀî tsî ǀkhaexūna ū tsî ǂhanuba ge gamagama.

⁴O gu ge Israeli di kaigu hoaga ǀhû tsî Samueli ǁga ge hā, Ramas tawa;

⁵tsî gu ge ǁîb ǃoa ge mî: Mû, sats ge go kaira, tsî sa ôakha ge daogu âts ǃnâ ǃgû tama hâ; ǁnâi gao-ao-e sida mâiba, î-i ǂhanuǂhanu da, nau ǁaedi ūhâ khami.

⁶Tsî nē mîs ge Samueli mûǁae ǂkhaba ge i: Gao-aoba mā da îb ǂhanuǂhanu da tin ge mîo. Ob ge Samuela ǃKhūba ge ǀgoreǀî.

⁷Xawe ǃKhūb ge Samueli ǃoa ge mî: ǁNâu ǁaes di domma mîǀî tsin ka xūn hoan ǃnâ; satsan ge ǁîna aoxū tama hâ, tsîn ge tita go aoxū, ǁîn di gao-aose ta tita ī tidega.

⁸ǁNā sîsengu hîan ge dīgu hoagu ǃoa, ǁnā tsēs ǁîna ta ge Egipteba xu ǂgaeǂguiǂuisa xu, nētsēs ǁkhās, ǁîs ain go ǁnāxū te tsî ǀkhara eloga ǃoabas kōse, ǁnās ǃoan ge sats ona go dī.

⁹ǁNâu ǁnâi ǁîn di domma, tsî kaisets ga ǁîna ǃkhō-ambas khaoǃgâts ge ǁîna gao-aob nî ǁîb ai gaosîsen domma nî ǂanǂan.

¹⁰Ob ge Samuela ǃKhūb di mîde ǁaes hîa gao-ao-e ǁîba ra ǂgaoǀkhāsa ge mîba.

¹¹Tsîb ge ge mî: Nēb ge ǁnā gao-aob, sado nî gaoǂammi di domse nî ī. ǁÎb ge sadu di ôaga ū tsî nî ǁîga ǁîb di kunidi ai ǂnûi tsî hāgu âb ai, o gu ge ǁîb di kunis aiǃâ nîra ǃkhoe.

¹²Tsî ǁîgab nî mâibasenga ǀoadisigu di danakhoese, tsî korodisigu di danakhoese; tsî ǃhanab âba gu nî ǃhūǃgaose, tsî ǁîb di ǃhoroba gu nî ǃgaose, tsî toroǀāxūn âba gu nî dīse tsî kunis xūn âb tsîna.

¹³Tsî sadu ôadeb ge nîra ū ǂkhauxūkuru-aose tsî sâi-aose tsî ǁganaose.

¹⁴Tsî sadu ǃhanagu tsî sadu ǂauxûiǂûǃhanagu tsî sadu ǀkherahaiǃhanagu hîa hoagu xa ǃgâiga ū, tsîb ge ǁîb di ǃgāga nîra mā.

¹⁵Tsî sadu ǃkhommi tsî sadu di ǂauxûiǂûǃhanagu xab ge disiǁî ǃâ-e nîra ū, tsîb ge ǁîna ǁîb ommi din tsî ǁîb ǃgāga nîra mā.

¹⁶Tsî sadu ǃgāgu tsî sadu ǃgādi tsî sadu hoan xa ǃgâi ǂkhamkhoegu tsî sadu eselna ū, tsîb ge ǁîn ǀkha ǁîb sîsenna nîra dī.

¹⁷ǁÎb ge sadu gūn xa disiǁî ǃâ-e nîra ū; tsî du ge sado ǁîba ǃgāse nî ība.

¹⁸Tsî du ge ǁnātsē nîra ǂgai sadu gao-aob hîa du ge ǁhûiǂuibasenni xa, xawe ǃKhūb ge ǁnātsē ǁnâu-am du tide.

¹⁹Tsî ǁaes ge Samueli domma ǁnâusa ge ǂkhā, tsîn ge ge mî: Hî-î, xawe gao-ao-i ge sida ǂama nî hâ,

²⁰î da sida ona ī, nau ǁaedi hoadi ī xase, îb sida gao-aoba ǂhanuǂhanu da, îb sida aidi aiǃâ ǂoa, îb sida di toroga dī.

²¹Tsî Samueli ge ǁaes di mîdi hoade ǁnâuo, ob ge ǃKhūb di ǂgaera ǃnâ ǁîde ge ǃhoa.

²²Ob ge ǃKhūba Samueli ǃoa ge mî: ǁNâu ǁîn di domma îts gao-ao-e ǁîna mâiba. ǃNubaib ge Samuela Israeli di aogu ǃoa ge mî: ǃGûsī mâb hoaba ǁîb di ǃās ǃoa.