Read Khoekhoegowab 1 Samueli 9 Bible Online

1 Samueli 9 - Khoekhoegowab bible

1 Samueli 9

¹Tsî i ge Benjaminni ao-e ge hâ i, Kis ti ǀon hâ-e, Abieli ôab, Serori ôab, Bexorati ôab, Afiaxi ôab, Benjaminni ao-i di ôab, ǁē-aoba.

²ǁÎb ge ǀgôaba ge ūhâ i, Saul ti ǀon hâb, ǂkhamkhoeb, îsa ge iba; ā, ǀnîb, ǁîb ǃgâ-ai a îsab ge Israeli ôagu ǃnâ ge ǀkhai i; ǁîb di ǃhōra xu ǀgapisebǀîb ge ǁaes hoas ǂamai gaxu ge i.

³Tsî di ge Kisi, Sauli îb di eseln ge kā hâ i; ob ge Kisa Sauli, ǁîb ôab ǃoa ge mî: ǃGāgu di ǀguiba sa ǀkha ū îts khâi îts eselna sī ôa.

⁴Ob ge Efraimmi di ǃhomma ge ǃgûǃnâǃganu, tsîb ge Salisaǃhūba ge ǃgûǃnâǃganu, xawe kha ge ǁîna hō tama ge i; ǁnās khaoǃgâ kha ge Saalimǃhūba ge ǃgûǃnâǃganu, xawen ge ǀkhai ge i; ǃaruǀîb ge Benjaminni ǃhūba ge ǃgûǃnâǃganu, xawe kha ge ǁîna hō tama ge i.

⁵Tsî Sufǃhūb ǃnâ kha ge sīo, ob ge Saula ǁîb di ǃgāb, hîa ǁîb ǀkha hâb ǃoa ge mî: Hā î khom ǁkhawa oa, îb ti îba tā eseln ǀkha ǀû tsî sakhom xa ǂhansen.

⁶Ob ge ǁîb ǃoa ge mî: Kō, Elob ao-i ge nē ǃās ǃnâ hâ, tsî nē aob ge a ǃgôahesa ao; mîb ra xūn hoan ra amase hā; a khom ǁnâi ǁnāǀî ǃgû, ǀnîsib ge ǁîba sakhom di daob hîa khom nî ǃgûba nî ǁgau khom.

⁷ǃNubaib ge Saula ǃgāb âb ǃoa ge mî: Xawe kō, ǃgû khom kao, tare xū-e khom kha ǁnā aoba nî ūsība? Pereb ge go toa sakhom di ǁhōra xu, tsî khom ge ǀkhaexū-i xare-e ūhâ tama hâ, Elob aoba khom nî ūsība-e; tare xū-e khom ūhâ?

⁸Ob ge ǃgāba Saula ǁkhawa ǃeream tsî ge mî: Mû, ti ǃomǁaes ge hōhesa hakaǁî ǃâs ǀhaiǀurisekels disa; ǁîsa ta ge Elob aoba nî mā, îb sakhom di daoba ǁgau khom.

⁹Aiga i ge mâ-i hoa-e Israeli ǃnâ nēti gere mî, Eloba i nî dîga i gere ǃgû ǃnubai: Hā î da mû-aob ǃoa ǃgû; ǁnāgu, nētsē kēbo-ao ti ra ǂgaihe gu ge aiga mû-aogu ti gere ǂgaihe xui-ao.

¹⁰ǃNubaib ge Saula ǃgāb âb ǃoa ge mî: Sa mîs ge a ǃgâi, xuige a khom ǃgû. O kha ge ǁnā ǃās, Elob aob ǁîs ǃnâ hâs ǃoa ge ǃgû.

¹¹Tsî ǃās ǃoa gau ǁnōba-ū kha ge ǃapao, o kha ge ǀgôade ge hō, ǁgam-e nî xurise ge ǂoade, o kha ge ǁîdi ǃoa: Mû-aoba hâb a nēpa? ti ge dî.

¹²ǃNubai di ge ǃeream kha tsî ge mî: Mû, ǁnā hâ sakho di ais aiǃâ; ǃhae ǁnâi re, nētsēb ge ǃās ǃnâ go hā, ǁaes nētsē ǁguibasa ǀgapib ai ūhâ amaga.

¹³ǃĀs ǃnâ kho ga ǂgâo, o kho ge nî hō bi, ǀgapib ǃoab ǂûb nîse ǃgûǃapa tama hîa; ǁaes ge ǂû tide, sīb nîs kōse xui-ao, ǁîb ǂûb ra ǁguibasa ǀkhae amaga, ǁnās khaoǃgân ra ǁkhausabena ǂû xui-ao; î kho nēsi ǃgûǃapa, nētsēs ǂhanis ai kho ge nî hō bi.

¹⁴Nēti kha ge ǃās ǃoa ge ǃapa. Tsî ǃās ǁaegu kha ge sīo, mû, ob ge Samuela ǁîkha ge ǃoa, ǀgapib ǃoab nî ǃgûǃapase.

¹⁵ǃKhūb ge Samueli di ǂgaesa ǁîsa ge ǂhaiǂhaiba, Sauli ge hā tsēs di ǀgui tsēs aiǃâ, mî rase:

¹⁶ǁAri ǁaupe nē ǁaeb ǁkhāb ai ta ge tita khoeba sa ǃoa nîra sî Benjaminni ǃhūb diba, ǁîbats ge aiǃgû-aose nî ǂkhauǀkhā ti ǁaes Israels ǂama; tsî ǁîb ge ti ǁaesa Filisteǁîn di ǃomǁaeba xu nîra ore: Tita ge ti ǁaesa go kōǀî, ǂgais ân go tita tawa hā xui-ao.

¹⁷Tsî Samueli ge Saula ǃgapaǀîo, ob ge ǃKhūba ge ǃeream bi: Mû, nēb ge ǁnā khoeb, ǁîb xa ta go mîba tsiba; ǁîb ge ti ǁaesa nî gaoǂam.

¹⁸Tsî Sauli ge Samuela ǁāb ǁaegu ǀgū tsî ge mî: ǁGau te re, mû-aob di oms mapa mâsa?

¹⁹Ob ge Samuela Saula ǃeream tsî ge mî: Tita ge mû-aota; ti ais aiǃâ ǃgûǃapa kho re ǀgapib ai, î kho nētsē tita ǀkha ǂû; o ta ge ǁari ǃnauǁgoaga ǃgû kai tsî nî ǂgaob âts ǃnâ hân hoana mîba tsi.

²⁰Tsî eseln xasa, nētsē ǃnona tsēde kā tsi hân ǂama tā ǂhansen sa ǂgaob ǃnâ, ǁîn go hōhe xuige; tsî tarib dina nî ī, sats khoets ra ǂgaoǀkhā ǁkhān hoana Israeli ǃnâ? Sa tamana tsî sa îb di ommi hoaragab di tamana?

²¹ǃNubaib ge Saula ǃeream tsî ge mî: Benjaminǁî tama ta? Israeli di ǃhaodi hoadi xa ǂkharis di tama ta? Tsî ti ǃhaoǃnāsa Benjaminni ǃhaos di ǃhaoǃnādi hoadi xa ǂkhari tamasa? Tare xū-i ǃaromats kha ǁnâi nēti ī mîde ra ǃhoaǀî te?

²²Tsî Samueli ge Sauli tsî ǁîb di ǃgāb tsîkha ū tsî ǃnā-oms ǃnâ ge ūǂgâ kha; tsîb ge ǁîkha ǁkhausabegu di ǂguro ǂnûǃkhai-e ge mā; ǁîgu ge ǃnonadisi nî ī ao ge i.

²³ǃNubaib ge Samuela sâi-aob ǃoa ge mî: Ūǀkhī ǁnā ǃâs, satsa ta go mās, tsî ǁîs xa ta go sa ǃoa: ǁÎsa sa tawa sâu, ti mîsa.

²⁴Ob ge sâi-aoba ǁgarasa ge ūhā, ǁîs tawa hân ǀkha, tsîb ge ǁîsa Saula mâi-aiǃâ tsî ge mî: Mû, nēs ge ǃgau gosa, mâi-aiǃâsen îts ǂû, mîmâisa ǁaebats satsa ǁîsa sâubahe hâ xuige, ǁaesa ta go ǁkhau ti ta go mî ǃnubai. Nētib ge Saula ǁnātsē Samueli ǀkha ge ǂû.

²⁵ǁNās khaoǃgâ gu ge ǀgapiba xu ǃās ǃoa ge ǁgôa; tsîb ge Sauli ǀkha oms ǂamais ai gere ǃhoa.

²⁶Tsî kha ge ǃnauǁgoaga ge khâi; tsî i ge ǁgoaǂnobos ǀkha ge ī, ob ge Samuela Saula oms ǂamais ai ǂgai tsî ge mî: Khâi î ta ǁnū tsi. Ob ge Saula ge khâi, tsî kha ge ǁî ǀgamkha ge ǃgûǂoa, ǁîb tsî Samueli tsîkha ǃaugaba ǃoa.

²⁷Tsî ǃās di ǀams tawa kha ge ǁgôao, ob ge Samuela Sauli ǃoa ge mî: ǃGāba mîba îb sakhom aiǃâ ǃgû; ob ge ge aiǃgû; îts satsa nēsi mâ, î ta Elob mîsa ǁnâu kai tsi.