Read Khumi Chin ATITI AWM ANGCHEI NAI 1 Bible Online

ATITI AWM ANGCHEI NAI 1 - Khumi Chin bible

ATITI AWM ANGCHEI NAI 1

¹Tameuh my angchei y khusangdeaungdu[1] ai sa nai khala,

²khaileaung ly mo-cha amny y, keuru pui teu. Ati cheaungkhangchi ai um nai suida pangli tui kamsau ai ly kaveng my khiu cheng na. Tameuh i Phailo[2] ly tuisang salo y aho.

³Tameuh my, “Kangvang awm sy,” napi i kangvang awm bo.

⁴Tameuh my kangvang ly hawi nai niu i amo theu. Naibaly mymy ly kaveng hawi kangvang ai taprei bo.

⁵Mymy ly kangvang ai, “Kani thun,” kaveng ai ly “Vum,” nanai pathi. Dym awm nai bo y, khawn py awm teang; huni ly angchei i kani ne.

⁶Hunaibaly Tameuh my, “Tui ly phy nyhrei amprei ai nai kani khusang awm sy,” napi i awm bo. Tameuh my kani khusang awm chum baly kani khusangra awm nai tui hawi, anui y awm nai tui ai patleh takhra bo.

⁸Tameuh my khusang ka-hi ai ly “Kani” pathi. Dym awm nai bo y, khawn py awm teang; huni ly pa-nyh kani ne.

⁹Naibaly Tameuh my, Kani anui y kacheng amteng ai nai tui ly meingtymrei y akachu sy, nanai leu pei i awm ryp bo.

¹⁰Tameuh my kacheng ai ly “Khaileaung” pathi iy, tui awm achu nai ai ly “Pangli” pathi bo. Naibaly Tameuh ly hawi nai niu i amo theu.

¹¹Naibaly Tameuh my, “Amti amjang hawi thengthai keung cheaungkhang khaileaung i nai prau sy,” nanai leu pei i hunai kamta prau ryp bo.

¹²Huna nai deaungkho y khaileaung y cheaungkhangchi prau i, Tameuh ly hawi nai niu i amo theu.

¹³Dym awm nai bo y, khawn py awm teang; huni ly pa-thom kani ne.

¹⁴Naibaly Tameuh my, “Vum hawi kani thun taprei ai nai kanichi, sanengchi, reita pawichi [3] khai takhra ai nai kani khusangra kangvangchi awm sy;

¹⁵khaileaung salo y kangvang ko ai nai kani khusang mang y angvang nai awm sy,” napi i, hunai kamta awm ryp bo.

¹⁶Hunaibaly Tameuh my kangvang len parai nai nyhrei sa i, kanito ly kani thun y peang ai nai hawi, lo ly vum y peang ai nai py sa, mymy ly ka-sichi ai py sa teang.

¹⁷Mymy ly khaileaung salo y angvang hai ai nai ly

¹⁸kani thun hawi vum y peang iy kangvang hawi kaveng taprei ai nai kani khusang mang y kangvangchi khai pi; naibaly Tameuh ly hawi nai niu i amo theu.

¹⁹Naibaly dym awm nai bo y khawn py awm teang; huni ly palyh kani ne.

²⁰Naibaly Tameuh my, “Tui theung y heng nai amjy cheaungkhangchi kawi sy, ali theung y akheang nai tavochi py awm sy,” napi i, awm ryp bo.

²¹Hunaibaly Tameuh ly pangli theung y heng nai amjy cheaungkhang napi nai tui theung i mana mawichi hawi, tavo cheaungkhangchi sa. Tameuh ly hunichi ai hawi nai nui i amo theu.

²²Mymy ly tui theung y awm nai py, tavochi py pangli kawi na pa-rei peung sy, nanai amtheaung hai bo.

²³Naibaly dym awm nai bo y, khawn py awm teang; huni ly pa-ngo kani ne.

²⁴Naibaly Tameuh my, “Khaileaung ly daichi mawi katheang kalen hawi tawnbawi cheaungkhang peung sy,” nanai leu pei i, hunaibaly peung ryp bo.

²⁵Naibaly Tameuh my huni bawibawichi sa nai bo y hawi nai niu i amo theu.

²⁶Naibaly Tameuh my, “Achi ly amychi ka-tawm khumi ai so u sina; nichi ly achi atawm ai i, ngochi ai py, tavochi ai py, khawn nai hawi khawn y nai mawi cheaungkhangchi peang ai,” napi.

²⁷Hunaibaly Tameuh ly mymy ka-tawm khyp naimy khumi neampacho hawi neampachy ai sa nai ne.

²⁸Nini ai amtheaung hai i, “Cho chanau neangneang so, nangni i kangpreangchi ly khaileaung pri verei y peung u sy; khaileaung pri py peang u. Nangchi i anui y awm ai nai daichi mawichi, tavochi hawi ngochi ai peang u,” napi.

²⁹Kaimy nangni cha ai nai amti amjangchi hawi thengthai cheaungkhangchi py, kang khai pi bo.

³⁰Na i py daichi mawichi hawi tavochi i vui cha ai nai achachi hawi lymlo kangphochi py kaimy khai pi, napi i awm ryp bo.

³¹Tameuh my mymy i sa nai cheaungkhangchi ai khen i, khri pa-rei amo theu. Hunaibaly dym awm nai bo y, khawn py awm teang; huni ly tariu kani ne.