Read Khumi Chin ATITI AWM ANGCHEI NAI 11 Bible Online

ATITI AWM ANGCHEI NAI 11 - Khumi Chin bible

ATITI AWM ANGCHEI NAI 11

¹Angchei y ly khaileaung pri verei y leu harei awm khyh nai deaungkho y khumichi ly leu harei teaung khyh nai ne.

²Nichi ly nisi mang y asyh veangveang nai kha y, Babulon pri y adym ang deng harei niu i hu y awm u bo.

³Nichi ly mychi tengtawi, “Jeu u! achi iukhi paawp u sina,” nanai arum u. Hunai kamta nichi ly iukhi akau hai nai ketara py sa u teang.

⁴“Vai ly achi khaileaung pri verei y ahei y ai nai hawi amyn amthang jo ai nai, mary pui hawi kani angteu nanai pa-rei asang nai yhm pui so u sina,” nanai arum u bo.

⁵Naibaly ARENG my nichi i mary pui hawi yhm ka-sang sa nai ly khen ai nai satla.

⁶Mymy ly “Khumichi ly cheng harei, leu py harei khyh nai deaungkho y, vai i ka-so mychi i ngai nai kamta sa u veangveang ai bo!

⁷Achi chei iy mychi tengtawi pany thai y ai nai leu athli hai piupa vui sina,” napi.

⁸Huni dengdairei ARENG my nichi ai khaileaung pri verei y ahei hai pawn i, mary pui sa nai py anawn u bo.

⁹ARENG my khumichi ai leu athli hai piupa vui nai deaungkho y huni mary pui ai ly Babulon,[14] nanai palau bo. Hu i dengdairei nichi ai khaileaung pri verei y ahei hai akyhkyh vui nai ne.

¹⁰Hini ly Sema i kangpreangchi ne. Sema ly tuibai tuitleng theu nai bo saneng nyhrei khala y, mymy i saneng ly chungvairei awm i chapo Arpasa ai sa.

¹¹Huni bo y mymy ly saneng 500 rei heng i cho chanauchi nga asai rai.

¹²Arpasa ly saneng 35 rei khala y chapo leaungrei sa, amyn ly Selah ne;

¹³huni bo y Arpasa ly saneng 403 rei heng i cho chanauchi nga asai rai.

¹⁴Selah ly saneng 30 rei khala y chapo Eber ai sa;

¹⁵huni bo y saneng 403 rei heng i cho chanauchi nga asai rai.

¹⁶Eber ly saneng 34 rei khala y chapo Pelek ai sa;

¹⁷huni bo y saneng 430 rei heng i cho chanauchi nga asai rai.

¹⁸Pelek ly saneng 30 rei khala y chapo Reu ai sa;

¹⁹huni bo y saneng 209 rei heng i cho chanauchi nga asai rai.

²⁰Reu ly saneng 32 rei khala y chapo Seruk ai sa;

²¹huni bo y saneng 207 rei heng i cho chanauchi nga asai rai.

²²Seruk ly saneng 30 rei khala y chapo Nahora ai sa;

²³huni bo y saneng 200 rei heng i cho chanauchi nga asai rai.

²⁴Nahora ly saneng 29 rei khala y chapo Terah ai sa;

²⁵huni bo y saneng 119 rei heng i cho chanauchi nga asai rai.

²⁶Terah ly saneng 70 rei awm nai bo y Abram, Nahora hawi Haranchi ai sa nai ne.

²⁷Hini ly Terah i kangpreangchi ne; mymy ly Abram, Nahora hawi Haranchi i ampo ne. Haran ly Lota i ampo ne.

²⁸Haran ly mymy i ampo heng nai thym khala y my, Babulon pri Ura napi nai mymy i mary y dei bo.

²⁹Abram ly Sarai ai pom i, Nahora ly Haran i chaniu Meleka ai pom. Haran ly Isekai hawi Meleka i ampo ne.

³⁰Sarai ly chanau so y.

³¹Terah ly chapo Abram, katu Lotachi hawi lengngo Saraichi ai hawi iy, Kanan pri y chei ai nai Babulon pri Ura mary i dengdairei amsa i, Haran mary y tym iy, huni mary y khuteng sa.

³²Terah ly saneng 205 rei awm nai khala y hu y dei nai ne.