Read Khumi Chin ATITI AWM ANGCHEI NAI 12 Bible Online

ATITI AWM ANGCHEI NAI 12 - Khumi Chin bible

ATITI AWM ANGCHEI NAI 12

¹ARENG ly Abram teng y, “Nangmy i pri, nangmy i amjo amnauchi hawi ngampo i yhm dengdairei theu ly kai my kang patei nai pri mang y chei.

²Kaimy nang ai kangpreang neangneang peung hai iy khumi cheng kalen lawm hai ai. Kaimy nang ai amtheaung hai ai i, nang i amyn asang nai deaungkho y, khumichi ly nang i saho y amtheaung naira nga u ai.

³Nang ai amtheaung hai nai khumichi ai ly kaimy amtheaung hai ai, Na i py nang ai pasawi nai khumichi ai ly kaimy kapasawi teang ai. Naibaly nang i saho y khumi cheng cheaungkhangchi ly amtheaung naira nga u ai,” napi.

⁴ARENG my thui pi nai kamta Haran mary i dengdairei theu nai thym khala y, Abram i saneng ly vui saryh taja pangrei awm. Lota py mymy hawi vanrei abang teang.

⁵Abram ly aju Sarai ai py, amnau i chapo Lota ai py, nang nai yhmtheaung katuichi py, Haran y awm nai thym khala i nga nai miseaungchi py hawi iy, Kanan pri mang y tako u i tym u bo.

⁶Kanan pri y tym u nai khala Abram ly Sekhem meingtym, Moreh dengkeaung kachai awm nai mang y tym pa-rei tako prei nai ne. (Huni neng y Kanan chengchi ly huni meingtym y awm u angchi yb nai bo.)

⁷ARENG ly Abram teng y amteng i, “Hini pri ly nang i kangpreangchi teng y kapei ai,” napi. Naibaly Abram ly mymy teng y amteng hai nai ARENG i vui maicham sa bo.

⁸Huni bo y tokalawi mang y asyh i, Bethela mary nisi mang mawi tleaung meingtym, nisi mang y ly Ai mary hawi nidym mang y ly Bethela mary sala y meingtym sa i awm bo. Ni ly hu y maicham sa bi i, ARENG ai chiu bo.

⁹Huni bo y mymy ly Kanan pri tokalawi mang y meingtym asyh veangveang nai ne.

¹⁰Na i py huni neng khala y, Kanan pri y takang theu nai ne; khri pa-rei takang ho nai deaungkho y Abram ly Aikupta pri y awm dawh ai nai chei kathiu bo.

¹¹Aikupta pri y tym ai nai khujyh mang tako ai nai tla i mymy ly aju Sarai teng y, “Nang ly anglo mo hawi parai nai neampachy ne.

¹²Aikupta khumichi my nang ai niu nai khala y nang ai ly kai i aju ne, nanai palawn u ai; naibaly kai ai padei ai i, nang ly heng jo ai.

¹³Nichi teng y kai i tuicho teu napi baly, nang i saho y kai heng ai i kai ai ang kry u ai,” napi.

¹⁴Aikupta pri khujyh mang tako nai khala y, Aikupta khumichi my Abram i aju anglo hawi parai nai niu u bo.

¹⁵Anglo hawi nai sai niu nai samrang i miseaung phyrei my samrang teng y thui pi i, Sarai ai ly samrang i yhm mang y pahawi u bo.

¹⁶Sarai i saho y samrang my Abram ai ly hawihai kry iy, kula-iuchi, mi-ichi, miseaungchi, keaungngo kano kasauchi, sichi, beramchi pei pi nai ne.

¹⁷Na i py samrang my Sarai ai la vui nai y, ARENG my samrang i tlang tleaung y py, samrang i yhm y awm nai khumichi teng y py, ka-jei awm parai nai no michi tym hai bo.

¹⁸Naibaly samrang my Abram ai palau i Abram teng y, “Nang ly kai ai ati mana sa nai mo? Ati mana nai y kai i aju, nanai thui y lawh mo?

¹⁹Ni ai kai i aju palawn ai nai ni ly kai i tuicho, nanai thui lawh mo? Nang i aju hi y awm; lo teang ly vaimy tako hai vui jau!” napi.

²⁰Samrang ly mymy i khumichi teng y leu pei i, nichi my Abram hawi aju ai py, nini i yhmtheaung katuichi hawi raurei pri i nai patheu vui bo.