Read Khumi Chin ATITI AWM ANGCHEI NAI 13 Bible Online

ATITI AWM ANGCHEI NAI 13 - Khumi Chin bible

ATITI AWM ANGCHEI NAI 13

¹Abram nini aju juvo ly myni i yhmtheaung katuichi syn iy, Aikupta pri tosyh ngan mang dengdairei, Kanan pri tokalawi mang y theu hawi bo; naibaly Lota py abang teang.

²Abram ly muku, tangka, sichi, beramchi, mi-ichi khri pa-rei nang nai ne.

³Naibaly huni meingtym i dengdairei theu iy chei patawm veangveang i, Bethela mary mang y chei veangveang nai ne. Ni ly Bethela mary hawi Ai mary sala, vaichi khala mymy i tai reng nai hawi maicham sa reng nai meingtym y tym.

⁴Naibaly mymy ly hu y ARENG ai chiu bo.

⁵Abram hawi vanrei abang nai Lota py yhm dengtheungchi hawi miseaungchi, tawnbawichi, beramchi, mi-ichi neangneang awm teang nai ne.

⁶Hunai deaungkho y nini ly tawnbawi neangneang awm i, vanrei awm hawi ai nai sui tlaira meingtym akeaung y bo.

⁷Naibaly Abram i tawnbawi kry nai keungchi hawi, Lota i tawnbawi kry nai keungchi ly ajo u nai ne. (Huni neng khala huni meingtym y ly Kanan hawi Perizi chengchi awm u yb nai ne.)

⁸Naibaly Abram my Lota teng y, “Kai i khumi hawi nang i khumi sala y ajo nai awm moh sy; ani ly amjo amnau ne.

⁹Hunai deaungkho y ani amprei hawi sina. Nangmy i ngai nai meingtym vawi takhra ly huni mang y tako, kai py kaimy ngai nai mang y tako ai,” napi.

¹⁰Huna nai khala Lota ly khen angdeang prei i, Zoar mary khrairei, Jordan tavo jawn jeungrei ly ARENG i Akho [15] ti y baly, Aikupta pri kamta py tui hawi nai niu bo. (Huni ly ARENG my Sodom mary hawi Komora mary taphra y rai kha i meingtymchi ne.)

¹¹Naibaly Lota ly Jordan tavo jawn jeungrei vawi takhra iy, nisi mang y asyh vui bo. Hhuni dengdairei nini ly amprei hawi nai ne.

¹²Abram ly Kanan pri y awm jo rai; Lota ly tavo jawnra i marychi hawi huni tengtang y vawi i, Sodom mary y tai bo.

¹³Sodom mary i khumichi ly aso y nai deaungkho y, ARENG i mei ka-niu y kamngo nawi nai khumichi ne.

¹⁴Lota theu vui nai bo y ARENG my Abram teng y, “Vai nang i awm nai dengdairei tosyh, tokalawi, nidym, nisi mang y angdeang cham;

¹⁵Nang i niu nai meingtym bawibawi ly nang hawi nang i kangpreangchi i vui deungtasarei amtym u ai nai kai my kang pei ai.

¹⁶Naibaly nang i kangpreangchi ly khaileaung spryh kamta peung ai i, spryh ai kati pajau y nai kamta, nang i kangpreangchi ai ami py kati pajau ai ny y!

¹⁷Vai ang thau ly kai my kang pei ai nai pri verei ai khen cham, nang i niu nai khaileaung ngierei kang pei ai” napi.

¹⁸Naibaly Abram ly hu i dengdairei asyh bi i, Hebron mary Mamre[16] napi nai dengkeaung thengreung sahawi y meingtym sa bo. Hu y mymy ly ARENG i vui maicham sa nai ne.