Read Khumi Chin ATITI AWM ANGCHEI NAI 15 Bible Online

ATITI AWM ANGCHEI NAI 15 - Khumi Chin bible

ATITI AWM ANGCHEI NAI 15

¹Huni bo y, ARENG ly Abram teng y paleung mei y niu hai nai ly “Abram jei moh; Kai ly nang ai ka-jeira i nai ama hai iy, nang ai len parai nai kawn vang kang pei ai,” napi.

²Na i py Abram my, “Sa thai naira angym nai ARENG, kai ly chanau by y pui naimy nang i pei nai kawn vang ly mana kanga thai ai mo? Kai i yhmtheaung kamtym ly Damaska mary y awm nai Elieza ne ryp veng bo.

³Nangmy kai ai chanau pei y nai deaungkho y kai i yhmtheaung kamtym ly kai i miseaungchi theung i leaungrei my amtym ai nai tla ai,” napi.

⁴Naibaly ARENG my Abram teng y, “Hini miseaung Elieza ly nang i yhmtheaung kamtym ne y leang; nang i yhmtheaung kamtym ly nangmy i chapo kypkyp ne ai,” nanai thui pi nai py Abram thai bo.

⁵ARENG my Abram ai angam mang y theu hai i, “Kani mang y angdeang ly ka-sichi ai kati cham; nang i kangpreangchi ly hunai kamta nawi teang ai,” napi.

⁶Abram ly ARENG ai ym nai deaungkho y, ARENG ly amo theu i kawn pi bo.

⁷Naibaly ARENG my Abram teng y, “Kai ly nang ai hini pri kang pei kypkyp ai nai, Babulon pri Ura mary dengdairei pahawi nai keung ly Kai, ARENG ne,” napi.

⁸Na i py Abram my, “Sa thai naira angym nai ARENG, kai ly hunichi mana pany pajau ai mo?” napi.

⁹Mymy ly Abram teng y, “Saneng thomrei awm nai si nu harei, saneng thomrei awm nai mi-i nu harei, saneng thomrei awm nai beram katai harei hawi yhm buhu harei, amprym buhu harei, kai teng y jeu hai,” napi.

¹⁰Abram my huni tawnbawichi ai Tameuh teng jeu hai iy umtang y se bawibawi i, se angchi phy nyhrei khai; na i py tavochi ai ly se y.

¹¹Langnachi ly huni mawi salo y chym, na i py Abram my paryh pawn nai ne.

¹²Kani dym bo nabaly Abram ly aseaung i, i nem bo; naibaly ka-jei hawi parai nai ly mymy i tlang tleaung y tym.

¹³ARENG my Abram teng y, “Nang i kangpreangchi ly cheng takhra theung y angvyn kamta awm ai; nichi ly saneng chungvai palyhrei miseaung y awm ai i, pahyp y naimy ana naira neangneang avum ai.

¹⁴Na i py kaimy nichi ai pahyp y naimy ana nai, miseaung y khai nai keungchi ai pajeng ai i, nichi ly cheng takhrachi theung i nai yhmtheaung neangneang syn naimy theu u ai.

¹⁵Nang ly khri pa-rei miteaung cheang iy, awmnem naimy dei ai i ang pavum ai.

¹⁶Nang ly kangpreang deung palyhrei nai bo y hini pri y tym teang ai; ati mana nai mo nabaly Amori chengchi ly khumi aso y nai molam y pajeng naira avum nai khala, nichi ai hini pri i nai kaimy patheu vui ai nai deaungkho y ne,” napi.

¹⁷Kani dym i veng nai khala y, maikhyh laawm hawi maiteaung ly vaimy amteng i, mawi phy nyhrei sala aleaung bo.

¹⁸Huni neng huni meingtym y ARENG ly Abram hawi Leu Maikawm asa bo. Mymy ly Abram teng y, “Nang i kangpreangchi teng y, Aikupta pri khujyh dengdairei Euphrat tavo tym pa-rei,

¹⁹kenit pri, Kenizi pri, Kadamoni pri,

²⁰Hiti pri, Perizi pri, Rephaim pri,

²¹Amori pri, Kanan pri, Kirakashi pri hawi Jebusi pri bawibawichi kang pei nai leu adeu mang,” napi.