Read Khumi Chin ATITI AWM ANGCHEI NAI 18 Bible Online

ATITI AWM ANGCHEI NAI 18 - Khumi Chin bible

ATITI AWM ANGCHEI NAI 18

¹ARENG ly Mamre thengreungchira Abraham teng y amteng. Kani bi ala nai neng y Abraham ly mymy i kanih yhm pa-khora y ateh nai thym khala,

²mymy ly angdeang i khumi leaung thomrei angdo nai niu. Nichi ai niu nai khala mymy ly avum ai nai chei praw i, khaileaung y meimai abi na pa-rei lu meung iy;

³Abraham my, “Arengchi awi, anawn y naimy kai i yhm katlen u vui moh; kai ly nangchi ai pacho panei ai nai ngai.

⁴Nangchi kheu asi ai nai tui lo rai si; hini dengkeaung ka-khui y ateh u ly anawn u rai ba.

⁵Teicha teinei maidenreichy lo de rai si, huna khala naini nangchi atho awm ai. Nangchi kai i yhm y jeu u nai ly kai ai tahm khai nai bo. Huna nai deaungkho y nangchi ai pacho kyh si,” napi. Nichi my, “Nang i thui nai kamta ne sy,” nanai pathang u.

⁶Abraham ly kanih yhm mang y chei kaliki iy, aju Sarah teng y, “Takodei kanem hawi keh nai lo kaliki ly tako paawp,” napi.

⁷Naibaly mymy ly tawnbawi kanghu theung y chei i, sicho veung hawi nai harei la iy i miseaung teng y theaung kaliki ai nai au bo.

⁸Naibaly mymy ly sikanu hawi si mawi py nichi mo y sawn pi. Mymy kypkyp my nichi ai dengkeaung ka-khuira y pacho i, nichi ly cha u bo.

⁹Naibaly nichi my, “Nang i aju Sarah ly ma y mo?” nanai deng. Abraham my, “Mymy ly kanih yhm theung y awm,” nanai pathang.

¹⁰Nichi theung i leaungrei my, “Vai i dengdairei lo takawrei[21]nai khala y, kai kang tym teang ai; huni neng khala nang i aju Sarah ly chapo tapen ai,” napi. Huni neng khala Sarah ly mymy i nithun y, kanih yhm katheu pa-kho mang tangai nai ne.

¹¹Abraham hawi Sarah ly khri pa-rei saneng len bo i, Sarah ly tlangchai py tyhp veng bo.

¹²Hunai deaungkho y Sarah ly “Kai ly miteaung kacheang nai bo y, i ahawi ai nai mana paleung ano ai jau mo? Naibaly kai i juvo py miteaung cheang bo, nanai paleung theung y dawn naimy panui um nai ne.

¹³Naibaly ARENG my Abraham teng y, “Ati mana nai y Sarah ly ‘Kai ly miteaung kacheang veng jau iy deaungdi nga pajau ai a’ nanai panui lawh mo?.

¹⁴ARENG so pajau y nai awm a? Kaimy kang thui pi nai kamta vai i dengdairei lo takawrei khala y kai kang tym teang ai i, Sarah ly chapo tapen ai,” napi.

¹⁵Sarah ly jei nai deaungkho y, “Kai panui y leang,” nanai akhi bo. Mymy ly “Ne, nang ly panui khyp bo,” napi.

¹⁶Naibaly nichi ly Sodom mary niu pajau ai nai mang y theu u; Abraham py nichi ai tha nai abang teang.

¹⁷Naibaly ARENG ly mymy ai mymy naimy, “Kai sa ai naichi ly Abraham teng y pany hai y nai ly avo y.

¹⁸Mymy i kangpreangchi ly cheng kalen hawi sa thai naira awm nai khumi cheng lawm ai; ni deaungkho y cheng cheaungkhangchi ai kaimy amtheaung hai ai.

¹⁹Kai i leu tangai iy, atiti kahawi sa ai nai mymy i kangpreangchi hawi, mymy i chapochi ai leu pei ai nai molam y, kai ly mymy ai vawi takhra nai ne. Nichi kahawi sa baly kaimy i leu adeu nai kamta khyp, ni i vui ati cheaungkhangchi sa pi ai,” napi.

²⁰Naibaly ARENG my Abraham teng y, “Sodom hawi Komorachi i thui tamawn nai ly khri pa-rei ty na; huni marychi i kamngo nai sai py khri pa-rei len na bo.

²¹Kai i thai nai thui tamawn naichi ly teng khyp mo, teng khyp y mo, nanai pany ai nai chei kathiu ai,” napi.

²²Nichi theung i leaung nyhrei ly theu hawi i Sodom mary mang y tako hawi jo bo; na i py ARENG ly Abraham hawi vanrei awm jo.

²³Abraham ly ARENG sahawi y athui i, “Nang ly khumi kamngochi hawi vanrei khumi kahawichi ai py meitang khyp taphra ai bo a?

²⁴Huni mary theung y khumi kahawi leaung vuipangrei awm lawh i py mary verei taphra ai bo a? Khumi leaung vui pangreichi ai atleu ai nai dawn pi y ai bo a?

²⁵Nang ly khumi kahawichi ai khumi hawi y naichi hawi vanrei padei rau ai ny y leang. Huna nai ly avo y leang! Nang ly sa ai ny y. Nang huna nai kamta sa lawh baly khumi kahawichi py, khumi hawi y naichi hawi vanrei pajeng naira avum u ai; huna nai ly avo y leang. Khaileaung pri verei ai tara chih nai keung ly meitang naimy tara chih pi ai teu” napi.

²⁶ARENG my Sodom mary theung y khumi kahawichi leaung vui pangrei awm lawh baly, mychi i saho y mary verei kapahen ai,” napi.

²⁷Abraham my, “Areng, nang teng y vam parai naimy kang takeng veangveang nai ly kai ai pahen kyh. Kai ly khumi teu i, takeng ai nai py ataing y leang.

²⁸Khumi kahawi leaung vuipangrei theung y, leaung vui palyh pa-ngo pangrei awm khyh baly, leaung pangrei ngai vui nai deaungkho y mary verei ai nang taphra ai a?” napi. ARENG my, “Khumi kahawi leaung vui palyh pa-ngo pangrei awm khyh teu i py kataphra y leang,” napi.

²⁹Abraham my khumi kahawi leaung vui palyhrei awm khyh lawh baly,” napi. Nimy ly “Khumi leaung vui palyhrei awm khyh teu i py kataphra y leang,” napi.

³⁰Abraham my, “Aw Areng, pahen parai naimy kado theu moh kyh ba; kai kang takeng bi ai nai ngai. Hu y khumi kahawi leaung phairei awm khyh lawh baly mana sa ai mo?” napi. Nimy, “Khumi kahawi leaung phairei awm khyh i py taphra y leang mang,” napi.

³¹Abraham my, “Aw Areng, nang teng y vam parai naimy takeng nai ly kai ai pahen kyh ba. Khumi kahawi leaung apomrei awm khyh lawh baly taphra ai a?” napi. Nimy, “Khumi kahawi leaung apomrei awm khyh teu i py taphra y leang,” napi.

³²Abraham my, “Aw Areng, pahen kyh, kado theu moh kyh ba; hini tlenrei kang takeng bi ai. Khumi kahawi leaung horei awm khyh lawh baly taphra ai a?” napi. Nimy, “Leaung horei awm lawh baly taphra y leang mang,” napi.

³³Abraham hawi leu arum pajau bo nabaly ARENG ly tako pi veng bo; Abraham py mymy i yhm mang y vawi ali teang nai ne.