Read Khumi Chin ATITI AWM ANGCHEI NAI 19 Bible Online

ATITI AWM ANGCHEI NAI 19 - Khumi Chin bible

ATITI AWM ANGCHEI NAI 19

¹Kani pri amtaw thau nai leaung nyhrei ly huni dym Sodom mary y tym; Lota ly mary katheu pa-kho y ateh naimy awm. Mymy ly nini ai niu nai hawimy, ang thau iy nini hawi avum ai nai chei bo. Mymy ly nini i mo y lu meung naimy,

²“Arengni awi, kai ly nangni ai pacho panei ai nai ngai i, kai i yhm y jeu hawi kyh. Kheu asi hawi ly vai dym ly kai teng y ango hawi. Khawndam khawn angthodyh ang thau iy tako hawi,” napi. Na i py nini my, “Ny y leang, kaini ly vum torei hini mary theung y amki ai,” napi.

³Lota my takeng veangveang i kangkhym y nini ly yhm y kun hawi bo. Lota my miseaungchi teng y tako phyrei paawp ai nai leu pei i, angvyn i vui sawn pi. Naibaly nini ly cha hawi bo.

⁴Angvyn nini i y kyh rai khala y, Sodom mary i neampacho bawibawichi ly jeu i yhm katan u meuh bo.

⁵Nichi ly Lota ai palau u i ni teng y, “Vai dym nang i yhm y tym nai angvyn ni ly ma y mo? Nini ai patheu pi,” napi. Sodom mary i khumichi ly nini hawi kamleaung sa ai ngai nai ne.

⁶Lota ly angam mang y theu i katheu ly kho tawp teang.

⁷Lota my nichi teng y, “Ahawichi awi, huna nai hawi y nai ly so u reng moh!

⁸Khen cham, kai i chaniu anglo leaung nyhrei awm, nini ai kang patheu pi ai; nangmychi ngai nai kamta so u. Na i py angvyn ni ai ly ati sai py so hai u moh; nini ly kai i angvyn ne i kaimy kry nai ne,” napi.

⁹Na i py khumichi my, “Leh veng, nang ly cheng takhra teu! Kaichi ai leu pei nai nang ly ami mo? Nini avum ai nai tleaung y ly nang i tlang tleaung y hawi y keh nai tym lawh na,” napi u bo. Nichi ly Lota ai nui vui iy, katheu taphra ai nai atho sa u.

¹⁰Na i py yhm angtheung mang y awm nai angvyn leaung nyhrei my ly Lota ai yhm angtheung mang y ryh vui iy katheu kho hai vui bo.

¹¹Naibaly nini my angam mang i khumichi ai mei paju hai vui i, mymychi ly katheu pa-kho hau keaung nai ne.

¹²Nini my Lota teng y, “Hini mary theung y nang i chapochi, chaniuchi, meaungchachi hawi takhra ngamjo ngamnauchi awm baly hi i dengdairei theu hai pawn jau;

¹³Kaini my hini mary taphra veng ai bo. ARENG my hini khumichi i thui tamawn nai sai deaungkho y Sodom mary taphra vui ai nai kaini ai pato nai bo,” napi.

¹⁴Naibaly Lota ly chaniu ni hawi apom hai ai nai neampachochi teng chei iy, “Hi i nai theu u kaliki jau; ARENG my hini mary taphra ai bo,” napi. Na i py nichi ly amnui thui nai teu, nanai palawn u.

¹⁵Khutawi nai khala, kani pri amtaw thai nai nimy Lota teng y, “Hini mary taphra nai khala nang py abawi lawh na i, nang i aju py, chaniu leaung nyhrei py, hi i nai theu u kaliki,” napi.

¹⁶Lota ly niniuna nai deaungkho y ARENG my pahen i, mymy i chaniu leaung nyhrei ai py, aju ai py, mymy ai py kiuban y amkhaw iy, mary theung i nai theu hai bo.

¹⁷Naibaly kani pri amtaw thai nai nini theung i leaungrei my, “Nangchi tleaung ai nai angpreng u! Nithun mang y khen u ali bi moh; adym y py anawn u moh. Mawi salo mang phai angpreng u, naibaly nangchi tleaung u ai,” napi.

¹⁸Na i py Lota my, “Areng awi, hunai kamta so hai mo kyh.

¹⁹Nang ly kai ai pahen nai deaungkho y kai ly tleaung bo; mawichi ly palo parai i, mawi salo y tym y rai khala my patang naira kai lawh na, nanai mawn parai.

²⁰Mo kataw y mary katheang niu hawi a? Huni ly kasa nai deaungkho y kai i vui hawi khyp bo. Kai ai chei hai kyh; Huni meingtym ly theang i py hawi, nanai nangmy pany i, huni mang y angpreng si; naibaly kai awm nemra nga ai,” napi.

²¹Kani pri amtaw thau my, “Hawi mang, kai py kang ngai hai; huni mary ai ly taphra y leang,

²²angpreng kaliki jau! Nang hu y tym y ryrei ly kai ati sai py so y leang mang,” napi. Huni mary katheang ai ly Zoar,[22] nanai amyn pathi bo.

²³Lota Zoar mary y tym baly kani si bo.

²⁴ARENG my Sodom hawi Komora mary salo y tlenrei khyh my kan mai kani nai hai bo.

²⁵Khaileaung salo y prau nai cheaungkhang hawi adym ang deng leaunghawira awm nai khumichi py, mary i awm nai khumi bawibawichi ai py taphra be bo.

²⁶Na i py Lota i aju ly nithun mang y khen alengli teang lawh nai y, palawi lengseaung lawm vui bo.

²⁷Khawn pa-nyh angthodyh Abraham ly ARENG hawi leu arum nai meingtym mang y chei kaliki bo.

²⁸Mymy ly Sodom mary hawi Komora mary ai py, adym ang deng leaunghawi bawibawi py khen angdeang i, huni pri dengdairei mai khyhthleung nai niu bo; huni ly tamang mai pui sau nai kamta maikhyh sau nai niu bo.

²⁹Na i py Tameuh my Lota awm nai adym i mary bawibawi ai py taphra nai khala, Tameuh my Abraham ai pany jo i, Lota ai ly tleaung hai nai ne.

³⁰Lota ly Zoar mary y awm vam y nai deaungkho y mymy i chaniu leaung nyhrei hawi mawi mang y lyn kalau iy tapiu theung y awm u nai ne.

³¹Chaniu Kalan my amnau teng y, “Ani i ampo ly miteaung cheang bo; ani hawi apom ai nai khaileaung pri y[23] khumi neampacho leaungrei py by y i, ani ly deaungdi ngo y ai bo.

³²Jeu ly ani i ampo ai kreip hang nei hai hawi sina; pavui nai khala y, ani ly mymy hawi i ahawi ai; naibaly ani ly mymy deaungkho y cho chanau nga ai,” napi.

³³Huni dym y nini my ampo ai kreip hang panei i chaniu kalen ly ampo hawi i ahawi bo; ampo ly pavui ala nai deaungkho y ati sai py pany y.

³⁴Pa-nyh kani y ly amjo my amnau teng y, “Jangdym kai ly i ahawi bo, vai dym py kreip hang panei bi sina; nang py kai kamta ni hawi i ba; huna khala naini ngaai i saho y ani ly cho chanau nga ai,” napi.

³⁵Huni dym y ampo ai kreip hang nei hai hawi bi i, amnau ly ampo hawi i ahawi bo: ampo ly pavui ala nai y ati sai py pany y.

³⁶Lota i chaniu leaung nyhrei ly huna nai kamta sa hawi nai deaungkho y deaungdi aniu hawi mei bo.

³⁷Chaniu kalen ly deaungdi neampacho tapen i, amyn ly Moba,[24] nanai amyn pathi bo. Vai deung kangthau Moba chengchi i amsi pajo ne.

³⁸Chaniu katheang py chapo tapen teang i, amyn ly Benammi,[25] nanai pathi. Mymy ly vai deung kangthau Ammon chengchi i amsi pajo ne.