Read Khumi Chin ATITI AWM ANGCHEI NAI 2 Bible Online

ATITI AWM ANGCHEI NAI 2 - Khumi Chin bible

ATITI AWM ANGCHEI NAI 2

¹Naibaly huna nai kamta khusangdeaungdu ai palum nai ly cheang angym bo.

²Tameuh mymy i atitichi sa nai ly cheang angym bo i, saryh kani y anawn nai ne.

³Mymy ly saryh kani y amtheaung hai iy khai takhra bo; ati mana nai mo nabaly mymy ly kalop sa angym veng nai deaungkho y anawn nai ne.

⁴Naibaly huna nai kamta khusangdeaungdu ai sa nai ne. ARENG [4] Tameuh my khusangdeaungdu ai sa nai khala ly

⁵khaileaung salo y kani nai hai y rai nai deaungkho y keung prau nai py, hm amdi nai py by y; khaileaung y amti amjang pati nai khumi py by y leang rai;

⁶na i py khaileaung theung mang tui theu hai iy am-i hai bo.

⁷Naibaly ARENG Tameuh ly khaileaung salo i khaileaung phyrei la iy khumi myn sa; notareang mang hengra kangho hm pi i, khumi ly heng amteaung bo.

⁸Naibaly ARENG Tameuh my nisi mang i Eden meingtymra y akho sa i, hu y mymy i sa nai khumi ai khai.

⁹Mymy ly khen apu parai nai dengkeaung keungchi hawi cha kahawi thengthai keung cheaungkhang py prau hai bo. Akho um pareaung y ly hengra pei nai dengkeaung keung, hawi nai hawi y nai pany thai nai dengkeaung keung prau hai.

¹⁰Tavo harei ly Eden akho theung y tui leaung hai; Eden akho palem mang y leaung nai khala ly tavo palyhrei amprei hai bo.

¹¹Angchei i tavo ly Pishon napi i, Havila pri verei y leaung prei.

¹²(Huni tavora y muku hawi keh nai hawi rimui py, lengseaung vang katengchi py theu.)

¹³Pa-nyh i tavo ly kihon napi i, huni tavo ly kusha pri verei y leaung prei nai ne.

¹⁴Pa-thom i tavo ly Tikri napi i, Asuria pri nisi mang y leaung nai ne. Palyh i tavo ly Euphrat napi.

¹⁵Naibaly ARENG Tameuh my khumi ai ly Eden akho kry ai nai hawi kalop sa ai nai hu y khai bo.

¹⁶ARENG Tameuh my, “Nang ly akho theung i thengthai athai cheaungkhang cha pajau mang;

¹⁷hawi nai hawi y nai pany thai nai thengthai athai ly nang cha ai nai avo y; nang cha lawh baly, cha nai kani y my dei takengkei ai,” napi.

¹⁸Naibaly ARENG Tameuh my, “Khumi neampacho mymy tlairei awm khyh nai ly hawi y leang: kaimy mymy ai sabawm ai nai amlau nai ahawi leaungrei sa pi ai,” napi.

¹⁹ARENG Tameuh my khaileaung phyrei la iy tavo cheaungkhang hawi amso mawi cheaungkhang ai py sa. Naibaly Tameuh my nichi ai amyn pathi ai nai khumi teng y pahawi achu; naibaly khumi my amyn pathi i amyn lo u bawibawi.

²⁰Hunai kamta amso mawi cheaungkhang hawi tavo cheaungkhangchi ai amyn pathi pi; na i py mymy ai sabawm ai nai amlau nai ahawi by y leang rai.

²¹Naibaly ARENG Tameuh ly khumi ai i hai jyhp iy, i nai thym khala y khumi teng i pana hiu harei la i, huni ai ly ngan bawn hai bo.

²²ARENG Tameuh my pana hiu hawi sa nai khumi neampachy ai ly neampacho teng y hawi.

²³Naibaly khumi my, “Hini khumi ly kai i hiu theung i hiu, kai i ngan bawi theung i ngan bawi kypkyp ne; khumi neampachora i theu nai ne i, khumi neampachy ne sy,” nanai amyn pei nai ne.

²⁴Hunai deaungkho y neampacho ly amhm ampo ai khai su iy, aju hawi apom i, nini ly ngan bomrei lawm bo.

²⁵Khumi neampacho hawi khumi neampachy nini ly tlang ka-keu awm teu i py kangji apany hawi y.