Read Khumi Chin ATITI AWM ANGCHEI NAI 20 Bible Online

ATITI AWM ANGCHEI NAI 20 - Khumi Chin bible

ATITI AWM ANGCHEI NAI 20

¹Abraham ly Mamre dengdairei kanan pri tokalawi mang y asyh i, Sura mary hawi Kadesa mary sala y meingtym sa bo. Abraham ly Kerar mary y awm nai thym khala y,

²mymy i aju Sarah ai kai i tuicho teu napi. Hunai deaungkho y Kerar samrang Abimelek ly khumi pato iy Sarah ai la vui bo.

³Vum y Tameuh my samrang teng y amang mang y amteng i, “Nang ly dei ai, ati mana nai mo nabaly nangmy la vui nai neampachy ly juvo awm yb nai ne,” napi.

⁴Na i py Abimelek ly neampachy hawi i ahawi y leang rai; ni ly “ARENG, kai teng y kamngo by y leang! Kai i khumichi hawi kai ai padei ai bo a?

⁵Abraham my py kai i tuicho teu, neampachy mymy py kai i ampro teu, nanai thui bo. Kai ly paleung kachai hawi sa nai ne; kai tamang y leang,” napi.

⁶Tameuh my amang mang y, “Ne, nang paleung kachai hawi sa, nanai kai pany; hini neampachy ai nang i kiu hawi teaung y ai nai py, kai i tlang tleaung y nang kamngo so y ai nai py, kaimy paka nai ne.

⁷Na i py vai ly neampachy ai juvo teng y tha pi ali teang. Mymy ly amo leaungrei ne i, nang i vui chiu so pi na mang; hunaibaly nang ly dei y ai. Na i py nangmy pei pi ali teang y baly nang i khumichi hawi nang ly dei takengkei ai, nanai kaimy leu kang pei,” napi.

⁸Naibaly Abimelek ly khawn pa-nyh angthodyh miteaung kehchi ai palau i, avum nai leaungsaichi amti pi nai khala, mymychi ly khri pa-rei jei u bo.

⁹Naibaly Abimelek my Abraham ai palau i, “Nang ly kaichi ai ati mana sa nai mo? Kai ly nang i tlang tleaung y ati sa tamang nai deaungkho y, nang ly kai hawi vanrei kai i pri y ka-jeira tym hai nai mo? Nang ly kai i tlang tleaung y sa ai avo y nai sa lawh ly.

¹⁰“Nang ly ati mana nai y hina nai sa lawh mo?” napi.

¹¹Abraham my, “Hini meingtym i khumichi ly Tameuh ai jei y nai hawi tahm khai y nai deaungkho y, Kai i aju ai la vui iy, kai ai padei veng ai, nanai dawn i hina nai kasa nai ne.

¹²Ni ly kai i tuicho ne khyp; mymy ly ampo y vanrei, amhm takhra nai kai i tuicho ne i, kai i aju py ne.

¹³Hunai deaungkho y Tameuh ly kai ai ngaai i yhm dengdairei cheng takhrachi i pri mang y patheu nai khala kaimy ni teng y, ‘Khumi lutengchi teng y kai i ampro ne, nanai thui jojo baly kai i vui y ka-ym awm nai sai amteng hai nai ne kanapi,’ ” nanai pathang.

¹⁴Naibaly Abimelek my Abraham teng y Sarah ai au pi teang; huni neng khala beram, si hawi miseaungchi py pei pi.

¹⁵Mymy ly Abraham teng y, “Nang ly hini kai i pri theung y nangmy i ngai nai meingtym y awm pajau mang,” napi.

¹⁶Abimelek ly Sarah teng y, “Nang ly kamngo by y, nanai khumichi ka-niu y, ngampro teng y kaimy tangka chang sangrei kapei pi bo; khumi luteng my nang ly sa tamang nai ati sai py by y, nanai pany u ai,” napi.

¹⁷Abraham i aju Sarah molam y samrang Abimelek i yhm y awm nai neampachy bawibawichi ly deaungdi so y ai nai ARENG my sa pi vui nai ne. Hunai deaungkho y Abimelek i vui Abraham my chiu sa pi i, ni ai Tameuh my no hawi hai bo. Mymy i aju py, mymy i miseaung neampachychi ai py, chanau sa ali teang ai nai no hawi sa pi bo.