Read Khumi Chin ATITI AWM ANGCHEI NAI 21 Bible Online

ATITI AWM ANGCHEI NAI 21 - Khumi Chin bible

ATITI AWM ANGCHEI NAI 21

¹ARENG ly mymy i leu adeu nai kamta Sarah ai amtheaung hai bo.

²Naibaly mymy ly deaungdi aniu i miteaung theung y Abraham i vui chapo leaungrei tapen pi. Tameuh my adeu nai neng y deaungdi tapen khyp nai ne.

³Abraham ly Isaka, nanai amyn pathi bo.

⁴Naibaly Isaka kani tajarei awm nai khala y, Tameuh my leu pei nai kamta Abraham ly lengkhym takip pi.

⁵Isaka ai tapen nai khala y Abraham ly saneng chungvairei awm.

⁶Sarah my, “Tameuh ly kai ai amo theu hai, amnui ano hai i, thai nai khumichi ly kai hawi vanrei amo theu u ai,” napi.

⁷Sarah my thui bi i, “Sarah ly my i chapo kypkyp ai pacho panei ai, nanai Abraham teng y ami my thui pi ai mo? Ni ly miteaung pui cheang nai khala y, kai ly chapo leaungrei tapen pi lawh!” napi.

⁸Deaungdi py veangryh veangryh i, kanu li nai kani y Abraham ly pawi len parai nai sa pi.

⁹Kanirei nai khala y, Aikupta neampachy Hakara my Abraham i vui tapen pi nai chapo Ismaela ly Sarah i chapo Isaka hawi pavai ahawi[26] i, panui pachem hai bo.

¹⁰Sarah my huna nai niu i Abraham teng y, “Hini miseaung nu hawi chapo ai ly paryh veng. Kai i chapo Isaka amtym ai nai nang i yhmtheaungchi ly miseaung nu i tapen nai chapo amtym ai nai avo y,” napi.

¹¹Abraham ly Ismaela py mymy i chapo ne teang lawh nai deaungkho y khri pa-rei paleung bira avum bo.

¹²Na i py Tameuh my Abraham teng y, “Nang i miseaung nu Hakara hawi chapo molam y nang paleung bi moh. Sarah i thui nai kamta nang sa ai nai tla; ati mana nai mo nabaly kaimy leu adeu hai nai kamta Isaka dengdairei nang i kangpreangchi peung ai.

¹³Miseaung nu i chapo py nang i chapo ne teang i, mymy ai py cho chanau neangneang peung hai ai: nichi py khumi cheng harei lawm teang ai,” napi.

¹⁴Kani pa-nyh khawn angthodyh Abraham ly Hakara teng y teicha teinei hawi tui kawi meng nai mawi peih adym pei pi; deaungdi ai peu hai iy yhm i nai pala vui bo. Miseaung nu ly hu i nai satla i, Beraseba napi nai daichi ka-vym mang y preang bo.

¹⁵Tui kheih be nai khala mymy ly deaungdi ai kabeng theung y khai su iy,

¹⁶hlaurei ka-khanra y ateh nai tarawi y, mymy ai mymy naimy, “Deaungdi dei nai ly kai khen vam y,” nanai thui iy vo bo.

¹⁷Tameuh ly deaungdi i vo nai katyn thai i, kani pri mang y awm nai Tameuh i kani pri amtaw thau naimy Hakara teng y, “Hakara awi, nang ly ati mana nai y paleung bi mo? Mawn reng moh; Tameuh my deaungdi i vo nai katyn thai bo.

¹⁸Angthau ly deaungdi ai tapawm iy awm hai nem. Kaimy ni i kangpreangchi ai cheng kalen lawm hai ai,” napi.

¹⁹Naibaly Tameuh my ni ai mei pali hai i tuikan harei niu bo. Mymy ly chei iy mawi peih adym y tui kawi pa-rei tleng i, deaungdi ai panei bo.

²⁰Tameuh my huni deaungdi ai tleaungri cheang pa-rei huni deaungdi teng y awm hai; mymy ly Paran daichi ka-vym y awm i, mawi sara kalen lawm nai ne.

²¹Amhm my Aikupta neampachy leaungrei hawi apom hai bo.

²²Huni neng khala, Abimelek ly my i tavailu Phikol hawi Abraham teng y chei i mymy teng y, “Nang i sa naira tleirei y Tameuh my awm hai nai ne.

²³Hunai deaungkho y kai hawi kai i kangpreangchi ai py, kai i cho chanauchi ai py, nang ly tapawp y leang, nanai Tameuh i mo y vaineng abeu ba. Kai py nang i vaineng sa nai kamta kang tapawp y leang mang; nang hini pri y awm nai thym khala kai py ka-ym awm ai, nanai leu adeu bo,” napi.

²⁴Abraham my, “Kai leu adeu mang,” napi.

²⁵Abraham ly Abimelek i miseaungchi my tuikan lawm vui nai molam y, Abimelek teng y amti pi.

²⁶Abimelek my Abraham teng y, “Huna nai ami sa mo, nanai kai pany y. Nang py kai teng thui vai y, kai ly vai naini kathai angchei rai,” napi.

²⁷Naibaly Abraham ly Abimelek teng y, beram py, si py pei pi i, nini ly ka-ly sa hawi bo.

²⁸Abraham ly mymy i tawnbawichi theung i nai beram cho saryhrei vawi takhra bo;

²⁹naibaly Abimelek my Abraham teng y, “Nang ly ati mana sa nai mo?” napi.

³⁰Abraham my, “Hini tuikan ly kai i tai nai tuikan ne, nanai nang pany ai nai hini beram saryhrei kang pei nai ne,” napi.

³¹Hu y nini ly vaineng asa hawi nai deaungkho y huni meingtym ai ly Beraseba,[27] nanai amyn pathi hawi bo.

³²Nini ly Beraseba meingtym y leu adeu chum baly, Abimelek hawi tavailu Phikol ly Philistin pri mang y vawi hawi teang bo.

³³Naibaly Abraham ly Beraseba meingtym y pangli maicha keungrei ui ato i, mymy ly deungtasarei awm jojo nai ARENG Tameuh ai chiu bo.

³⁴Abraham ly Philistin pri y kra parai pa-rei awm nai ne.