Read Khumi Chin ATITI AWM ANGCHEI NAI 23 Bible Online

ATITI AWM ANGCHEI NAI 23 - Khumi Chin bible

ATITI AWM ANGCHEI NAI 23

¹Sarah ly saneng chungvai atlo apom phai saryhrei heng nai ne.

²Ni ly Kanan pri Hebron mary y awm nai khala dei i, Abraham ly paleung si vo tangam hai bo.

³Mymy ly aju veu heung naira i theu iy Hiti chengchi teng y chei i nichi teng y,

⁴“Kai ly nangchi theung y angvyn kamta ne; kai i aju veu up ai nai khaileaung meingtym jo pi kyh,” napi.

⁵Nichimy pathang nai ly “Areng awi, kaichi i leu tangai kyh rai,

⁶kaichi ly nang ai sa thai naira awm nai keung leaungrei nanai kang niu; kaichi teng i hawi keh nai tapreaung y nang i aju veu up teu. Kaichi bawibawi ly nang i aju ai up ai nai ngai hai mang,” nanai pathang u bo.

⁷Naibaly Abraham ly nichi i mo y lu meung iy,

⁸“Hini meingtym y up ai nai ngai hai u nabaly pahen parai naimy Zohar i chapo Ephron teng y,

⁹ni i peang nai taki mang i khaileaung Makapela angawm kai teng jo ai nai deng pi kyh. Vang thui nai ryrei kai teng y jo ai nai takeng pi u kyh,” napi.

¹⁰Ephron py mychi Hiti chengchi hawi vanrei, leu arum nai meingtym mary apai pa-kho y ateh teang nai ne; huni meingtym y awm achu nai khumi bawibawichi i ka-thai y,

¹¹ni my, “Tangai rai ba, areng awi, Tapiu hawi khaileaung py nang ai kang pei mang. Nangmy i aju ai up ai nai hi y awm nai kaimy i amjychi i mei ka-niu y kang pei mang,” napi.

¹²Na i py Abraham ly Hiti chengchi i mo y lu meung naimy,

¹³Ephron teng y khumi bawibawichi i ka-thai y my, “Pahen parai naimy kai i thui nai tangai rai ba; hini khaileaung ly kaimy van ai. Hini meingtym y kaimy i aju ai up ai nai deaungkho y vang talam pi kyh,” napi.

¹⁴Ephron i pathang nai ly “Areng awi, tangai rai ba,

¹⁵huni khaileaung meingtym ly tangka chungvai palyhrei teng khyh nai ne; ani sala y ati thui bi ai mo? Hu y nang i aju ai up phai up teu ba,” napi.

¹⁶Abraham ly Ephron my mipuichi i ka-thai y thui nai tangka chungvai palyhrei pei ai nai ngai i, ka-pai sa naichi i kaji neh nai kamta neh iy pei pi bo.

¹⁷Ephron i peang nai Mamre mary nisi mang i Makapela y awm nai khaileaung hawi huni theung i tapiu py, dengkeaungchi py Abraham i lawm ai nai,

¹⁸apai pa-kho y leu arum naichi i mei ka-niu y Abraham teng y au bo.

¹⁹Naibaly Abraham my aju Sarah i veu ai ly Kanan pri i khaileaung tapiu angawmra y up bo.

²⁰Hunai deaungkho y Hiti chengchi i khaileaung py, angawm py, Abraham i peang nai tapreaung lawm nai ne.