Read Khumi Chin ATITI AWM ANGCHEI NAI 24 Bible Online

ATITI AWM ANGCHEI NAI 24 - Khumi Chin bible

ATITI AWM ANGCHEI NAI 24

¹Abraham ly khri pa-rei miteaung cheang bo; ARENG my ni i sa nai cheaungkhangra y amtheaung hai nai ne.

²Ni ly mymy i yhmtheaung kry nai keung miseaung lu ai palau i, “Nang i kiu kai i phai anui y thawi iy vaineng abeu.

³Nang ly kai i chapo i vui aju ly Kanan chengchi theung y hau y leang, nanai kani hawi khaileaung palum nai keung ARENG Tameuh i amyn y vaineng abeu.

⁴Kai ai tapen nai pri y kai i misochi theung i nai kai i chapo Isaka i vui aju hau pi ai nai nang chei ai nai tla,” napi.

⁵Na i py miseaung my, “Anglo ly mychi yhm i dengdairei hini pri y abang ai nai ngai y lawh baly, nang jeu nai pri mang y nang i chapo ai kahawi ai nai tla ai a?” nanai deng.

⁶Abraham my, “Kai i chapo ai huni pri y hawi ai nai dawn moh!

⁷Kani pri mang i ARENG Tameuh ly kai i ampo hawi amjo amnauchi awm nai pri i dengdairei kai ai ang pahawi iy, kai i khumichi ai hini pri pei ai, nanai kai teng y adeu yb bo. Nang ly kai i chapo i vui aju hau nai nga hai ai nai, mymy ly kani pri amtaw thau nai ai huni pri y pato pi yb ai.

⁸Huni anglo my nang hawi abang ai nai ngai y lawh baly nang i vaineng abeu nai lawi bo mang. Na i py ati py ne sy, huni pri y kai i chapo ai hawi ai nai ly nang dawn moh,” napi.

⁹Naibaly miseaung ly Abraham i phai anui y kiu thawi i, Abraham i leu pei nai kamta sa ai nai vaineng abeu bo.

¹⁰Abraham i yhmtheaung kry nai keung miseaung lu ly yhmkeung Abraham teng i kula-iu horei la iy, Mesopotamia pri tosyh Nahora awm nai mary mang y chei bo.

¹¹Ni ly huni meingtym y tym nai khala, mary angam mang i tuikan ahawi y kula-iuchi ai ambeu hai tliu bo. Huni neng ly kani ka-reu, mary theung i neampachychi tui deu nai neng ne.

¹²Ni ly “Kai i yhmkeung Abraham i ARENG Tameuh, kai i areng teng y nang i leu adeu nai kamta vaini kai ai eaung hai kyh ba.

¹³Kai ly mary theung i anglochi tui deu nai hini tuikan sahawi y tym bo.

¹⁴Kaimy nichi theung i leaungrei teng y, ‘Pahen parai naimy nang i tui kacheangra i tui nei ai nai pei kyh,’ kanapi ai. Huni anglo my, ‘Nei bei, nang i kula-iuchi i vui py tui kang deu pi ai’ nanai thui lawh baly, huni anglo ly nangmy i miseaung Isaka i vui nangmy vawi pi yb nai ne sy. Kai i takeng nai kamta ne lawh baly, kai i yhmkeung teng y nangmy leu adeu pi khyp nai kamta sa, nanai kai pany pajau ai,” nanai chiu sa bo.

¹⁵Ni ly chiu sa nai pajau khyp nai khala y, anglo Rebeka ly tui kacheang tapawm naimy tym ryp bo. Huni anglo ly Abraham i amnau Nahora i aju Milaka i tapen nai Bethuela i chaniu ne.

¹⁶Huni neampachy ly khri pa-rei mo hawi parai nai anglo ne; mymy ly tuikan y tui deu ai nai satla. Kacheang y tui kawi baly vawi kalau teang bo.

¹⁷Miseaung ly avum ai nai chei kaliki iy, “Pahen parai naimy nang i tui kacheangra i tui nei kyh rai si,” napi.

¹⁸Anglo my, “Areng awi, nei bei,” napi i paleang tleaung i tui kacheang ly pala kaliki iy kiu hawi amkhaw pi i nei hai bo.

¹⁹Nei pajau nai bo y anglo my, “Nang i kula-iuchi tui bym pa-rei nei ai nai kaimy tui deu pi ai” napi.

²⁰Anglo ly tui kacheangra i tui ai tawnbawichi tui nei nai eukura y lai pi iy, Kula-iuchi tui nei nai bym pa-rei tuikanra i tui deu pi kaliki bo.

²¹Huni miseaung py ARENG my ni i kangai eaung hai ai mo, eaung hai y ai mo, nanai ajeng nai ne.

²²Anglo ly tui deu pajau bo nabaly huni khumi my vang teng parai nai muku kano ly ni i notareang y amcho hai iy, muku ka-si nyhrei py kiu y amchiu hai bo.

²³Huni bo y mymy ly “Nang i ampo amyn ami mo, nanai thui pi kyh; Vai dym kai hawi kai i khumichi anga ai nai meingtym awm a?” nanai deng.

²⁴Neampachy my, “Kai i ampo ly Nahora hawi Milaka i chapo Bethuela ne,”

²⁵“Kaichi i yhm y tawnbawichi i vui chohphi hawi acha kajeichi py awm, hu y nang i vui angara meingtym py awm,” napi.

²⁶Naibaly huni khumi ly kheukhu di naimy ARENG ai chiu bo.

²⁷“Kai i areng teng y adeu nai leu ai ka-ym awm hai nai keung, kai i areng Abraham i ARENG Tameuh ai ly palo nai awm sy. ARENG ly kai i areng i misochi teng y kai ai ang pahawi nai ne,” napi.

²⁸Anglo ly amhm yhm mang y angpreng i leu amti angym pa-rei thui pi.

²⁹Rebeka ly Labana napi nai ampro awm; mymy ly Abraham i miseaung awm nai tuikan mang y ampreng bo.

³⁰Labana ly tuicho teng y notareang amcho muku kano hawi muku ka-si nyhrei niu iy, huni khumi my tuicho teng y thui pi nai leu saichi py thai nai ne. Huna nai y mymy ly tuikan sahawi kula-iuchi awmra y angdo nai Abraham i miseaung teng y chei iy,

³¹“ARENG my amtheaung hai nai khumi awi, kai i yhm y jeu bei. Ati mana nai hi y angdo jo lawh mo? Kai i yhm y nang anga ai nai ka-vo sa yb bo; nang i kula-iuchi i vui py meingtym awm,” napi.

³²Hunaibaly huni khumi ly Labana i yhm y anga. Labana my vawnchi amteih hai iy kula-iuchi ai chohphi hawi acha kajeichi pacho pi. Naibaly Abraham i miseaung hawi ni i khumichi kheu asi ai nai tui la pi.

³³Nichi i vui teicha teinei sawn pi nai khala y huni khumi my, “Kai thui ai awm nai ngierei thui chum nai khala cha nei ai,” napi. Labana my, “Thui bei,” napi.

³⁴Huni khumi my, “Kai ly Abraham i miseaung ne,” nanai thui amteaung i,

³⁵“ARENG my kai i yhmkeung ai khri pa-rei amtheaung hai i, mymy ly nang chawn bo. ARENG my ni ai ly beram kanghu, mi-i kanghu, muku, tangka, miseaung neampacho neampachy, kula-iu hawi keaungngo kano kasauchi amtheaung hai nai ne.

³⁶Kai i yhmkeung i aju Sarah ly miteaung theung mang y chapo leaungrei tapen; kai i yhmkeung my, ni i yhmtheaung katui bawibawichi ly chapo ai pei pi nai ne.

³⁷Kai i yhmkeung my mymy i leu tangai ai nai kai ai vaineng abeu hai bo. Mymy ly ‘Kai i chapo i vui aju ly Kanan pri neampachychi theung i hau moh.

³⁸Kai i ampo i khumichi napi nai kai i misochi teng y chei iy, hu y kai i chapo i vui aju hau pi,’ ang napi.

³⁹Naibaly yhmkeung teng y kaimy, ‘Anglo ly kai nithun abang ai nai ngai y lawh baly mana sa ai mo?’ nanai deng.

⁴⁰Mymy i pathang nai ly ‘Kaimy leu tangai pi jojo nai ARENG my kani pri amtaw thau nai ai nang hawi vanrei pato iy, nang ai eaung naira ang pei ai; nang ly kai i chengchi napi nai kai i ampo amjo amnauchi theung y, kai i chapo i vui aju hau pi ai nai tla.

⁴¹Hinira y nangmy i vaineng lawi y ai nai lam harei awm khyh; kai i misochi teng y nang chei nai khala y mymychi ly akhi u vui lawh baly nangmy i sa nai vainengra i nang lawi ai mang,’ ang napi.

⁴²Vaini kai tuikan y tym nai kha y, ‘Kai ly kai i yhmkeung Abraham i ARENG Tameuh, kai i sa naira ai eaung naira pei kyh ba.

⁴³Vai kai ly tuikan sahawi y tym bo. Tui deu ai nai anglo tym nai khala ni teng y, ‘nang i tui kacheangra i tui nei ai nai pei kyh,’ nanai kahnei ai.

⁴⁴Ni my kai hawi kai i kula-iuchi ai tui nei ai nai pei lawh baly ni ly kai i yhmkeung chapo i vui nangmy vawi pi yb nai aju ne ai,’ nanai chiu kasa bo.

⁴⁵Kai ly chiu kasa nai pajau y kyh rai khala, Rebeka ly tui kacheang atleang naimy tui deu ai nai tuikanra ang tym ryp bo. Kaimy ni teng y, ‘Pahen parai naimy tui nei kyh si,’ kanapi.

⁴⁶Mymy ly tui kacheang pala kaliki iy, ‘Nei bei, nang i kula-iuchi i vui py tui kang deu pi ai,’ ang napi. Naibaly kai ly tui kanei, nimy kula-iuchi ai py tui panei pi.

⁴⁷Kaimy ni teng y, “Nang i ampo ly ami mo?” nanai deng. Naibaly ni ly ‘Kai i ampo ly Nahora hawi Milaka i chapo Bethuela ne,’ ang napi. Naibaly kaimy ni i kiu y muku ka-sichi amchiu hai iy, notareang y py muku kano amcho hai bo.

⁴⁸Naibaly kai ly kheukhu di naimy ARENG teng chiu kasa. Kai i yhmkeung Abraham i chapo i vui aju awm nai amjo amnauchi teng y kai ai pahawi nai keung, kai i yhmkeung i ARENG Tameuh ai kapalo nai ne.

⁴⁹Vai nangchi my kai i yhmkeung kangai sa pi pajau ai mo, so pi pajau y ai mo, nanai kapany ai nai ngai; huna khala naini kai mana sa ai mo, nanai adawn bi ai,” napi.

⁵⁰Bethuela hawi Labana nini my, “ARENG my sa pi yb nai leaungsai ne nai deaungkho y, kaini my thui ai nai aly ngai y leang bo.

⁵¹Hi y Rebeka awm; ni ai hawi jo ba. ARENG my dawn hai yb nai kamta nang yhmkeung i chapo i aju lawm ai nai hawi pajau mang,” napi.

⁵²Abraham i miseaung my huni leu thai nai khala, ni ly lu meung iy ARENG ai chiu bo.

⁵³Naibaly ni teng y syn yb nai ateaungchi hawi muku tangka, vang kateng langseaungchi, patheaung iy Rebeka teng y pei pi. Ni ly Rebeka i ampro hawi amhm ai py vang kateng langseaungchi pei pi nai ne.

⁵⁴Naibaly Abraham i miseaung hawi mymy i khumichi ly cha nei u chum baly hu y vum jei u bo. Abraham i miseaungchi ly khawn angthodyh ang thau u i miseaung lu my ly nichi teng y “Kaimy i yhmkeung teng y vawi ali teang ai bo,” napi.

⁵⁵Na i py Rebeka i ampro hawi amhm my ni teng y, “Rebeka ly kaichi hawi kani saryhrei, ti y baly kani horei awm rai sy, huni bo y abang sy,” napi.

⁵⁶Na i py nimy ly “Kai ai patawm moh. ARENG my kai i khuleaung chei nai ly eaung hai bo; kaimy i yhmkeung teng y vawi ai nai pei u jau,” napi.

⁵⁷Nichi my, “Rebeka ai palau cham rai si, mymy ly mana thui na moh,” napi.

⁵⁸Naibaly nichi ly Rebeka ai palau u i ni teng y, “Nang ly hini khumi nithun abang ai nai ngai a?” nanai deng. Mymy ly “Abang ai,” napi.

⁵⁹Naibaly nichimy Rebeka hawi kry nai keung miseaung ai, Abraham i miseaungchi hawi vanrei abang hai teang bo.

⁶⁰Naibaly nichi my, “Kaichi i tuicho ly kati pajau y nai khumi cheaungkhangchi i amhm lawm sy; Nang i kangpreangchi ly paleung ka-echi i marychi ai py eaung u sy!” nanai Rebeka ai amtheaungra pei nai ne.

⁶¹Naibaly Rebeka hawi kry nai keung miseaung ly Abraham i miseaungchi hawi vanrei abang ai nai kula-iu salo y atang u; naibaly nichi ly tako u amteaung bo.

⁶²Isaka ly “Kai ai niu nai Tameuh kangheng i tuikan” nanai daichi ka-vym y tym i, Kanan pri tokalawi mang y awm bo.

⁶³Mymy ly dym mang y amki ai nai angam y theu i, kula-iuchi tako tapai nai niu.

⁶⁴Rebeka my Isaka ai niu baly kula-iu tleaung i nai satla i,

⁶⁵mymy ly Abraham i miseaung teng y, “Achi mang y ang jeu tapai nai khumi ly ami mo?” nanai deng. Nimy ly” Kai i yhmkeung na a,” nanai pathang. Naibaly Rebeka ly nidan la i meimai atleang praw bo.

⁶⁶Miseaung my Isaka teng y, mymy i sa nai cheaungkhangchi amti pi nai ne.

⁶⁷Naibaly Isaka my Rebeka ai ly amhm Sarah awm nai kanih yhm mang y chei hai i, Rebeka ly Isaka i aju lawm bo. Isaka ly Rebeka ai khri pa-rei khrei; mymy ly amhm dei nai molam y paleung si naira i nai awmnem naira nga bo.