Read Khumi Chin ATITI AWM ANGCHEI NAI 25 Bible Online

ATITI AWM ANGCHEI NAI 25 - Khumi Chin bible

ATITI AWM ANGCHEI NAI 25

¹Abraham ly takhra neampachy leaungrei la bi, amyn ly Keturah ne.

²Huni neampachy ly Zimran, Jokson, Medan, Midian, Isbaka hawi Suahchi ai tapen.

³Jokson ly Seba hawi Dedan nini i ampo ne; Dedan i kangpreangchi ly Assurim, Letusim hawi Leummi chengchi ne.

⁴Midian i chapochi ly Epha, Epher, Hanoh, Abida hawi Eldachi ne. Hini bawibawi ly Keturah i kangpreangchi ne.

⁵Abraham i yhmtheaung awm nai bawibawi ly Isaka ai amtym hai bo;

⁶na i py mymy heng nai thym y aju takhrachi i tapen nai chapochi ai py yhmtheaung paji sei iy mymy i chapo Isaka hawi kamlo parai nai, nisi pri mang y pato pawn nai ne.

⁷Abraham ly saneng 175 rei heng i, khri pa-rei miteaung cheang nai khala y dei nai ne.

⁹Mymy i chapo Isaka hawi Ismaela nini my Makapela angawm tapiu y up hawi bo. Huni ly Hiti cheng Zohar i chapo Ephron i khaileaung Mamre mary nisi mang y awm nai khaileaung meingtym ne.

¹⁰Huni ly Abraham my Hiti chengchi teng i van nai khaileaung ne; Sarah ai up nai tapreaung y Abraham ai py up teang.

¹¹Abraham dei nai bo y, “Kai ai niu nai Tameuh kangheng i tuikan” sahawi y awm nai chapo Isaka ai Tameuh my amtheaung hai bo.

¹²Ismaela ly Sarah i miseaung Aikupta neampachy Hakari my Abraham i vui tapen pi nai chapo ne;

¹³Ismaela i chapochi ai ka-thui ka-thui tajiu ai nabaly Nebaioth, Kedar, Adbeela, Mibsam,

¹⁴Misma, Dumah, Maasa,

¹⁵Hadad, Tema, Jetura, Naphisa hawi Kedemachi ne.

¹⁶Nichi ly cheng holai nyhrei i amsi pajochi ne; mychi i awmra meingtym, avangchi py mychi i amyn pathi bo.

¹⁷Ismaela ly saneng chungvai atlo phai palyh saryhrei khala y dei.

¹⁸Ismaela i kangpreangchi ly Asuria pri mang y chei nai lam, Aikupta nisi mang i Sura mary hawi, Havila mary sala i meingtym y awm u bo. Nichi ly Abraham i takhra kangpreangchi hawi awm takhra nai ne.

¹⁹Hini ly Abraham i chapo Isaka i satang ne.

²⁰Isaka ly saneng vui palyhrei khala, Misopotamia pri y awm nai Aramean khumi Bethuela i chaniu, Labana i tuicho Rebeka ai pom nai ne.

²¹Rebeka ly deaungdi so y nai deaungkho y Isaka my ARENG teng y chiu sa. ARENG my chiu sa nai pathang pi i, Rebeka ly deaungdi aniu bo.

²²Ni i kajeu y aneng nai deaungdi ly kangphi ne. Tapen y rai khala kajeu theung y leaung leaungrei kamjau kamteang amkhi hawi. Rebeka my, “Kai teng y hina nai kamta ati mana nai ang tym lawh mo?” napi. Hunai deaungkho y mymy ly ARENG teng y deng bo.

²³ARENG my neampachy teng y, “Nang i kajeu theung y khumi cheng nyhrei awm; nang ly atiu nai khumi cheng nyhrei ai tapen ai. Leaungrei nai ly leaungrei tleaung y atho awm ai; kalen nai ly katheang teng y miseaung achei ai,” nanai thui pi

²⁴Rebeka ly tapen nai neng tym nai khala, chapo kangphi tapen bo.

²⁵Tapen man nai ly tlang pasen iy kanih mui kamta tlang verei mui sai i, mymy ai ly Esaw, nanai amyn pathi.

²⁶Pa-nyh i chapo ly Esaw i kheu pakhi y syn thleng naimy tapen; mymy ai ly Jakob, nanai amyn pathi bo. Nini ai tapen nai khala y Isaka ly saneng vui tariurei awm nai ne.

²⁷Deaungdi ni ly thawndeang cheang hawi bo; Esaw ly daichi theung y amki nai khumi, mymy ly mawi sara ne. Na i py Jakob ly paleung jypjyp chy iy yhm y awm.

²⁸Isaka ly Esaw ai khrei keh, ati mana nai mo nabaly Esaw i nga nai mawi cha nai ly hawi pany nai ne, na i py Rebeka ly Jakob ai khrei keh.

²⁹Kanirei nai khala Jakob ly prichi an theaung nai thym y, Esaw ly mawi lyn naira i tym. Mymy ly khri pa-rei kajeu alam nai deaungkho y,

³⁰Jakob teng y, “Kai kajeu alam parai, kai ai prichi an kamsen pei mai kyh,” napi. (Hunai deaungkho y mymy ai ly Edom, [29]nanai palau.)

³¹Huna nai khala Jakob my, “Nang i chapo chalu yhmtheaung amtym ai nai kai ai pei baly kang pei ai mang,” napi.

³²Naibaly Esaw ly kajeu ka-lam dei ahawhi na i, chapo chalu i yhmtheaung amtym nai ly kai i vui ati kamran awm ai mo?, nanai adawn i, “Kang pei mang!” napi.

³³Jakob my, “Nang i yhmtheaung amtym ai nai ly kai teng y au nai vaineng so man veng rai,” napi. Esaw ly vaineng sa i, mymy i chapo chalu yhmtheaung amtym ai nai ly Jakob teng y pei vui bo.

³⁴Naibaly Jakob my tako hawi prichi anbyh pei pi. Mymy ly cha nei pajau baly ang thau i tako veng bo. Esaw ly mymy i chapo chalu yhmtheaung kamtym, nanai ai ly tahm khai y nai ne.