Read Khumi Chin ATITI AWM ANGCHEI NAI 26 Bible Online

ATITI AWM ANGCHEI NAI 26 - Khumi Chin bible

ATITI AWM ANGCHEI NAI 26

¹Huni pri y jy Abraham deung y takang theu nai kamta vai py takang theu bi i, Isaka ly Philistin samrang Abimelek awm nai Kerar mary mang y chei bo.

²ARENG my Isaka teng y amteng i, “Nang ly Aikupta pri y chei moh; kaimy kang thui pi nai pri y awm.

³Vai hini pri y awm rai, kai ly nang hawi vanrei awm ai i, amtheaung hai ai. Kaimy nang hawi nang i kangpreangchi ai hini khu ka-peang bawibawi kang pei ai. Nang i ampo Abraham teng y kaimy adeu nai kamta sa pi ai.

⁴Nang i kangpreang ai kani mang i ka-si kamta peung hai iy, nichi ai hini khu ka-peang bawibawi kapei ai. Nang i kangpreangchi ai kaimy amtheaung hai nai kamta, khaileaung pri i khumi cheng cheaungkhangchi py, kai teng i amtheaung naira hnei u ai.

⁵Abraham ly kai i leu tangai iy, kai i reita hawi leu pei naichi patawm nai deaungkho y, kai ly nang ai amtheaung naira pei ai,” napi.

⁶Hunai deaungkho y Isaka ly Kerar mary y awm.

⁷Huni mary i khumichi my aju i satang deng nai khala, my i tuicho teu, nanai pathang nai ne. Ati mana nai mo nabaly Rebeka ly mo hawi parai i, huni pri i khumichi my padei lawh na, nanai jei nai deaungkho y ne.

⁸Isaka ly huni pri y awm nai kra kyh nai bo kanirei nai khala y, samrang Abimelek ly thaibeng mang angdeang i, Isaka hawi Rebeka nini amau hawi nai niu bo.

⁹Abimelek ly khumi ai pato i Isaka teng y, “Hini neampachy ly nang i aju ne khyp iy, mana nai y kai i tuicho na lawh moh,” napi. Isaka ly ni teng y, “Kaimy i aju nabaly kai ai padei lawh na, nanai kadawn nai ne,” napi.

¹⁰Abimelek my, “Nang ly kaichi i tlang tleaung y, hina nai kamta mana nai sa lawh mo? Kai i khumi leaung leaungrei my, nang i aju hawi i ahawi lawh teu i khyly, kaichi i tlang tleaung y kamngo tym hai nai na a,” napi.

¹¹Abimelek my, “Khumi ami py ne sy, hini khumi ai py, mymy i aju ai py ana nai khumi ly dei takengkei ai nai tla,” nanai leu pei bo.

¹²Isaka ly huni pri y hlau sa i ARENG my amtheaung hai nai deaungkho y huni saneng naimy amti amjang phy chungvairei pakym ai nai nga.

¹³Ni ly amtheaungra nga veangveang i khumi kanang lawm bo.

¹⁴Ni ly miseaungchi py, beramchi py, sichi py neangneang awm nai deaungkho y Philistin khumichi my paleung no bo.

¹⁵Hunai deaungkho y nichi my ampo Abraham heng nai thym y ampo i miseaungchi tai nai tuikanchi py taphum pi pawn.

¹⁶Naibaly Abimelek my Isaka teng y, “Nang ly kai tleaung y sa thai naira awm bo; hunai deaungkho y kaichi pri i nai theu vui jau,” napi.

¹⁷Naibaly Isaka ly hu i dengdairei theu iy, Kerar leaunghawi mang y asyh i hu y awm daw nai ne.

¹⁸Abraham deung y tai nai tukanchi ly mymy dei nai bo y Philistin khumichi my taphum pi pawn nai ne. Isaka my tuikanchi tai ali teang iy, ampo my amyn pathi nai kamta pathi bawibawi teang.

¹⁹Isaka i miseaungchi ly huni leaunghawira y tuikan kangtha tai i tui nga.

²⁰Kerar i khumi beram typ nai keungchi my Isaka i beram typ nai keungchi teng y, “Hini tuikan ly kaichi i ne,” nanai angen iy Isaka i beram typ nai keungchi hawi a-ei u. Hunai deaungkho y Isaka my huni tuikan ai ly “Ka-jo tuikan” nanai amyn pathi bo.

²¹Isaka i miseaungchi ly tuikan harei tai takhra bi: huni py ka-jo theu bi i, huni tuikan ai, “Paleung y ym-jo nai tuikan,” nanai amyn pathi nai ne.

²²Mymy ly hu i nai asyh vui iy tuikan harei tai bi; hu y ly a-ei nai by y leang bo; hunai deaungkho y huni tuikan ai ly “Tlamsa naira,” nanai amyn pathi. Mymy ly “ARENG my hini pri y tlamsa naimy awm ai nai ang pei bo i, hini meingtym y achi ly nang chawn u ai,” napi.

²³Naibaly Isaka ly hu i nai theu i, Beraseba mang y asyh bo.

²⁴Huni vum y ARENG ly ni teng y amteng i, “Kai ly ngampo Abraham i Tameuh ne, mawn moh; kai ly nang hawi vanrei awm ai. Kai i miseaung Abraham teng y leu adeu nai kamta ly nang i kangpreangchi peung hai ai mang, nang ai py amtheaung hai ai,” napi.

²⁵Isaka ly huni meingtym y maicham sa i ARENG ai chiu bo. Naibaly mymy ly hu y tai sa i awm; ni i miseaungchi my tuikan takhra tai pi bi nai ne.

²⁶Abimelek ly tau pei nai keung Ahuzatha, tavailu Phikol nini hawi vanrei Kerar mary i dengdairei Isaka hawi avum ai nai chei u bo.

²⁷Naibaly Isaka my, “Vaichi khala nangchi ly kai ai niu ngai y i, kai ai patheu chum nai bo y kai teng y ati sa ai nai jeu u nai mo?” napi.

²⁸Nichi my, “ARENG ly nang hawi vanrei awm, nanai kaichi pany bo; achi sala ka-ly sa ai nai hawi, nanai kaichi dawn; hunai deaungkho y kaichi ly nang ai leu adeu hai ai nai ngai;

²⁹kaichi my nang ai ka-jo hau y naimy nangchi ai pahen nai y, awmnem naimy theu hai nai kamta, nang py kaichi ai ka-jo hau y leang mang, nanai leu adeu ba. ARENG ly nang ai amtheaung hai ai, nanai ly hawihai amny bo,” napi.

³⁰Isaka my nichi i vui pawi sa pi i, nichi ly cha nei u.

³¹Khawn angthodyh neng y nichi leaung leaungrei ly pajawp typ nai ka-ma-ra hawi leu vaineng asa u. Isaka my leu kahawi pavum i, ahawi kamrawi lawn naimy amprei u bo.

³²Huni kani y Isaka i miseaungchi ly jeu i, mychi i tai nai tuikan satang amti pi. Nichi my, “Kaichi ly tui avum bo,” napi.

³³Ni ly huni tuikan ai “Vaineng tuikan,” nanai amyn pathi bo. Huni mary ai ly vaini khrairei Beraseba mary, nanai palau nai ne.

³⁴Esaw saneng vui palyhrei awm nai khala ly Hiti cheng theung i anglo leaung nyhrei, Beri i chaniu Juditha hawi, Elon i chaniu Basemath nini ai pom bo.

³⁵Nichi ly Isaka hawi Rebeka nini ai khri pa-rei paleung bi hai nai ne.