Read Khumi Chin ATITI AWM ANGCHEI NAI 27 Bible Online

ATITI AWM ANGCHEI NAI 27 - Khumi Chin bible

ATITI AWM ANGCHEI NAI 27

¹Isaka ly miteaung cheang i mei niu y bo. Mymy ly chapo kalen Esaw ai, “Deang awi!” nanai palau i, Esaw my, “Kai hi y awm,” napi.

²Huna nai khala Isaka my, “Nang i niu nai kamta kai ly miteaung cheang bo i dei ai nai py kasa bo.

³Nang i thailiho lo ly daichi theung chei iy kai i vui daichi mawi hau pi.

⁴Kai i kangai mawi theaung iy kai teng y jeu hai. Kai cha pajau nai bo y kaimy dei y rai khala, nang ai amtheaung hai ai,” napi.

⁵Isaka i Esaw ai thui pi nai leu ly Rebeka my thai nai ne. Esaw mawi lyn ai nai chei vui nai sala y,

⁶Rebeka ly Jakob teng y, “Ngampo my Esaw teng y,

⁷‘Mawi lyn ly theaung iy kai teng y jeu hai; kaimy cha chum nai bo y kai dei y rai khala, ARENG i mo y nang ai amtheaung hai ai,’ nanai thui pi nai kathai.

⁸Vai ly deang awi, kai i leu tangai iy kai i thui nai kamta so.

⁹Mi-i kanghu theung y chei ly veung hawi nai amai nyhrei patiu iy, ngampo kakhrei kaimy theaung pi ai.

¹⁰Ngampo cha ai nai nangmy tha pi; naibaly mymy dei y rai kha y nang ai amtheaung hai ai mang,” napi.

¹¹Na i py Jakob ly amhm teng y, “Nangmy pany nai kamta jai Esaw ly tlang mui nawi parai, kai ly mui by y.

¹²Ngaai my kai ai patham lawh nai khala y, kai i tapawp nai pany baly kai ly amtheaung naira nga ai nai tleaung y ang pasawi lawh ai,” napi.

¹³Amhm my, “Deang awi, amsawi ly kai teng y lawi teu sy; deang awi, kai i thui nai kamta so phai so, mi-i nyhrei kai teng jeu hai,” napi.

¹⁴Naibaly mymy ly mi-i patiu i amhm teng y pei pi iy, amhm my ampo i kangai theaung pi bo.

¹⁵Naibaly amhm my yhm y khai nai Esaw i baichu la i Jakob ai amchiu hai.

¹⁶Amhm my kiu ban hawi mui by y nai kaneaungra mi-i peih hawi bam pi.

¹⁷Naibaly mawi an hawi tako paawp nai py Jakob teng y pei pi.

¹⁸Naibaly Jakob ly ampo teng y chei iy, “Ngaai awi!” nanai palau. Ampo my, “Deang awi, kai hi y awm napi iy, “Nang ly chapo kalen a, katheang a?” napi.

¹⁹Jakob my, “Kai ly nang i chapo kalen Esaw ne; ngaai nangmy thui pi nai kamta sa pi nai pajau bo. Angthau ly kai i sawn pi nai mawi an cha chum baly kai ai amtheaung naira pei ba,” napi.

²⁰Isaka my,” Mana nga kasa na mo? deang awi,” napi. Jakob my, “Nang i ARENG Tameuh my kai ai nga hai kasa nai ne,” nanai pathang.

²¹Huna nai khala Isaka my Jakob teng y, “Nang ly Esaw ne khyp a? Kaimy nang ai kang patham cham ai i, kai sahawi y athui,” napi.

²²Jakob ly ampo teng y athui i ampo my patham chum baly, “Nang i raawi ly Jakob i raawi, na i py kiu ban ly Esaw i kiu ban ne,” napi.

²³Mymy ly Jakob nanai pany pajau y, Esaw kamta Jakob i kiu ban y mui awm teang nai y ne. Amtheaung naira pei y rai khala ampo my,

²⁴“Nang ly Esaw ne khyp a?” nanai deng teang bi. Jakob my, “Ne na a,” nanai pathang taleang bi.

²⁵Naibaly Isaka my, “Mawi an jeu hai, cha chum baly kaimy amtheaung hai ai,” napi. Jakob ly mawi an sawn pi, kreip hang py pei pi.

²⁶Naibaly ampo my mymy teng y, “Deang awi, kai teng y athui, kai ai pachawm,” napi.

²⁷Mymy ly athui i tangbeng y pachawm bo; Isaka ly mymy i baichu kamui pany, naibaly mymy ai amtheaung hai i mymy ly “Kai i chapo i mui ly ARENG my amtheaungra pei nai lira i kamui kamta mui amseaung bo.

²⁸Tameuh my nang ai kani mang i dengdairei kadam tla hai iy, nang i lichi py khaileaung kahawi lawn sy; mymy ly nang ai amti amjang hawi kreip hang neangneang pei sy.

²⁹Pri bawibawichi ly nang teng y lu meung iy miseaungchi lawm u sy. Cheng cheaungkhangchi ly nang i mo y lu meung u sy. Nang ly amjo amnauchi ai peang sy. Nang i amhm kangpreangchi ly nang ai lu meung u sy. Nang ai pasawi nai khumi ai ly amsawi lawi teang sy. Nang ai amtheaung hai nai khumichi ly amtheaungra ngo teang sy,” napi.

³⁰Jakob ly ampo Isaka my amtheaung hai chum nai, ampo teng i nai leh veng baly, kra y naimy amjo Esaw py mawi lynra i nai tym ryp bo.

³¹Ni py ampo i kangai mawi an theaung iy ampo teng y tha pi. Mymy ly “Ngaai awi, ang thau ly kaimy sawn pi nai mawi an cho ba; cha nei chum baly kai ai amtheaung naira pei ba,” napi.

³²Isaka my, “Nang ly ami mo?” napi. Esaw my, “Kai ly nang i chapo kalen Esaw ne,” nanai pathang.

³³Huna nai khala Isaka ly tlang ahyn thlyhthlyh naimy, “Nang tym y rai khala mawi nga iy kai teng y syn pi nai khumi ly ami mo? Nang tym y rai khala kai ly mawi an cha chum veng bo. Huni khumi teng py amtheaungra kapei chum veng bo. Kaimy amtheaung naira pei nai kamta, ni ly nga veng bo,” napi.

³⁴Esaw ly huni leu thai baly vo hang naimy ampo teng y, “Ngaai awi, nang i amtheaung naira kai ai py pei tanga kyh!” nanai takeng.

³⁵Isaka my, “Nang i ngamnau my ang tapawp iy, nimy nang i amtheaungra ang la pi veng bo,” napi.

³⁶Esaw my, “Ni ly Jakob, nanai amyn ka-pu kai ai tlen pa-nyh ang tapawp nai bo. [30] Ni ly kai i chapo chalu tlenrei, vai kai i nga ai nai amtheaungra py tlenrei la vui bi bo. Kai i vui amtheaung naira pipi by y na bo a?” napi.

³⁷Isaka my, “Kai ly ni teng y nang ai peang nai keung y lawm hai veng bo. Amjo amnau bawibawichi ai py, ni i miseaung lawm hai veng bo. Ni ai amti amjang hawi kreip hangchi nang hai veng bo! Vai ly “Deang awi, nang i vui kang pei ai nai kai ati sai py kang so hai thai y leang bo,” napi.

³⁸Esaw my ampo teng y, “Ngaai, nang teng y amtheaung naira harei py by y na bo a? Ngaai awi, kai ai py amtheaungra pei kyh,” nanai ampo teng y vo naimy takeng veangveang nai ne.

³⁹Hunaibaly Isaka my, “Nang i vui kani mang dengdairei kadam tlo hai y ai; nang i vui khaileaung py hawi y ai.

⁴⁰Nang ly akei hawi kalop sa iy heng ai; na i py ngamnau teng y miseaung achei ai. Na i py nang ly atho sa baly ngamnau my peang naira i law tleaung ai,” napi.

⁴¹Jakob ly ampo teng i amtheaung naira nga vui nai deaungkho y, Esaw ly amnau ai paleung ka-e khai bo. Esaw ly “Ngaai dei phai dei baly Jakob ai kaimy tleh vui ai,” nanai adawn nai ne.

⁴²Na i py Rebeka my Esaw i dawn yb nai ly pany i Jakob teng y, “Tangai rai, ngamjo Esaw my nang ai padei ai nai ka-vo dawn yb bo.

⁴³Deang awi, vai kaimy kang thui pi nai kamta so. Vaimy Haran pri y awm nai kai i ampro Labana teng y preang ai nai so yb.

⁴⁴Ngamjo kado theu nai rym pa-rei, Labana teng y awm daw rai.

⁴⁵Mymy ly nang i sa naichi tami pawn nai bo y, nang ai la hai ai nai khumi kang pato ai. Kani khurei y my mana kai i chapo leaung nyhrei chau mei ai mo?” napi.

⁴⁶Rebeka my Isaka teng y, “Kai ly Esaw i la nai cheng takhra ajuchi molam y khri pa-rei paleung phra na bo. Jakob py Hiti cheng theung i anglo leaung leaungrei ai pom lawh baly, kai i vui ly dei ai nai awm khyh bo,” napi.