Read Khumi Chin ATITI AWM ANGCHEI NAI 29 Bible Online

ATITI AWM ANGCHEI NAI 29 - Khumi Chin bible

ATITI AWM ANGCHEI NAI 29

¹Jakob ly nisi pri mang y tako veangveang nai ne.

²Huni pri y tym nai khala beram kanghu phy thomrei ambeu taki lum nai tuikan harei niu ryp bo. Huna nai takilum nai ly beram kanghuchi ai huni tuikan i tui panei reng nai deaungkho y ne. Huni tuikan ai ly lengseaung pui hawi tleang khup bo.

³Beram kanghuchi ly hu y tym nai tleirei beram typ nai keungchi ly lengseaung pui kasyh vui iy beramchi ai tui panei nai ne. Tui panei pajau bo nabaly nichi ly lengseaung pui ai hu y kasyh ali teang reng.

⁴Jakob my beram typ nai keungchi teng y, “Kai i ahawichi awi, nangchi ly ma i jeu u nai mo?” nanai deng. Nichi my, “Haran mary i dengdairei jeu u nai ne,” napi.

⁵Mymy ly nichi teng y, “Nahora i katu Labana ai pany u a?” nanai deng. Nichi my, “Kaichi pany na a,” nanai pathang u.

⁶Jakob my nichi teng y, “Mymy ly noso hawi a?” nanai deng. Nichi my, “Hawi na a, khen cham, mymy i chaniu Rakeli ly beram kanghuchi hawi hi y ang jeu dudu bo,” napi.

⁷Jakob my nichi teng y, “Kani awm mang rai, beramchi ai py pangym ai nai neng ny y rai be; tui panei iy ati mana nai beramchi ai patlai u y lawh mo?” napi.

⁸Huna nai khala nichi my, “Kaichi huna nai ly so thai y; beram kanghu bawibawichi hini meingtym y tym angym iy lengseaung pui kasyh vui khala naini, beram kanghuchi ai tui panei thai khyh,” napi.

⁹Jakob ly nichi hawi leu arum nai thym khala, Rakeli ly beram kanghuchi hawi tym bo.

¹⁰Jakob ly Rakeli ai ampu Labana i beram kanghu hawi tym nai niu nai khala, ni ly tuikan sahawi y chei tapai i, lengseaung pui kasyh vui iy beramchi ai tui panei pi.

¹¹Naibaly Jakob ly Rekeli ai pachawm iy, mymy ly amo theu naimy vo bo.

¹²Mymy ly ni teng y, “Kai ly ngampo i tuicho Rebeka i chapo ne,” napi. Rekeli ly angpreng iy ampo teng y amti pi;

¹³naibaly mymy ly tuicho i chapo Jakob i satang thai nai kha y avum ai nai chei praw i takawi iy pachawm bo; naibaly yhm mang y vawi hai i, Jakob my Labana teng y mymy i satang angym pa-rei amti pi nai ne.

¹⁴Labana my, “Ne, nang ly kai i thi ngan kamji kypkyp ne,” napi. Naibaly Jakob ly hu y lo jeungrei awm bo.

¹⁵Labana my Jakob teng y, “Nang ly kai i miso ne nai deaungkho y jawm naimy kalop kang so hai y leang. Nang ly vang majirei kang pei baly ngai ai mo?” napi.

¹⁶Labana ly chaniu leaung nyhrei awm; Kalen ly Leah ne i, katheang ly Rakeli ne.

¹⁷Leah i meichi ly khrei ai nai hawi parai; na i py Rakeli ly mo py hawi, tlang apheung py hawi iy khen apu parai nai ne.

¹⁸Jakob ly Rakeli ai khrei nai deaungkho y ni ly “Kai hawi Rakeli ai apom hai ai nabaly, kai ly nang teng y saneng saryhrei kalop sa ai,” napi.

¹⁹Labana my, “Khumi takhrachi teng y deaung paseng nai tleaung y ly nang teng y kang pei nai ly hawi keh nai ne. Hi y kai hawi vanrei phai awm,” napi.

²⁰Jakob ly Rakeli ai nga ai nai molam y saneng saryhrei kalop sa bo; naibaly mymy i vui ly khrei phi nai y, kani py neng py tanareichy apany khyh nai ne.

²¹Naibaly Jakob my Labana teng y, “Neng tym bo i, nang i chaniu hawi apom ai nai pei ba,” napi.

²²Hunaibaly Labana my khumichi ai palau achu i apom nai pawi sa pi bo.

²³Na i py huni vum y, Rakeli i jeng y Leah ai Jakob teng y tha i, Jakob ly Leah hawi i ahawi nai ne.

²⁴(Labana ly chaniu Leah ai kry ai nai miseaung nu Zilpah ai pei.)

²⁵Khawn mang y Jakob my mymy i aju ly Leah ne lawh nai pany i Labana teng y chei iy, “Hina nai kamta mana sa lawh mo? Rakeli ai nga ai nai i vui y kalop kang sa pi nai ne. Ati mana nai kai ai tapawp lawh mo?” napi.

²⁶Labana my, “Hi i reita ly chaniu kalen ai deaung paseng man y naimy, chaniu katheang ai deaung paseng man vai y.

²⁷Nang ly kai i kalop saneng saryhrei sa pi bi ai nabaly, apom pawi bo y kani saryhrei ajeng rai; huni bo baly Rakeli ai kang pei ai mang,” napi.

²⁸Jakob py ngai nai ne i, apom nai pawi bo y kani saryhrei tym baly Labana my chaniu Rakeli ai Jakob i aju lawm ai nai pei bo.

²⁹(Labana ly chaniu Rakeli ai kry ai nai miseaung nu Bilaha ai pei.)

³⁰Naibaly Jakob ly Rakeli hawi i ahawi nai ne; mymy ly Leah tleaung y Rakeli ai khrei keh, tamen py tamen keh nai ne. Naibaly mymy ly Labana i kalop saneng saryhrei sa pi bi bo.

³¹Jakob ly Rakeli y tanrei Leah ai tamen y nai sai ARENG my pany i Leah ai chanau sa ai nai ka-vo sa pi, na i py Rakeli ai ly teng hai bo.

³²Leah ly deaungdi aniu i chapo tapen. Mymy ly “ARENG my kai i patang nai ang niu i, vai ly kai ai py kai i juvo my tamen teang ai,” nanai thui i, huni chapo ai Ruben,[33] nanai amyn pathi bo.

³³Leah ly deaungdi aniu bi i chapo tapen bi; mymy ly “ARENG my chapo ang pei bi bo; kai ai juvo my tamen nai ny y, nanai ARENG my ang pany pi nai bo,” napi. Hunai deaungkho y huni chapo ai Semeon,[34] nanai amyn pathi nai ne.

³⁴Ni ly deaungdi aniu bi i chapo tapen bi. Mymy naimy, “Vai ly kai i juvo my kai ai hawihai ang khaw hai ai bo, mymy i vui chapo leaung thomrei katapen pi bo,” napi. Hunai deaungkho y amyn ly Levi,[35] nanai amyn pathi bo.

³⁵Mymy ly deaungdi aniu taleang bi i, neampacho tapen taleang bi: mymy ly hini tlenrei nai ly ARENG ai kapalo ai,” napi. Hunai deaungkho y Juda,[36] nanai amyn pathi nai ne. Naibaly mymy ly chanau tapen nai ly anawn bo.