Read Khumi Chin ATITI AWM ANGCHEI NAI 30 Bible Online

ATITI AWM ANGCHEI NAI 30 - Khumi Chin bible

ATITI AWM ANGCHEI NAI 30

¹Na i py Rakeli ly Jakob i vui cho chanau leaungrei py tapen pi y nai deaungkho y mymy ly amjo ai paleung hawi y nai khai i Jakob teng y, “Kai ly cho chanau ngo y baly kadei ai,” napi.

²Huna nai khala Jakob ly Rakeli ai kado theu hai i, “Kai ly Tameuh lawh sai a? Mymy leaungrei naini nang ai deaungdi tapen hai pajau khyh nai ne,” napi.

³Rakeli my, “Hi y kai i miseaung nu Bilaha awm, ni hawi phai i ahawi ly deaungdi nga baly, ni i saho y kai ly amhm leaungrei lawm ai,” napi.

⁴Naibaly ni ly miseaung nu Bilaha ai Jakob teng y au i, Jakob ly Bilaha hawi i ahawi bo.

⁵Naibaly Bilaha ly deaungdi aniu i Jakob i vui chapo tapen pi nai ne.

⁶Rakeli ly “Tameuh my kai i vui tara chih pi bo. Mymy ly kai i chiu sa nai pathang pi i kai ai chapo ang pei nai bo,” nanai thui. Hunai deaungkho y ni ly huni deaungdi ai Dan,[37] nanai amyn pathi nai ne.

⁷Bilaha ly deaungdi aniu bi i Jakob i vui pa-nyh chapo tapen pi bi bo.

⁸Huna nai khala Rakeli my, “Kai ly kaimy i amjo hawi atiu nai ly kaimy kapajau vui bo,” nanai thui. Hunai deaungkho y ni ly huni deaungdi ai Naphtali,[38] nanai amyn pathi nai ne.

⁹Leah py deaungdi so y vui nai apany nai khala, mymy ly miseaung nu Zilpah ai Jakob teng y aju palawn ai nai au bo.

¹⁰Naibaly Zilpah my Jakob i vui chapo leaungrei tapen pi.

¹¹Leah my, “Kai ly hawi naira nga bo,” nanai thui. Hunai deaungkho y huni deaungdi ai Kad,[39] nanai amyn pathi nai ne.

¹²Zilpah my Jakob i vui chapo leaungrei tapen pi bi i,

¹³Leah ly “Kai ai amo theu hai bo, neampachychi my kai ai taham hawi nai neampachy, nanai ang palau u ai,” nanai thui. Hunai deaungkho y huni deaungdi ai Aser,[40] nanai amyn pathi bo.

¹⁴Hlau cho tyn nai neng, Ruben ly hlau y chei nai khala, Khuma athai [41]niu i amhm Leah i vui syn pi bo. Rakeli my Leah teng y, “Pahen parai naimy nang i chapo my syn pi nai khuma athai pei mai kyh,” napi.

¹⁵Leah my, “Nang ly kai i juvo ai nang my la vui nai ly paleung anyp y rai sai a? Vai py kai i chapo my syn pi nai Khuma athaichi paleungno bi lawh ly” napi. Rakeli my, “Nang i chapo my syn pi nai Khuma athaichi pei baly, nang vai dym Jakob hawi i ahawi teu,” napi.

¹⁶Jakob ly dym mang y hlau i nai vawi khala, Leah my lamchung i ni my, “Kai i chapo my syn pi nai khuma athai ly Rakeli ai kapei veng nai deaungkho y, vai dym ly kai hawi i ahawi ai nai tla,” napi i, huni vum Jakob ly Leah hawi i ahawi bo.

¹⁷Tameuh my Leah i chiu sa nai pathang pi nai deaungkho y mymy ly deaungdi aniu i pa-ngo chapo leaungrei tapen pi bi bo.

¹⁸Naibaly Leah my, “Kai i miseaung nu ai kaimy i juvo teng y i ai nai kapei nai deaungkho y, Tameuh my kai ai kawn vang ang pei nai bo,” nanai thui. Hunai deaungkho y huni deaungdi ai Isakhar,[42] nanai amyn pathi nai ne.

¹⁹Leah ly deaungdi aniu bi i, tariu nai chapo tapen pi bi bo.

²⁰Naibaly Leah ly “Tameuh my kai ai langseaung kahawi ang pei nai ne. Juvo i vui kaimy chapo leaung tariurei katapen pi nai deaungkho y mymy ly kai ai paleung bie jojo ai,” nanai thui. Hunai deaungkho y huni deaungdi ai Zebulun,[43] nanai amyn pathi bo.

²¹Kangkhym kangtem y ly chaniu Dinah ai tapen nai ne.

²²Naibaly Tameuh my Rakeli ai pany pi nai deaungkho y, ni i chiu sa nai pathang pi i, deaungdi sa ai nai ka-vo dawn pi bo.

²³Mymy ly deaungdi aniu i chapo leaungrei tapen pi. Rakeli ly “Tameuh my kai ai chapo pei nai deaungkho y, amichi my kai ai cheh nai ly tama hai vui bo.

²⁴ARENG my kai ai chapo pei bi sy,” nanai thui. Hunai deaungkho y huni deaungdi ai Josepha,[44] nanai amyn pathi nai ne.

²⁵Josepha ai tapen nai bo y, Jakob ly Labana teng y, “Kaimy i yhm mang y vawi ai nai kai ai pei kyh.

²⁶Kai ly hi i nai theu ai bo i, nang teng y kalop sa naira y nga naichi hawi cho chanauchi py, ajuchi ai py kai hawi abang ai nai pei kyh; kai i kalop sa nai saichi py nangmy pany yb nai teu bo,” napi.

²⁷Huna nai khala Labana ly mymy teng y, “Kaimy kang thui pi ai; nang i saho y ARENG my kai ai amtheaung hai, nanai kang pany pi bo.

²⁸Nang i ngai nai vang thui ba, kang pei ai,” napi.

²⁹Jakob my, “Kai ly nang i vui kalop mana kang sa pi mo, nanai py, kai my kang kry pi nai saho y nang i tawnbawichi mana tanrei peung mo, nanai py, nang pany nai teu bo.

³⁰Kai tym y rai khala nang i tawnbawichi ly maidenreichy khyh, vai ly neangneang peung bo. Kai i saho y ARENG ly nang ai amtheaung naira ang pei nai ne. Vai kai ly kaimy i dengtheungchi i vui nang chawn ai nai molam kalop sa ai nai neng tym bo,” napi

³¹Labana ly “Nang ai vang majirei kang pei ai mo?” napi. Jakob my, “Kai ly vang ngai y leang. Hini leu kang thui pi nai ngai baly nang i beramchi kaimy kang kry pi bi ai.

³²Vaini kai ly tawnbawi kanghuchi theung y amki iy khen ai. Hunichi theung y beram kamnum hawi apreupra nai mi-ichi ai la ai. Hunichi ly kai i vui ne sy.

³³Vai mo mang y kai i hawi nai sai py nang niu ai mang. Nangmy kai i vang nga naichi ai khen teang nai khala, kai i nga nai mi-ichi theung y apreupra nai ny y naichi, beramchi theung y kamnum ny y naichi niu lawh baly huni ly paviu nai bo, nanai nang pany pajau,” napi.

³⁴Labana my, “Ngai mang, nang i thui nai kamta so sina,” napi.

³⁵Na i py huni kani y Labana ly mi-i nu kariurachi, mi-i katai apreupra naichi hawi beram kamnumchi khai takhra iy mymy i chapochi teng y kry ai nai au bo.

³⁶Naibaly Jakob hawi kani thomrei ka-tengra y awm hai vui bo. Jakob ly ampu Labana i awm nai beramchi ai hawihai kry pi nai ne.

³⁷Jakob ly maicha keung, Baden keung hawi po kalang keung changpi kanghengchi la iy o-pangen i ki lei baly, kangleung hawi ariurala nai ne.

³⁸Mymy ly hunichi ai beramchi, mi-ichi i tui nei nai euku sahawi y khai pi. Ati mana nai mo nabaly beram hawi mi-ichi ly tui nei ai nai chei khala, po achiu reng nai y hunai kamta khai pi nai ne.

³⁹Naibaly mi-ichi ly huni dengkeaung changpi kariura mo y tym baly po achyh i po nga, tapen baly kariura naichi tapen bo.

⁴⁰Jakob ly beramchi hawi mi-ichi khai takhra iy, Labana i beram kanghu, mi-i kanghu theung i nai kamnum hawi ariura naichi mo y mymy i beramchi hawi mi-ichi ai mo atha hai bo. Hunaibaly Jakob mymy i beram hawi mi-ichi ly peung ryh peung ryh nai y, Labana i tawnbawichi theung i nai mymy i tawnbawichi ai khai takhra bo.

⁴¹Jakob ly veung hawi nai beram kanghuchi hawi mi-i kanghuchi ai tui neira euku mo y huni dengkeaung changpi ariura naichi khai pi nai ne; naibaly tawnbawichi ly huni dengkeaung changpi ariura nai sala y po ahui u i po nga bo.

⁴²Na i py mymy ly atho di nai tawnbawichi i mo y ly khai pi y leang. Naibaly atho di nai tawnbawichi ly Labana i ne; mymy i tawnbawichi ly khri pa-rei veung hawi parai tlai naichi ne.

⁴³Huna nai deaungkho y Jakob ly yhmtheaung katui nawi ryh nawi ryh i, mymy ly tawnbawi kanghuchi, miseaungchi, kula-iuchi hawi keaungngo kano kasauchi py neangneang awm bo.