Read Khumi Chin ATITI AWM ANGCHEI NAI 33 Bible Online

ATITI AWM ANGCHEI NAI 33 - Khumi Chin bible

ATITI AWM ANGCHEI NAI 33

¹Esaw ly khumi leaung chungvai palyhreichi hawi jeu nai Jakob my niu baly, cho chanauchi ai phy nyhrei taprei iy Rakeli, Leah hawi nini i miseaung nu leaung nyhrei teng y au bo.

²Mymy ly aju katheang ni hawi chanauchi ai ka-man y tako hai iy, sala y Leah hawi chanauchi, kangkhym y Rakeli hawi Josepha ai tako hai nai ne.

³Jakob ly nichi i mo mang y tako man iy tlen saryhrei lu meung nai bo y amjo sahawi y ahihawi bo.

⁴Na i py Esaw ly ampreng kaliki iy, Jakob ai takawi naimy pachawm bo. Nini ly khri pa-rei vo hawi nai ne.

⁵Esaw ly khen aki prei i, neampachychi hawi deaungdichi ai niu baly, “Nang hawi vanrei abawi nai hini khumichi ly amichi mo?” nanai deng. Jakob my, “Jai awi, hinichi ly Tameuh my ang pei nai kai i chanauchi ne,” napi.

⁶Naibaly aju katheangni hawi chanauchi ly athui u tapai iy lu meung u:

⁷Huni bo y Leah hawi chanauchi athui u iy, kangkhym y ly Josepha hawi Rakeli athui hawi i lu meung u bo.

⁸Esaw my, “Lam y kai i avum nai tawnbawi kanghuchi ly mana nai mo? Ati mana sa ai naichi mo? nanai deng. Jakob my, “Hunichi ly nang teng y meimai kang sa nai na a,” napi.

⁹Na i py Esaw my, “Be awi, kai py awm mangmang teang na a; nangmy phai lo teang teu,” napi.

¹⁰Jakob ly “Ny y leang, pahen parai naimy kai meimai kanga ai nai huni kai i langseaungchi ly lo pi kyh. Nang ly kai ai paleung kahawi my lamchung bo. Nang i meimai niu nai ly Tameuh ai niu nai kamta ne.

¹¹Pahen parai naimy kai kang pei nai langseaungchi ai talam pi kyh ba. Tameuh my kai i ngai nai ngiereichi py ang pei nai ne,” napi. Jakob my ly talam tanga ai nai pa-rei parawi nai ne i, Esaw ly langseaungchi talam pi bo.

¹²Naibaly Esaw my, “Choh, tako hawi jau sina. Nang i mo y kai tako ai,” napi.

¹³Jakob my ly “Nang i niu nai kamta deaungdichi ly theangtlai rai i, tawnbawichi hawi chochi ai py kadawn hai: nichi ai kani khengrei tako hai baly kanghu verei dei be ai.

¹⁴Pahen parai naimy mo mang y tako man teu ba. Nang i awm nai Edom pri y tym pa-rei deaungdichi, tawnbawichi hawi kang tako u rysyp ai mang,” napi.

¹⁵Naibaly Esaw my, “Kai i khumi phyrei nang teng y kang khai pi ai,” napi. Na i py Jakob my, “Nang teng y meimai kanga ai naini kang takeng nai teu; hunichi ly ngai y leang bo,” napi.

¹⁶Naibaly huni kani y my, Esaw ly Edom pri mang y vawi ali teang bo.

¹⁷Na i py Jakob ly Sokkoth mang y chei iy, mymy i vui yhm sa, tawnbawichi i vui py haichi sa pi. Huni meingtym ai ly Sokkoth, napi.[51]

¹⁸Jakob ly Mesopotamia pri i dengdairei vawi ali teang nai Kanan pri Sekhem mary y chymme naimy tym bo; naibaly mymy ly mary sahawi y tai sa iy awm nai ne.

¹⁹Ni ly huni meingtym ai Sekhem i ampo Hamora i kangpreangchi teng i tangkacho chungvairei hawi van bo.

²⁰Ni ly hu y maicham sa i El, nanai amyn pathi. Huni ly Israelachi i Tameuh, nanai sai ne.