Read Khumi Chin ATITI AWM ANGCHEI NAI 34 Bible Online

ATITI AWM ANGCHEI NAI 34 - Khumi Chin bible

ATITI AWM ANGCHEI NAI 34

¹Kanirei nai khala y, Jakob hawi Leah i chaniu Dinah ly Kanan cheng neampachychi teng y pavai nai ne.

²Huni ka-peang i areng, Hivit khumi Hamor i chapo Sekhem my niu i mymy ai ly patiu rang iy pajang bo.

³Na i py ni ly neampachy ai khrei ryp i, mymy mang y paleung apei thai ai nai parawi.

⁴Naibaly ly Sekhem ly ampo teng y, “Kai ly Dinah ai aju palawn ai nai ngai i deng pi kyh,” napi.

⁵Jakob ly mymy i chaniu ai, anglo tahm taphra nai satang thai i py, mymy i chapochi ly tawnbawi kanghuchi ai sui tlaira i vawi u y rai nai deaungkho y, ati sai py katheu y naimy awm bo.

⁶Sekhem i ampo Hamor ly Jakob hawi arum ai nai chei;

⁷hunai thym khala y Jakob i chapochi ly huni satang thai i, daichi i nai tym u bo. Jakob i chapochi ly mychi i tuicho ai pajang nai ly Israela cheng verei ai tahm khai y nai ne i, so ngau y nai sa lawh nai deaungkho y, paleung no-ei i khri pa-rei kado theu u bo.

⁸Hamor my nichi teng y, “Kai i chapo Sekhem ly nang i chaniu ai khrei nai ne i, pahen parai naimy apom hai kyh.

⁹Nang i khumichi hawi kai i khumichi apom leungtang thai ai nai py, ka-dyh ka-dawi leu sumneang so u sina.

¹⁰Naibaly nangchi ly hini pri y kaichi hawi vanrei awm u; nangmychi i ngai nai meingtym y awm u; nangmychi ngai nai kamta ka-sum ka-pai so u; yhmtheaung katuichi py amtym u,” napi.

¹¹Naibaly Sekhem my Dinah i ampo hawi amprochi teng y, “Kai i katamanglai pahen u kyh, nangchi i hnei nai ryrei kang pei ai mang;

¹²Nangchi ati langseaungchi ngai mo, kai teng y thui u; anglo vang py nangchi ngai nai ryrei thui teu; anglo ai kai teng y deaung paseng baly, nangchi i hnei nai ryrei kang pei khyp ai mang,” napi.

¹³Jakob i chapochi ly Sekhem my nichi i tuicho Dinah ai taphra nai hawi kangji khai nai deaungkho y Sekhem hawi ampo Hamor ai tapawp hyp iy pathang u bo.

¹⁴Nichi my, “Kaichi ly lengkhym takip y nai khumi teng y kaichi i tuicho ai deaung paseng ngau y leang; deaung paseng lawh baly kaichi tahm anem ai.

¹⁵Neampacho bawibawichi ly kaichi kamta lengkhym takip u ai nabaly nangchi teng y kaichi ngai hai mang;

¹⁶Naibaly ala leungtang ai nai py, kaichi ngai mang. Nangchi theung y awm iy cheng harei lawm ai nai hawi bomrei lawm ai nai ngai mang.

¹⁷Na i py nangchi my kaichi i hnei nai akhi iy lengkhym takip ai nai ngai u y lawh baly, kaichi ly kaimychi i tuicho ai la teang ai i, nangchi teng i nai katheu u ai,” napi.

¹⁸Huni reita hareichy patawm ai nai molam y ly Hamor hawi chapo Sekhem ly ngai hawi nai ne;

¹⁹Sekhem ly mymychi cheng theung y tahm awm nai ne. Jakob i chaniu ai khrei phi nai deaungkho y nichi i leu ai ly akhi y naimy ngai ryp bo.

²⁰Hamor hawi chapo Sekhem ly mary apai pa-kho leu arum nai meingtym y chei hawi iy mary theung i khumi mipuichi teng y amti pi nai ly

²¹“Huni khumichi ly khri pa-rei ahawi hawi parai; achi i pri y achi hawi vanrei awm u sy, ka-pai py so u sy. Nichi i chaniuchi ai py pom u sina; nichi teng y achi i chaniuchi ai py deaung paseng u teang sina.

²²Na i py nichi i lengkhym takip nai kamta, achi neampacho ngierei ly lengkhym takip baly, cheng harei kamta achi hawi bomrei awm ai nai nichi ly ngai nai ne.

²³Nichi ai achi hawi vanrei awm hai ai nai ngai baly, nichi i tawnbawichi hawi yhmtheaung katuichi py achi i ne y a? Hunai deaungkho y nichi ly achi hawi vanrei awm thai ai nai achi ngai u sina,” napi.

²⁴Hamor hawi Sekhem my thui nai leu ly mary verei i khumichi my ngai hai bawibawi, neampacho ngiereichi ly lengkhym takip u bo.

²⁵Naibaly khumichi ly lengkhym takip nai kani thomrei bo baly khri pa-rei no u nai ne. Hunai thym khala Jakob i chapo, Dinah i ampro Levi hawi Simeon ly haisau syn naimy mary theung y tlenrei my kun hawi i, neampacho ngierei ai ly tleh chauchau nai ne.

²⁶Nini ly Hamor hawi chapo Sekhem ai py tleh vui iy, Dinah ai ly Sekhem yhm theung i nai la hawi iy yhm y vawi hai vui bo.

²⁷Huna nai kamta padei pajau nai bo y, Jakob i takhra chapochi py mychi i tuicho ai taphra nai hawi kangji pei nai molam y, mary theung kun u i vawitheung tha u nai ly

²⁸tawnbawi kanghuchi, si kanghuchi, keaungngo kano kasau kanghuchi, mary theung y py, mary angam mang y py awm nai cheaungkhangchi ai lawm pi pawn nai ne.

²⁹Mary theung y awm nai khumichi i vang kateng vawnsai ngiereichi, neampachy deaungdi bawibawichi, yhm ang theung i vawnsai bawibawichi py la pi pawn nai ne.

³⁰Huna nai khala Jakob my, Levi hawi Simeon teng y,” Nangni ly kai ai paleung mawnra tym hai bi bo; vai ly hini pri i Kanan cheng hawi Perizi chengchi ly kai ai niu ngai u y ai bo. Kai teng y khumi maidenreichy awm khyh; nichi ly khumi akachu iy, kai ai ang tiu baly achi dengtheung bawibawi ly dei be ai bo,” napi.

³¹Na i py nichi my, “Kaichi i tuicho ai bima palawn ai nai kaichi ngai hai y nai ne,” napi.