Read Khumi Chin ATITI AWM ANGCHEI NAI 37 Bible Online

ATITI AWM ANGCHEI NAI 37 - Khumi Chin bible

ATITI AWM ANGCHEI NAI 37

¹Jakob ly ampo i awm nai meingtym Kanan pri y awm jojo.

²Hinichi ly Jakob i dengtheungchi i satang ne. Josepha ly saneng holai saryhrei awm nai khala y, ampo i aju miseaung nu Zilpah hawi Bilaha nini i chapochi hawi vanrei beramchi, mi-ichi typ nai ne. Mymy ly amjochi i sa nai sai hawi y naichi ampo teng y amti pi reng.

³Jakob my Josepha ai ly chapo bawibawichi theung y khrei keh nai ne; ati mana nai mo nabaly miteaung khala y mymy ai tapen nai deaungkho y ne. Mymy ly Josepha i vui apu parai nai baichu kangjiu [56] aneng pi takhra bo.

⁴Ampo my Josepha ai nichi tleaung y khrei keh nai y, ni i amjochi ly ni i tlang tleaung y niu ngai y i, leu kahawi py arum hai u vai y.

⁵Vumrei nai ly Josepha amang theu i amjochi teng y amti pi; hunai y nichi ly niu ngai y tleaung y niu ngai y ra bo.

⁶Mymy ly nichi teng y, “Kai i amang theu nai tangai u rai.

⁷Achi bawibawi ly hlau y chei i cho kawm taeang nai ne; kai i chohkawm ly atlymra i nai kataw angdo mesare iy, nangchi i chohkawmchi ly kai i chokawm ai taki teungtareung naimy chiu u bo,” napi.

⁸Amjochi my, “Nang ly nangmy ai kaichi i tlang tleaung y peang nai keung samrang lawm ai, nanai dawn nai sai a?” napi u. Amjochi ly mymy i amang molam y py, mymy ai niu ngai y tleaung y niu ngai y ra bo.

⁹Naibaly Josepha ly amang theu taleang bi i, amjochi teng y, “Kai ly amang theu taleang bi bo; amang mang y kanito py, lo py, ka-si holai hareichi py kai ai chiu u nai ne,” napi.

¹⁰Mymy ly ampo teng y amang thui pi i ampo my, “Nang i amang ly ati mana nai mo? Ngamhm hawi kai py, ngamjo ngamnauchi py nang ai chiu ai, nanai sai a?” napi nai preng.

¹¹Josepha ai ly amjochi my niu ngai y ra bo; na i py ampo my huni amang niu nai ly paleung theung y pateung me jo.

¹²Kanirei nai khala y Josepha i amjochi ly ampo i tawnbawi kanghuchi typ ai nai Sekhem mary mang y chei u bo.

¹³Jakob my Josepha teng y, “Ngamjochi tawnbawi kanghu typ nai Sekhem mary mang y chei,” napi. Josepha my, “Chei ai mang,” napi.

¹⁴Ampo my, “Chei ly ngamjochi py, tawnbawichi py mana awm mo khen cham; kai teng y amti thui pi ali teang,” napi. Hunaibaly Josepha ly ampo my pato nai kamta Hebron leaunghawi dengdairei chei i, Sekhem mary y tym bo.

¹⁵Daichi theung y amki nai thym khala khumi leaungrei my niu i, “Nang ly ati hau nai mo?” napi.

¹⁶Ni my, “Tawnbawi kanghu typ nai kaimy i amjochi ai hau nai ne; nichi ly ma y awm mo, kai ai thui pi pajau a?” napi.

¹⁷Huni khumi my, “Nichi ly hi i nai theu u veng bo. Dothan mary mang y chei u ai, nanai thui u nai kathai,” napi. Naibaly Josepha ly amjochi ai hui i Dothan mary y nichi ai avum bo.

¹⁸Nichi teng tym y rai khala y, kamlo mang dengdairei mymy ai niu u; hunai thym khala y nichi ly mymy ai padei vui ai nai arum u nai ne.

¹⁹Nichi leaung leaungrei adeng u, “Khen cham amang sara ang jeu bo;

²⁰Jeu u, ni ai padei u veng sina; mymy i veu ai ly tui by y nai tuikanchi theung i ha harei theung y aphi u vui sina. Achi ly mymy ai daichi mawi my kei vui bo, nanai thui ai. Naibaly mymy i amang ly kachah mo, kachah y mo, nanai achi pany pajau ai,” napi.

²¹Ruben ly nichi i arum nai thai i, Josepha ai atleu ai nai atho sa bo. Mymy ly “Ni ai padei u moh;

²²hini daichi ka-vym theung y awm nai tuikan theung y palo u sina; ni ai ly no pei u moh sina,” napi. Mymy ly Josepha ai atleu ai ngai nai hawi ampo teng y pato ali teang ai ngai nai deaungkho y hina nai thui nai ne.

²³Josepha ly amjochi teng y tym nai khala y, amjochi my ni i baichu kangjiu ai ly leng vui bo. [57]

²⁴Naibaly ni ai patiu u i, tui by y nai tuikan theung y pala u bo.

²⁵Nichi ly biu cha u nai thym y, rimiu cheaungkhang hawi Murachi kula-iu tleaung y tang naimy Kilead pri dengdairei Aikupta pri mang y khuleaung chei nai Ismaela cheng kamkawm harei ai niu u nai ne.

²⁶Juda my amjochi teng y, “Achi ly amychi i amnau ai tleh vui iy pheaung y pa-rei apha phyh teu i py ati kamran awm ai mo?

²⁷Ni ly achi hawi thi ngan kamji kypkyp ne i, mymy ai no pei y naimy Ismaela chengchi teng y phai jo u veng sina,” napi. Amjochi my py ngai u bawibawi bo;

²⁸naibaly Midian khumi ka-pai sa nai keungchi ly huni mang tako u prei i, amjochi my Josepha ai ly tuikan theung i atheu kalau teang iy Ismaela cheng khumichi teng y tangka chang apomrei hawi jo u veng bo. Naibaly nichi my Josepha ai ly Aikupta pri mang y hawi u jo nai ne.

²⁹Ruben ly tuikan theung y khen ali teang i, Josepha by y vui nai y paleung si nai mymy i baichu sei vui na bo.

³⁰Naibaly amnauchi teng y chei ali teang i, “Deaungdi ly tuikan theung y by y veng lawh be! Kai mana sa ai mo?” napi.

³¹Naibaly nichi ly mi-i harei tleh iy Josepha i baichu ai mi-i thi theung y pani u.

³²Nichi ly baichu syn i ampo teng y, “Hini kaichi my niu nai baichu ly ngaai nangmy chapo i ne a?” napi u.

³³Ampo ly huni baichu ai ma i, “Ne, hini ly kai i chapo baichu ne na a! Kai i chapo ai ly daichi mawi kasichi my kei piupa iy padei veng nai bo hi ly!” napi.

³⁴Jakob ly paleung si nai mymy i baichu sei piupa iy, paisiu amchiu bo. Mymy ly chapo i vui y paleung si nai kra parai pa-rei vo tangam na bo.

³⁵Mymy i chapo chaniu leilachi my py khri pa-rei parawi, na i py mymy ly nichi i parawi nai leu ai tangai pi y i, “Kaimy i chapo i vui y paleung si vo tangam nai hawimy kai ly dei iy tavau kho y ka-vum ai,” napi. Hunai deaungkho y mymy ly chapo Josepha i vui y paleung si paleung mawn jojo nai ne.

³⁶Hunai thym khala Midian khumichi ly Josepha ai Aikupta pri i Potiphar teng y jo vui bo: Potiphar ly samrang ai typ nai keung tavailu leaungrei ne.