Read Khumi Chin ATITI AWM ANGCHEI NAI 38 Bible Online

ATITI AWM ANGCHEI NAI 38 - Khumi Chin bible

ATITI AWM ANGCHEI NAI 38

¹Huni neng khala y Juda ly amjo amnauchi ai khai su iy, Adulam pri i khumi Hirah napi nai teng y awm ai nai chei bo.

²Hu y Juda ly Shua napi nai khumi i chaniu Kanan cheng anglo ai avum i mymy ly ni hawi apom nai ne.

³Naibaly aju ly Era napi nai chapo leaungrei sa.

⁴Huni bo y deaungdi aniu bi i Onan napi nai chapo leaungrei ai tapen bi.

⁵Huni bo y Selah napi nai chapo leaungrei ai tapen taleang bi. Huni chapo ai tapen nai thym y Juda ly Akhazi mary y awm nai ne.

⁶Juda ly chapo chalu Era ai Tamar napi nai neampachy hawi apom hai bo.

⁷Era ly ARENG i mei ka-niu y hawi y naira sa nai deaungkho y ARENG my niu ngai y i padei vui nai ne.

⁸Naibaly Juda my Era i amnau Onan ai, “Nang ly ngamjo i yhmtheaung amtym ai nai keung ne nai deaungkho y, nang i sa ai avo naichi ly angym pa-rei so; hunai baly ngamjo i kangpreangchi peung ai mang,” napi.

⁹Na i py Onan ly mymy hawi nga nai deaungdi ly mymy i vui ne y ai nanai pany, hunai deaungkho y mymy ly amjo i aju hawi i ahawi teu i py taheaung tui ai ly angam mang y paleaung vui bo. Hunai kamta amjo i vui chanauchi ngo y pa-rei sa nai ne.

¹⁰Onan ly ARENG i kangai so y nai deaungkho y, ni ai ly ARENG my ngai y i, ni ai py deung dawi hai vui bo.

¹¹Huna nai khala Juda ly lengngo Tamar teng y, “Kai i chapo Selah thawndeang cheang y ryrei ly ngampo teng y vawi ali teang iy hu y lumai ateaung jo rai,” napi. Ati mana nai mo nabaly amjochi kamta Selah py deung dawi teang lawh na, nanai jei hai nai deaungkho y ne. Naibaly Tamar ly ampo i yhm y vawi ali teang bo.

¹²Huni bo kani kra y naimy Juda i aju ly dei bo. Mymy ly paleung si nai rym nai neng y, mymy i ahawi Adulam cheng Hirah hawi my i beramchi ai mui vau ai nai Timnah mary y chei hawi bo.

¹³Khumi leaungrei my Tamar teng y, ngamprang ly mymy i beram mui vau ai nai Timnah mary mang y chei jo, nanai amti pi.

¹⁴Naibaly mymy ly lumai ateaung nai ateaungchi aleng vui iy meimai y nidan amym naimy Enaim mary apai pa-khora y ateh; huni ly Timnah mang y chei nai lam y awm nai mary ne. Mymy ly Juda i chapo katheang keh Selah thawndeang cheang i py mymy hawi apom hai y ai, nanai pany nai deaungkho y hunai kamta sa nai ne.

¹⁵Juda ly ni ai niu nai khala y bima, nanai palawn; ati mana nai mo nabaly mymy ly meimai amym vui i ma y nai ne.

¹⁶Juda ly lamteng y ateh nai neampachy teng y chei tapai iy, “Ani i ahawi sina; nang ly vang majirei hnei ai mo?” napi. (Mymy ly lengngo, nanai pany y nai ne.) Neampachy my, “Nang ly kai ai ati pei ai mo?” napi.

¹⁷Juda ly “Kaimy i tawnbawi kanghu theung i mi-i cho harei kang pei ai,” napi. Neampachy my, “Hawi mang, nang i pei nai mi-i cho tym y ryrei ly leu khaw hai ai nai kai ai sai sairei pei ai nai tla ai,” napi.

¹⁸Juda my, “Kaimy leu khaw hai ai nai, ati kang pei ai mo?” nanai deng. Neampachy my ly “Nang i atawi nai cheaungvawi, vuinawn ang vawi, pajawp typ nai ka-ma-ra phai pei,” napi. Mymy ly neampachy teng y pei pi bo. Naibaly i ahawi i neampachy ly deaungdi aniu nai ne.

¹⁹Tamar ly yhm y vawi ali i mei y atleang nai nidan ly alei vui iy, lumai ateaung baichuchi amchiu ali teang bo.

²⁰Juda ly mymy i ahawi Hirah ai mi-i cho la hai iy neampachy teng y khamcha khai nai vawnchi ly la teang iy, vawi teang ai nai pato nai ne; na i py Hirah ly huni neampachy ai hau keaung bo.

²¹Mymy ly Enaim mary i khumichi teng y, “Lam teng y ateh reng nai bima ly ma y mo?” nanai deng. Nichi my, “Hini lam y bima, nanai ly by y leang,” nanai pathang u.

²²Mymy ly Juda teng y vawi ali teang i, “Kai ly huni neampachy ai hau keaung bo. Hu i khumichi py, huni meingtym y bima by vai y leang ang napi,” napi.

²³Juda ly “Kai i vawn kry phai kry jo teu sy. Khumichi my panui hai na. Kai ly ni ai vang pei pi ai nai atho sa teu i py, nang ly ni hawi avum pajau y bo,” napi.

²⁴Lo thomrei awm nai khala y khumi leaungrei my Juda teng y, “Nang i lengngo Tamar ly bima kamta amlawn nai y, mymy ly vai deaungdi aniu lawh bo, nanai amti pi. Juda my, “Tuni neampachy ai ly angam mang y patheu iy mai y patawi veng,” nanai leu pei.

²⁵Tamar ai angam mang y patheu u nai khala y, Tamar my amprang teng y, “Khen cham, hini pajawp typ nai ka-ma-ra hawi, vui nawn ang vawi py, cheaungvawi py ami i nai mo? Hini khumi my kai ai deaungdi aniu hai nai ne,” napi.

²⁶Juda ly mymy i vawn ai ma i, “Hini neampachy i thui nai ly teng khyp bo. Kai naini kaimy i chapo Selah hawi apom hai ai nai leu adeu nai taphra nai keung ne lawh bo,” napi. Naibaly Juda ly huni neampachy hawi i ahawi bi y leang bo.

²⁷Huni neampachy ly tapen ai nai neng tym nai khala y, mymy ly deaungdi kangphi tapen ai nai amny bo.

²⁸Tapen nai thym y, deaungdi leaungrei ly kiu theu man; tapen hai nai keung my amkhaw praw iy kalang kamleng akhen hai i, “Hini tapen man ai,” napi.

²⁹Na i py deaungdicho ly kiu ajiu teang vui; kamphira i leaungrei naini theu man lawh. Naibaly tapen hai nai keung my, “Nang ly hina nai kamta kamjau kamteang theu lawh moh!” napi. Hunai deaungkho y ni ai ly Perez, nanai amyn pathi bo. [58]

³⁰Naibaly amnau py kiu y khen pi nai kalang kamleng hawi my tapen; huna nai y ni ai ly Zerah, nanai amyn pathi bo. [59]