Read Khumi Chin ATITI AWM ANGCHEI NAI 39 Bible Online

ATITI AWM ANGCHEI NAI 39 - Khumi Chin bible

ATITI AWM ANGCHEI NAI 39

¹Vai ly Ismaela khumichi my Josepha ai Aikupta pri mang y hawi jo iy samrang i yhm y typ nai keung tavailu Potiphar teng y jo u bo.

²ARENG my Josepha ai awm hai nai deaungkho y, ni i dawn naira tleirei y eaung hai jojo. Ni ly my i yhmkeung Aikupta khumi i yhm y awm bo.

³ARENG my Josepha teng y awm hai nai deaungkho y mymy i kalop sa nai tleirei y eaung naira nga nai niu bo.

⁴Potiphar my khri pa-rei khrei nai y, mymy i kalop sa pi ai nai miseaung lu y khai bo; hunai deaungkho y mymy i yhmtheaung katuichi hawi mymy i yhm y kry ai nai Josepha teng y au nai ne.

⁵Huna khala i ka-so ARENG my Josepha i saho y, huni Aikupta khumi i yhm dengtheung ai py, ni i kalop hawi li hlau kalopchi ai py amtheaung hai bo.

⁶Potiphar ly Josepha teng y ati cheaungkhangchi kry ai nai au chum nai bo i, my i cha nei nai kahm ny y baly, mymy ly ati sai py dawn bi y leang bo; Josepha ly tleungtlang apheung hawi iy mo hawi parai nai thawndeang leaungrei ne.

⁷Hunaibaly yhmkeung i aju my Josepha ai ly khrei tahau nai deaungkho y, i ahawi ai nai parawi bo.

⁸Josepha ly ngai y i, “Khen cham, kai i areng ly cheaungkhangra y kai ai ym nai ne. Mymy ly kai awm nai deaungkho y yhm i atitichi ly dawn ai nai aly by y.

⁹Yhmkeung my mymy i awm nai yhmtheaung katui ngiereichi kai teng y ang au nai ne. Mymy ly nang leaungrei ai ny y baly, kai teng y au y nai ati sai py by y; huna nai y Tameuh ngai y nai kamngo ly kai mana kasa lawh ai mo?” napi.

¹⁰Yhmkeung nu my kani tleirei parawi teu i py, Josepha ly akhi jojo nai ne.

¹¹Na i py kanirei nai khala y, yhm y miseaungchi leaungrei py by y nai neng khala, Josepha ly mymy i kalop sa ai nai yhm y kun bo.

¹²Yhmkeung nu ly Josepha i baichu kangjiu ai amkhaw cheng iy, “Choh, kai hawi i ahawi sina,” napi. Na i py Josepha ly yhmkeung nu i kiu y baichu kangjiu atli su iy angpreng veng nai ne.

¹³Yhmkeung nu ly baichu kangjiu ai mymy i kiu y atli su iy angam mang y angpreng veng nai niu baly,

¹⁴miseaungchi ai palau iy, “Hi y khen u cham! Hini Hebrai khumi, kai i juvo my hawi nai my ly kaichi ai khumi aniu y nai sa lawh. Mymy ly kai i takun y ang kun iy kai ai pajang ai nai tau lawh: na i py kai athorei my kahang nai ne.

¹⁵Ni ly kaimy aeu nai deaungkho y angam mang y angpreng i, mymy i baichu kangjiu ly kai i sahawi y khai su bo,” napi.

¹⁶Yhmkeung Potiphar yhm y tym y ryrei ly yhmkeung nu my baichu kangjiu ai ly kry veangveang bo.

¹⁷Yhmkeung tym nai khala neampachy my, “Nang i hawi nai Hebrai miseaungcho ly kai i takun theung y kun iy kai ai pajang ai nai tau lawh.

¹⁸Na i py kaimy hang nai deaungkho y angpreng veng i, baichu kangjiu ai ly kai sahawi y khai su bo,” nanai amti pi.

¹⁹Yhmkeung ly Josepha i tlang tleaung y khri pa-rei kado theu i,

²⁰Josepha ai patiu iy samrang i kado theu hai nai khumichi ai paeung nai theung y paeung jo bo.

²¹Na i py ARENG my Josepha ai awm hai nai deaungkho y amtheaung hai; naibaly theaung kry nai keung teng y mymy ly meimai kahawi nga nai ne.

²²Theaung kry nai keung my ly theaung tla naichi ai py, theaung theung i kalop cheaungkhangchi sa ai nai py, Josepha teng y au bebe.

²³Theaung kry nai keung ly Josepha teng y kalop au nai bo y, mymy ly sai py dawn ai nai ngai bi y leang bo; ati mana nai mo nabaly ARENG my Josepha ai awm hai nai deaungkho y, mymy i sa nai tleirei y eaung naira nga hai nai ne.