Read Khumi Chin ATITI AWM ANGCHEI NAI 40 Bible Online

ATITI AWM ANGCHEI NAI 40 - Khumi Chin bible

ATITI AWM ANGCHEI NAI 40

¹Neng kra kyh nai bo y Aikupta pri i samrang ai kreip athai hang talam pi nai keung hawi, biu an amsi pi nai keung nini ai ly samrang my kado theu hai bo.

²Samrang ly nini i tlang tleaung khri pa-rei kado theu nai ne.

³Naibaly nini ai ly Josepha ai paeung naira theaung typ nai keung tavailu i yhm y khai bo.

⁴Tavailu my nini ai kry ai nai Josepha teng y au i, nichi ly krarawm pa-rei theaung tla u nai ne.

⁵Vumrei nai khala y kreip athai hang talam pi nai keung hawi biu an amsi pi nai keung nini ly amang theu hawi mei bo; nini i amang ly awm nai sai takhra akyhkyh nai ne.

⁶Khutawi baly Josepha my nini teng y chei i, nini ai meimai takhuisui naimy awm hawi akyhkyh nai niu.

⁷Josepha my nini teng y, “Nangni ly vaini ati mana nai takuisui lawh mo?” nanai deng.

⁸Nini my, “Kaini ly amang amang akyhkyh nai ne; na i py amang thui pi pachai pajau nai keung leaungrei py by y,” napi. Josepha my, “Tameuh my naini amang thui pachai pajau ai nai chengra pei pajau khyh, nangni i amang kai teng y thui pi cham,” napi.

⁹Huna nai khala kreip athai hang talam pi nai keung ly “Kai i amang mang y, kai i mo y kreip angjyn keung awm;

¹⁰huni kreip keung ly changpi thomrei awm nai ne. Kra y nai sala y ngamchi hawi pauchi theu; athaichi py athai i myn bo.

¹¹Kai ly samrang i khau syn iy, kreip athaichi kajaw, khau theung y api iy samrang teng y katalam pi bo,” napi.

¹²Josepha my, “Tuni changpi thomrei, nanai ly kani thomrei nanai sai ne.

¹³Kani thomrei kani y samrang my nang ai ang palau ai i ang pahen ai; nang ai kalop ang pei ali teang ai i, nangmy i sa reng nai kreip athai hang khau talam nai kalopra y nga teang ai mang.

¹⁴Nang i vui khym taham hawi nai neng tym nai kha y kai ai pany jo ba; samrang teng y kai i satang amti pi iy, hini theaung i nai lawi ai nai sabawm ba.

¹⁵Kai ai Hebrai chengchi i pri i nai atho y my ang pahawi vui iy, hini Aikupta pri y kai ly theaung tla ai nai pa-rei tamang naira so y pui naimy theaung tla lawh nai ne,” napi.

¹⁶Naibaly biu an amsi pi nai keung ly kreip athai hang khau talam pi nai keung i amang awm nai sai hawi nai pany i, Josepha teng y, “Kai py amang amang teang nai ne; kai ly kaimy i lu tleaung y tako takhu thomrei atleang bo.

¹⁷Salo keh i takhura y ly samrang cha ai nai theaung angchi tako cheaungkhangchi awm; tavochi my huni takhu theung i takochi cha pi pawn,” napi.

¹⁸Josepha my, “Tuni takhu thomrei, nanai ly kani thomrei nanai sai ne.

¹⁹Kani thomrei kani y samrang my nang ai ang palau iy nang i lu tameang hai vui ai; nang i tlang ai ly dengkeaung tleaung y bang hau ai i, tavochi my nang i ngan ang cha ai,” napi.

²⁰Naibaly Kani thomrei kani y samrang ly mymy i tapen nai neng alyp nai kani y, mymy i miseaungchi i vui pawi kalen sa bo; mymy ly kreip athai hang khau talam pi nai keung hawi biu an amsi pi nai keung nini ai theaung i nai palawi iy, mipuichi i mo y tym hai bo.

²¹Samrang ly kreip athai hang talam pi nai keung ai ly mymy i sa reng nai angchei i kalop au teang.

²²Na i py biu an amsi pi nai keung ai ly padei hai vui bo. Huni bawibawi ly Josepha my thui pi nai kamta teng khyp nai ne.

²³Na i py kreip athai hang talam pi nai keung my ly Josepha ai dawn y i, tami veng nai ne.