Read Khumi Chin ATITI AWM ANGCHEI NAI 41 Bible Online

ATITI AWM ANGCHEI NAI 41 - Khumi Chin bible

ATITI AWM ANGCHEI NAI 41

¹Naibaly saneng nyhrei bo y, Aikupta pri i samrang ly amang theu; ni ly amang mang y Naing tavo peang y angdo nai thym khala,

²veung hawi iy suiriu tlai na nai si nu saryhrei ly tavo theung i nai lyn kalau iy achachi cha nai ne.

³Huni bo y veung jei nai si nu saryhreichi py tavo theung i nai ang lyn kalau teang; nichi ly angchei i si veung kahawichi sahawi tavo peang y angdo u tliu bo.

⁴Naibaly si nu veung kajeichi my, si nu veung kahawichi ai cha krai vui nai ne. Naibaly samrang ly i anglaw bo.

⁵Mymy ly aseaung nai i taleang bi i, amang py takhra amang theu taleang bi nai ne. Amang mang y choh keung hareira i nai choh vui myn kahawi saryhrei theu.

⁶Huni bo y khutaha meingtymra ali kabi aho nai deaungkho y ta y nai choh vui saryhrei py theu bi.

⁷Naibaly choh vui ta y naichi my choh vui kahawichi ai pajawn pawn nai niu bo. Samrang ly i anglaw baly amang theu nai teu, nanai apany nai ne.

⁸Khawn khutawi nai khala, samrang ly paleung mawn parai i, Aikupta pri y awm nai atam kakawpchi hawi khumi kacheng bawibawichi ai palau hai bo. Samrang ly mymy i amang amang naichi, huni khumichi teng y thui pi, na i py ami py thui pi pachai thai y.

⁹Huna nai khala kreip athai hang talam pi nai keung ly samrang teng y, “Kai ly nang teng y amti pi ai nai sairei dawnhi nai molam y pahen kyh ba.

¹⁰Nang ly biu an amsi pi nai keung hawi kai ai kado theu hai nai deaungkho y, kaini ai samrang i tamcheaung typ nai tavailu i yhm y theaung pala bo.

¹¹Vumrei nai khala y kaini ly amang amang mei nai tla; amang i awm nai sai ly takhra akyhkyh nai ne.

¹²Samrang i tamcheaung tavailu i miseaung Hebrai thawndeang leaungrei kaini hawi vanrei awm. Kaini my amang thui pi i, ni my thui pi pachai nai ne.

¹³Ni i thui pi pachai nai kamta teng khyp nai ne; nangmy kai ai ly kaimy i kalop au teang; na i py biu an amsi pi nai keung ai ly nangmy padei veng bo,” napi.

¹⁴Samrang ly khumi ai pato iy theaung theung y awm nai Josepha ai patheu hai kaliki bo. Josepha ly sam py labeaung mui py avau pawn iy baichu nina atha pajau baly samrang i mo y tym bo.

¹⁵Samrang my ni teng y, “Kai ly amang amang nai ne; awm nai sai ami py thui pi pachai thai y, nang ly amangchi thui pi pachai pajau, nanai kapany,” napi.

¹⁶Josepha my, “Samrang awi, kai py kaimy ngai ngai thui pi pachai thai y leang, na i py Tameuh my avo nai kamta thui pi pachai thai ai,” napi.

¹⁷Samrang ly “Kai i amang mang y Naing tavo peang y kai ly angdo nai ne;

¹⁸veung kahawi suiriu tlai na nai si nu saryhreichi ly tavo theung i nai lyn kalau iy achachi cha u bo.

¹⁹Naibaly Aikupta pri manira y py kai niu vai y nai khri pa-rei veung jei nai, takhra si nu saryhreichi ang lyn kalau bi.

²⁰Veung jeikhei nai si nuchi my veung kahawi si nuchi ai cha krai veng;

²¹na i py cha nai amny pajau y, ati mana nai mo nabaly angchei i kamta veung jei kari jei jojo nai ne. Naibaly kai ly i anglaw vau bo.

²²Huni bo y kai ly amang amang bi; huni amang ly choh keung hareira i nai choh kangmyn vui kahawi saryhrei hawi,

²³huni bo y khutaha meingtymra ali kabi aho nai deaungkho y, ta y nai choh vui saryhrei theu nai py kaniu.

²⁴Naibaly choh vui hawi y naichi my, choh vui kahawichi ai pajawn pawn nai kaniu bo. Kai ly atam kakawpchi teng y amti pi i py, ami py thui pi pachai thai y,” napi.

²⁵Huna nai khala Josepha my samrang teng y, “Amang ly nyhrei teu i py awm nai sai ly harei khyh; Tameuh ly mymy i sa ai nai kalop ai nang teng y pany hai nai ne.

²⁶Si nu veung kahawi amai saryhrei, nanai ly saneng saryhrei, nanai sai ne; naibaly choh vui kahawi saryhrei, nanai py saneng saryhrei, nanai sai ne teang; awm nai sai ly vanrei ne.

²⁷Kangkhym y lyn kalau nai si nu veung kajeikhei amai saryhrei hawi, khutaha meingtymra ali kabi deaungkho y ta y nai choh vui saryhrei, nanai ly saneng saryhrei takang theu ai, nanai sai ne.

²⁸Kai i nang teng y kang thui pi pachai nai ly teng khyp ai i, Tameuh ly mymy i sa ai naichi nang ai pany hai nai ne.

²⁹Saneng saryhrei nai ly Aikupta pri verei y khri pa-rei choh theu ai i, choh khri pa-rei nga ai.

³⁰Huni bo y saneng saryhrei ly khri pa-rei takang ho ai i, pri verei phra hai nai y, choh bai palo hawi nai sanengchi ai py tami pawn ai.

³¹Ka-jei hawi parai nai takang ho nai sai ly ang tym ai i, choh palo hawi nai nengchi tami pawn ai.

³²Amang tlen nyhrei amang hai nai sai ly kra y nai sala y Tameuh ly mymy i sa ai nai kalop ai sa khyp ai nai molam khaw hai nai amang ne.

³³Huna nai y nang ly vaimy khumi kacheng hawi momang i vui dawn pasym thai nai khumi leaungrei ai, pri verei y peang hai ba.

³⁴Nang ly miteaung kehchi ai vawi takhra iy choh nga nai saneng saryhrei sala y phy pangrei y phyrei pakym achu hai ba.

³⁵Vawi takhra nai miteaung kehchi ai choh nga nai neng saneng saryhrei sala y pakym nai choh ai ly mary tleirei y pateung achu hai ba.

³⁶Aikupta pri y takang saneng saryhrei theu nai thym y, pri verei i vui y pateung achu nai choh awm nai deaungkho y khumi mipuichi ly kajeu alam y ai,” nanai thui pi bo.

³⁷Samrang hawi miteaung kehchi ly Josepha i thui nai kamta sa ai nai ngai u bo.

³⁸Naibaly samrang ly nichi teng y, “Josepha ly Tameuh teng i cheng naira nga nai khumi ne; ni tleaung y hawi keh nai khumi hau i py achi niu pajau y leang,” napi.

³⁹Samrang my Josepha teng y, “Tameuh my nang teng y hini atitichi ang patei pi nai ne, nang kamta niu thai nai, dawn thai nai, cheng nai khumi ami py by y leang.

⁴⁰Kai ly nang ai kai i pri peang ai nai kang pei ai. Kai i khumi bawibawichi py nang i leu tangai ai mang. Nang ly kai i anui y pa-nyh sa thai naira awm keh nai, peang nai keung ne ai.

⁴¹Vai kaimy nang ai Aikupta pri verei y peang ai nai, samrang i bangtang kalen y kang khai bo,” napi.

⁴²Samrang ly mymy i pajawp typ nai ka-ma-ra kiu sabyh amjiu iy Josepha i kiu pajeung y amchiu hai. Josepha ai kanih mai ka-syn pateaung pi iy, kaneaung y py muku leng awi hai bo.

⁴³Pa-nyh pri peang nai keung i atang nai keaungngo ka-ri atang hai iy, mymy i tahm awm parai nai meaungpachi ly mo mang y tako iy, “Lam aheng u! lam aheng u!” nanai aeu u bo. Naibaly huna nai kamta sa iy Josepha ai Aikupta pri verei ai peang ai nai samrang i bangtang kalen y khai bo.

⁴⁴Hunaibaly Samrang my Josepha teng y, “Kai ly samrang ne; na i py Aikupta pri y awm nai khumichi ly nang i leu ny y baly ami py angto vam y leang mang,” napi.

⁴⁵Samrang my Josepha ai Aikupta khumi amyn Zaphenath Paneah, nanai amyn pathi bo; naibaly Heliopoli mary y awm nai pathyp pi nai keung Potiphera i chaniu Asenath hawi apom hai bo. Aikupta pri y samrang i kalop sa pi nai khala y, Josepha ly saneng phairei awm nai ne. Mymy ly samrang yhm i nai theu iy pri verei y khuleaung amki bo.

⁴⁶

⁴⁷Saneng saryh ryrei ly choh hawi amti amjangchi khri pa-rei hawi i theu py theu, nga py nga;

⁴⁸Josepha ly saneng saryhrei sala y, lichira i theu nai choh ngiereichi ai pakym achu iy, marychira y khaira sa hai i pateung achu bo. Lichira i theu nai chohchi ly kasa nai marychira y pateung hai bo.

⁴⁹Ni i pateung achu nai chohchi ly pangli spryh kamta tanrei nawi na nai deaungkho y neh hai y bo.

⁵⁰Takang theu y rai kha y Josepha i vui aju Asenath my chapo leaung nyhrei tapen pi.

⁵¹Josepha my, “Tameuh ly ngaai i yhm dengtheung bawibawichi ai py, kaimy i avum nai ngari kamtangchi ai py, tami hai veng bo,” napi. Hunai deaungkho y chapo chalu ai ly Manase,[60] nanai amyn pathi.

⁵²Chapo pa-nyh nga nai khala, “Tameuh my ngari kamtang avum nai pri y kai ai cho chanau amtheaung hai bo,” nanai thui iy huni chapo ai ly Ephraim,[61] nanai amyn pathi bo.

⁵³Aikupta pri y amo theu ai hawi parai nai amti amjang, choh bai palo hawi nai nga nai saneng saryhrei neng ly tem bo;

⁵⁴Naibaly Josepha i thui nai kamta saneng saryhrei takang theu ai nai ly amteaung bo. Pri tleirei y py khri pa-rei takang theu; na i py Aikupta pri y ly choh neangneang awm nai ne.

⁵⁵Aikupta khumichi py biu takang avum nai deaungkho y samrang teng y biu choh nga ai nai aeu u nai ne. Naibaly samrang my ly Josepha teng y chei iy ni i thui nai kamta sa u ai nai leu pei bo.

⁵⁶Takang ly pri verei y theu bo; takang ly khri pa-rei ho nai deaungkho y Josepha ly chohpaichi paeaung iy Aikupta khumichi teng y jo pi bo.

⁵⁷Khaileaung pri verei y py takang ho nai deaungkho y, pri tleirei i khumichi ly Josepha teng y choh van ai nai tym u nai ne.