Read Khumi Chin ATITI AWM ANGCHEI NAI 42 Bible Online

ATITI AWM ANGCHEI NAI 42 - Khumi Chin bible

ATITI AWM ANGCHEI NAI 42

¹Jakob ly Aikupta pri y choh awm, nanai thai baly mymy i chapochi teng y, “Nangchi ly ati mana nai y ngam u tliu lawh mo?

²Aikupta pri y choh awm, nanai kai ly thai; achi biu ka-lam y dei y ai nai nangchi huni pri y chei u ly choh van u,” nanai pato bo.

³Hunai deaungkho y Josepha i amjo amnau leaung horeichi ly choh van ai nai Aikupta pri y chei u nai ne;

⁴Na i py Jakob my Josepha i amnau kypkyp Benjamin ai ly amjochi hawi pato y; ati mana nai mo nabaly rai naira tym hai lawh na, nanai mawn hai nai deaungkho y ne.

⁵Kanan pri verei y takang theu nai deaungkho y, Jakob i chapochi ly khumi takhrachi hawi vanrei Aikupta pri y choh van ai nai tym u.

⁶Aikupta pri samrang i bangtang kalen Josepha ly pri tleirei i choh van ai nai tym nai khumichi teng y choh jo pi nai ne. Naibaly Josepha i amjochi py tym teang i mymy i mo y ambeu naimy chiu u bo.

⁷Josepha ly amjochi ai niu baly ma praw ryp. Na i py mymy ly ma y nai kamta sa pi vui i, nichi ai leu mo hawi my, “Nangchi ly ma mang i jeu u nai mo?” napi. Nichi my, “Kaichi ly choh van ai nai Kanan pri i dengdairei kang jeu u nai ne,” nanai pathang u.

⁸Josepha my ly amjochi ai ma i py amjochi my ly ma u y.

⁹Mymy ly nichi i molam y amang nai amang ai pany jo i, “Nangchi ly pri khen paviu nai khumichi ne, kaichi i pri atho di nai meingtymchi khen paviu ai nai jeu u nai ngaw khyh,” napi.

¹⁰Nichi my, “Ny y leang areng awi; nang i miseaung kaichi ly choh van ai nai kang jeu u nai teu;

¹¹Kaichi ly ampo harei i amjo amnauchi ne. Kaichi ly khen paviu naichi ny y leang; kaichi ly khumi kahawichi teu,” nanai pathang u.

¹²Josepha my nichi teng y, “Ny y leang, nangchi ly kaichi i pri manira y atho di nai awm mo nanai khen paviu ai nai jeu u nai teu,” napi bi.

¹³Nichi my, “Kaichi bawibawi ly Kanan pri y awm nai ampo leaungrei i chapochi ne. Kaichi ly amjo amnau leaung holai nyhrei awm areng; kaichi i amnau leaungrei nai ly dei veng bo; katheang keh nai ly vai yhm y ngaai hawi awm jo nai ne,” napi.

¹⁴Huni bo y Josepha my, “Kaimy kang thui pi nai ly teng khyp; nangchi ly khen paviu naichi ne.

¹⁵Nangchi thui nai ngierei teng mo, teng y mo, nanai kang cham ai: nangchi i amnau katheang keh kai teng y tym hai y ryrei ly nangchi ai kang patleaung y leang.

¹⁶Nangchi theung i leaungrei pato iy la de ai nai tla. Huni bo i nai ly nangmychi i thui nai leu teng mo, teng y mo, nanai cham ai; nangchi ai ly typ nai keungchi kiu y kang khai ai; ngamnau tym hai y lawh baly samrang heng nai ryrei nangchi ly khen paviu naichi ne ai,” nanai Josepha my pathang.

¹⁷Naibaly nichi ai ly huni molam y kani thomrei theaung y paeung bo.

¹⁸Pa-thom kani y Josepha my nichi teng y, “Kai py Tameuh ai jei iy tahm khai nai khumi ne; naibaly hina nai sa baly nangchi lawira nga ai nai kang sa pi ai.

¹⁹Nangchi khumi kahawi ne, nanai kang cham ai, nangchi theung i leaungrei nangchi awm nai theaung y awm jo rai sy: huni bo y nangchi ly nangmychi yhm dengtheung kajeu kawi ai nai, chohchi van iy pho u ly vawi u.

²⁰Naibaly nangchi i amnau katheang keh ai kai teng y jeu hai u. Hini ly nangchi i leu teng khyp lawh baly nangchi ai kang patleaung ai,” napi. Nichi ly Josepha i thui nai kamta ngai u bo.

²¹Huna nai kha y mychi tengtawi ly “Ne, vai achi ly amychi i amnau i tlang tleaung y sa nai sai molam y achi patang naira avum nai bo; mymy ly patang naira avum nai khala, achi my pahen pi y; hunai deaungkho y achi ly patangra avum nai ne,” nanai arum u.

²²Naibaly Ruben my, “Kaimy huni deaungdi ai no pei moh, napi i py nangchi tangai u y. Vai achi ly mymy i dei nai molam y vawitheung ang tym nai bo he,” napi.

²³Josepha ly nichi ati thui u nai mo, nanai pany pi se; na i py nichi ly pany u y, ati mana nai mo nabaly nichi ly leu tapeang pi nai keung teaung iy, Josepha hawi arum u nai deaungkho y ne.

²⁴Naibaly Josepha ly nichi teng i nai theu iy vo nai ne. Mymy ly nichi hawi leu arum teang ai nai pajau baly chei ali teang bi i, Simeon ai la iy nichi i mo y kawm rang bo.

²⁵Josepha my amjochi i paiso puichira y chohchi kawi pa-rei lum hai; nichi leaung leaungrei teng i choh vang nga nai tangkachi py, paiso puichira y pavei pi teang iy, lam y cha ai nai teicha teineichi py pavei pi ai nai leu pei nai ne.

²⁶Naibaly amjochi ly mymychi i van nai chohchi ai keaungngo kano kasauchi tleaung y tang u iy vawi u bo.

²⁷Nichi ly lam y i ai nai khala y, nichi theung i leaungrei ly mymy i keaungngo kano kasau ai teicha pei ai nai, my i paiso pui su baly theung y, my i tangka ai niu lawh.

²⁸Ni ly amjo amnauchi teng y, “Kai i tangka ang pavei pi teang lawh!” nanai thui iy paiso pui theung i tangka patei pi bo. Huna nai khala nichi ly kaso tahyn theu u i, “Tameuh my achi ai mana ang sa lawh mo?” nanai adeng u lengleang bo.

²⁹Nichi ly Kanan pri ampo Jakob teng y tym u nai khala y, nichi i avum nai cheaungkhangchi amti pi nai ne.

³⁰Nichi my, “Aikupta pri y peang nai keung ly kaichi ai leu mo hawi ang preng iy ni i pri ai khen paviu nai keung y ang neng hai.

³¹“Kaichi ly khen paviu nai khumichi ny y leang, kaichi ly khumi kahawichi ne,” nanai kapathang u bo.

³²Kaichi ly ampo leaungrei i amjo amnau leaung holai nyhreichi ne; Amnau leaungrei nai ly dei veng bo; katheang keh nai ly Kanan pri y kaichi i ampo hawi awm jo, kanapi u.

³³Huni khumi my pathang nai ly “Nangchi ly khumi kahawi ne, nanai pany thai ai nai hina nai so u; nangchi theung i leaungrei kai hawi vanrei hi y awm jo sy: huni bo i naichi ly nangmychi i yhm dengtheungchi kajeu kawi u ai nai choh pho iy vawi u.

³⁴Nangchi i amnau katheang keh ai kai teng y jeu hai u. Naibaly nangchi ly khen paviu nai khumichi ny y, khumi kahawichi teu, nanai kang pany ai; kaimy nangchi i amjo amnau ai py kang au pi teang ai i, nangchi py hi y awm iy ka-sum ka-pai sa ai nai nga u ai, ang napi” napi.

³⁵Naibaly nichi ly mychi i paiso puichi adi u i, paiso pui tleirei y mychi i tangka niu; naibaly nichi hawi ampo Jakob ly tangkachi niu nai khala y jei hyn u nai ne.

³⁶Ampo my nichi teng y, “Nangchi ly kai i chapochi ai tama hai ai nai ngai u nai sai a? Josepha py by y, Simeon py by y bo; vai py Benjamin ai kamlo y hawi u ai nai tau u lawh; kai teng y paleung kabi ang tym nai bo hi ly!” napi.

³⁷Ruben my ampo teng y, “Kaimy Benjamin ai kang tym hai teang y lawh baly nangmy kai i chapo leaung nyhrei ai padei teu. Kaimy kang kry pi ai i nang teng y kang tym hai teang ai mang,” napi.

³⁸Na i py Jakob ly “Kai i chapo ai nang hawi vanrei pato pajau y leang; ni i amjo py dei veng bo; vai ly ni leaungrei khyh bo. Kai ly miteaung bo; lam y rai naira sai sairei avum lawh baly, kai ly paleung si naira deaungkho y dei ai i, nangchi my kai ai padei nai tlo lawh na,” napi.