Read Khumi Chin ATITI AWM ANGCHEI NAI 43 Bible Online

ATITI AWM ANGCHEI NAI 43 - Khumi Chin bible

ATITI AWM ANGCHEI NAI 43

¹Kanan pri y takang theu nai ly khri pa-rei ho i,

²Jakob i yhm dengtheungchi ly Aikupta pri i pho nai chohchi cha be veng bo; huna nai khala Jakob my chapochi teng y, “Aikupta pri y chei u bi ly choh van u,” nanai pato.

³Juda ly ampo teng y, “Aikupta pri i samrang i bangtang kalen my kaichi ai leu kaji ang pei nai ly kaichi i amnau ai hawi y baly ni i mo y kaichi kun thai ai ny y leang.

⁴Ngaai nangmy kaichi i amnau ai kaichi hawi vanrei pato ai nai pei baly, choh van ai nai kaichi chei ai.

⁵Nangmy hawi ai nai pei y baly kaichi chei pajau y leang; ati mana nai mo nabaly huni khumi my nangchi i amnau ai hawi u y baly, kai teng y kun ai nai kang pei pajau y leang, ang napi khyp bo,” napi.

⁶Huna nai khala Jakob my, “Huni khumi teng y, kaichi i amnau katheang keh leaungrei awm rai, nanai ati mana nai y, kai paleung si hai ai nai thui pi u lawh moh,” napi.

⁷Nichi my, “Huni khumi ly achi i yhm dengtheung satangchi ang deng chumchi nai ne; nangchi ampo ly heng jo rai a? Nangchi ly amnau takhra awm rai sai a? nanai ang deng i, kaichi py ni i deng naichi pathang pi nai ne. Nangchi i amnau ai kai teng y hawi u, ang napi ai nai ami pany khyp ai mo?” napi.

⁸Juda my ampo teng y, “Kaichi i amnau ai kaichi hawi vanrei pato, kaichi vaimy chei ryp ai bo. Ti y baly achi kajeu ka-lam y dei bebe ai bo.

⁹Kai ly bechy i dei heng nai molam y, kai my kham mang. Bechy ai ngaai nang teng y kang hawi ali teang y lawh baly, kaimy deungrei kamngo tleang mang.

¹⁰Hina nai kamta neng kasau atheu y i khyly, kaichi ly tlen nyhrei kang tym teang veng ai bo,” napi.

¹¹Hunaibaly Ampo my nichi teng y, “Hina nai kamta so u; hini pri i theu nai atiti kahawichi napi nai maicha katli maidenrei, khawi hang maidenrei, mui katuichi, mura katli, tavau athai hawi baden athaichi paiso theung y lum iy, samrang i bangtang kalen i vui langseaung syn pi u.

¹²Tangka py nucho syn u; ati mana nai mo nabaly nangchi i paiso pui theung y tangka ang khai pi teang lawh nai py syn pi teang ai nai tla. Huni ly tamang nai py ne pajau.

¹³Nangchi ly ngamnau ai hawi u ly chei u praw jau.

¹⁴Benjamin hawi Simeon nini ai ang pei teang ai nai, ati cheaungkhang sa thai nai keung Tameuh my huni khumi i paleung ai py so pi sy; nangchi i amjo hawi Benjamin ai py vawi hai teang ai nai ang pei ai mang. Kai i chapochi tama lawh teu i py tamo teu jau sy,” napi.

¹⁵Naibaly amjochi ly langseaungchi hawi tangka nucho syn iy Benjamin hawi Aikupta pri mang y chei u tapai bo. Huni pri y tym u nai khala Josepha i mo y kun u.

¹⁶Josepha ly nichi hawi vanrei Benjamin abawi nai niu baly, mymy i miseaung lu teng y, “Hini khumichi ai kai i yhm mang y hawi jo; tawnbawi harei tleh iy so yb; kai ly nichi hawi vanrei kani thun biu cha ai,” napi.

¹⁷Miseaung lu ly Josepha i leu pei nai kamta sa ai nai, Josepha i amjochi ai yhm mang y hawi jo bo.

¹⁸Amjochi ly Josepha i yhm mang y abang u nai thym khala, “Hi y achi tym angchei nai khala achi i paiso pui theung y tangka ang khai pi teang nai molam y, achi ai ang palau nai ngaw khyh, nichi ly achi keaungngo kano kasauchi la u pawn iy achi ai py miseaung y ang khai ai ngaw khyh,” nanai dawn u i, jei pahui bo.

¹⁹Naibaly nichi ly katheu pa-kho y tym nai khala, Josepha i miseaung lu teng y;

²⁰“Sara awi, kaichi ly hini pri y choh van ai nai vaichi khala tlenrei kang tym u nai ne.

²¹Yhm y vawi nai lam y anawnra meingtym y tym nai khala, kaichi ly kaimychi i paiso puichi kasu u. Kaichi i paiso pui theung y kaimychi i tangka awm teang nai kaniu u bo. Kaichi ly huni tangka ai kang syn pi teang nai ne.

²²Kaichi ly choh van bi ai nai deaungkho y, tangka py kanawi kang syn u. Ami my kaichi i paiso pui theung y kaimychi i tangka ang pacheang pi ali teang nai mo, nanai kaichi pany y,” napi.

²³Miseaung lu my, “Nangchi paleung mawn u moh, Jei py jei u moh. Nangchi i Tameuh, nangchi ampo i Tameuh my nangchi i paiso pui theung y nangmychi tangka ang khai pi nai ne ai. Nangchi i pei nai choh vang ly kanga veng bo,” napi. Naibaly ni my Simeon ai py mymychi teng y tym hai teang bo.

²⁴Miseaung lu my nichi ai yhm angtheung y kun hai i, kheu asi u ai nai tui py pei pi; naibaly keaungngo kano kasauchi ai py teicha pacho pi.

²⁵Josepha ly nichi hawi vanrei kani thun biu cha ai, nanai thai u nai khala, nichi ly mymychi i langseaungchi pei ai nai khai yb bo.

²⁶Josepha yhm y tym nai khala nichi ly mymychi i syn nai langseaungchi talam pi iy ni i mo y ambeu naimy chiu u bo.

²⁷Josepha ly nichi ai noso hawi u a? nanai deng chum baly nichi teng y, “Nangchi my kai teng y thui pi nai ngampo miteaung ly noso hawi a? Ni ly heng jo rai a?,” napi.

²⁸Nichi my, “Areng nang i miseaung, kaichi i ampo ly noso hawi naimy awm jo rai na a,” napi. Naibaly nichi ly lu meung iy chiu u bo.

²⁹Josepha ly mymy i amnau Benjamin ai niu nai khala y, “Hini deaungdi ly nangchi my thui pi nai nangchi i amnau kasawi keh nai ne a? Deang awi, nang ai ly Tameuh my amtheaung hai sy,” napi.

³⁰Naibaly Josepha ly amnau ai niu nai deaungkho y, pahen i meikatui beu ai bo nabaly am-yh pajau y nai y, mymy i takun theung y kun iy vo nai ne.

³¹Mei ala chum baly angam mang y theu teang iy, paleung am-yh naimy biu sawn ai nai leu pei bo.

³²Josepha i vui sabawi harei, amjochi i vui sabawi harei, Aikupta khumichi i vui sabawi harei sawn pi nai ne. Aikupta khumichi ly Hebrai khumichi hawi vanrei cha baly, tahm anem parai, nanai y Hebrai khumichi hawi vanrei cho y nai ne.

³³Amjochi ai kalen dengdairei katheang khrairei ka-thui pateh pi nai ne. Nichi ly mymychi ai ateh hai nai sai niu nai khala, mychi tengtawi akhen u i, lyh parai na.

³⁴Josepha ly sabawira i nai teichachi ai, nichi teng y tha pi; Benjamin ly amjochi tleaung y phy pangrei nawi keh nga. Hunai kamta mymychi ly Josepha hawi vanrei amo theu parai naimy cha nei u bo.