Read Khumi Chin ATITI AWM ANGCHEI NAI 44 Bible Online

ATITI AWM ANGCHEI NAI 44 - Khumi Chin bible

ATITI AWM ANGCHEI NAI 44

¹Josepha ly mymy yhm i miseaung lu teng y, “Huni khumichi i paiso pui theung y nichi pho pajau nai ryrei choh lum pi; mychi i tangka py mymychi leaung leaungrei i paiso pui theung y khai pi teang.

²Amnau kasawi keh i paiso pui theung y kai i tangka khau hawi choh vang tangka py khai pi,” napi. Miseaung lu ly leu pei nai kamta sa bo.

³Khawn khutawi baly nichi ly mymychi i keaungngo kano kasauchi hawi theu u.

⁴Nichi ly mary hawi kamlo kyh naira y tym nai khala y Josepha ly miseaung lu teng y, “Nichi ai hui kaliki. Nichi ai kai nai khala, ‘Ati mana nai kahawi sa naira y hawi y nai patheung u lawh mo?

⁵Ati mana nai kai i areng i tangka khau paviu u veng lawh mo? Huni hawi kreip athai hang nei hai nai, cheng naira pei nai khau ne chy bo. Nangchi ly khri pa-rei len parai nai kamngo sa u lawh ly!’ nanai thui pi,” napi.

⁶Miseaung lu ly nichi ai hui nai kai nai khala y, huni leu saichi thui pi bo.

⁷Huna nai khala nichimy, “Sara awi, kaichi ai hina nai kamta mana neng hai lawh mo? Kaichi ly huna nai kamta so y, nanai vaineng abeu mang.

⁸Kaichi i paiso theung y niu nai tangkachi ai Kanan pri i dengdairei kang syn pi u teang nai py nang pany be. Mana nai nang i areng yhm i muku tangka khau paviu pi lawh ai mo?

⁹Sara awi, kaichi theung i leaung leaungrei teng y huni vawn awm nai niu lawh baly ni ai padei teu. Kaichi py nang i miseaung y kaawm u ai,” napi.

¹⁰Miseaung lu my, “Nangchi thui nai kamta ne sy; na i py khau paviu nai keung naini kai i miseaung y lawm hai ai, huni bo i naichi ly lawi hai ai,” napi.

¹¹Naibaly nichi ly paisochi khaileaung y amteih u kaliki iy paiso su u bo.

¹²Josepha i miseaung my kalen ka-thui katheang keh tym pa-rei hau i, khau ly Benjamin i paiso theung y niu nai ne.

¹³Huna nai khala amjochi ly paleung hawi y nai mymychi i baichuchi sei u lengleang na bo; naibaly mychi ly keaungngo kano kasauchi tleaung y cho paisochi tang u iy mary mang y ali u teang bo.

¹⁴Juda hawi amjo amnauchi ly Josepha i yhm y tym u i, ni ai hu y avum. Nichi ly Josepha i mo y lu meung iy chiu u bo.

¹⁵Naibaly Josepha my, “Nangchi ly ati mana sa u lawh mo? Kaimy kypkyp ly cheng naira awm nai khumi, nanai pany u y nai sai a?” napi.

¹⁶Juda my, “Kaichi mana thui ai mo areng awi, kaichi mana akhi thai ai mo? Kaichi kaso u y leang, nanai mana thui pachai thai ai mo? Kaichi i kamngo sa nai Tameuh my ang niu nai bo. Vai ly khau paviu nai keung hawi vanrei kaichi bawibawi ly nang i miseaung kalawn u ai khyh bo,” nanai pathang.

¹⁷Josepha my, “Aw, ny y leang! Huna nai kamta kai so hai y leang. Khau paviu nai keung naini kai i miseaung lawm hai ai. Huni bo i nai nangchi ly ngampo teng y paleung kahawi hawi, chymme naimy vawi u,” napi.

¹⁸Naibaly Juda ly Josepha teng y athui iy, “Pahen kyh areng, kai ai leu katheu ai nai pei kyh, kai ai kado theu hai moh kyh jemjem ba; nang ly samrang kamta ne.

¹⁹Areng nangmy kaichi teng y, ‘Nangchi ly ngampo awm rai a? Ngamnau awm rai a?’ nanai deng bo.

²⁰Kaichi my, ‘Kaichi ly saneng len parai nai ampo leaungrei awm; miteaung khala tapen nai amnau kasawi keh leaungrei py awm; ni i amjo ly dei veng bo. My i amhm my tapen nai theung i ni leaungrei naini awm khyh bo; ngaai my ni ai khri pa-rei khrei nai ne,’ nanai kang thui pi.

²¹Areng nangmy niu ai nai ngai i, hi y jeu hai u, napi bo;

²²Naibaly kaichi my ngaai ly pei ai ny y leang; ni ai hawi veng baly ngaai ly dei ryp ai, kang napi.

²³Huna nai khala nangmy, ‘Nangchi i amnau katheang keh ai jeu hai y baly kai i mo y kun ai nai kang pei ai ny y,’ napi bo.

²⁴“Kaichi ly ngaai teng y vawi teang nai khala y, nang i thui pi nai leu mymy teng y amti pi teang nai ne.

²⁵Naibaly ngaai my kaichi ai cho van ai nai ang pato bi.

²⁶Kaichi my, ‘kaichi chei pajau y leang; kaichi hawi vanrei bechy ai pato y nabaly, huni khumi i mo y kun ai nai nga ai ny y; bechy ai kaichi hawi vanrei pato khala naini kaichi chei ai,’” napi bo.

²⁷Ngaai my kaichi teng y, ‘Nangchi pany nai kamta, kai i aju Rakeli my chapo leaung nyhrei ang tapen pi khyh;

²⁸Leaungrei nai ly kai ai khai su veng bo. Ni ai ly daichi mawi kasichi my kei vui nai ne; hunai deaungkho y kai ly vaini khrairei mymy ai niu y leang bo.

²⁹Vai kai teng i nai hini chapo leaungrei ai py hawi u vui iy, ati mo sai sairei tym hai khyly, kai ly miteaung theung y paleung si paleung mawn naimy kadei ai i, kai ai nangchi my padei nai tla lawh ai,’ ang napi.

³⁰“Naibaly vai ly areng awi, kai ly bechy tym teang y naimy ngaai teng y vawi teang baly mymy ly kai hawi vanrei bechy ai niu y nai deaungkho y, mymy ly dei takengkei ai. Ngaai ly bechy saho y heng nai ne; mymy ly miteaung mang y paleung si paleung mawn naimy dei ai i, kaichi my padei nai tla ai bo.

³²Kai ly bechy i vui kham pi nai keung ne. Kaimy, ‘bechy ai ngaai nang teng y kang hawi ali teang y lawh baly, kaimy deungrei kamngo atleang mang,’ nanai leu adeu kheng nai ne.

³³Naibaly hini bechy i jeng y kai ly areng nang i miseaung y kaawm lawh ai khyh bo; ni ly amjochi hawi vanrei vawi ali teang sy.

³⁴Kai ly bechy abawi y naimy ngaai teng y mana vawi thai ai mo? Ngaai i tlang tleaung y tym nai paleung si patang naira ly kai niu ai nai kangai y leang bo,” napi.