Read Khumi Chin ATITI AWM ANGCHEI NAI 46 Bible Online

ATITI AWM ANGCHEI NAI 46 - Khumi Chin bible

ATITI AWM ANGCHEI NAI 46

¹Jakob ly mymy i vawnsai ngiereichi angvei iy khuleaung amsa i, Beraseba meingtym y tym baly, ampo Isaka i Tameuh teng y kapathypra talam bo.

²Huni vum ni i paleung mei y niu nai Tameuh my, “Jakob, Jakob!” nanai palau. “Areng awi, kai ly hi y awm,” nanai pathang.

³Tameuh my, “Kai ly Tameuh ne, ngampo i Tameuh ne: nang ly Aikupta pri mang y chei ai nai jei moh; hu y nang i kangpreangchi ai kaimy khumi cheng kalen lawm hai ai.

⁴Kai ly nang hawi vanrei Aikupta pri mang y chei ai. Kaimy kypkyp ly nang i kangpreangchi ai hini pri y kang hawi ali teang ai. Nang dei nai neng tym pa-rei Josepha my ang kry ai,” napi.

⁵Naibaly Jakob ly Beraseba i dengdairei theu bo; chapochi ly ampo Jakob, mychi i ajuchi hawi cho chanauchi ai samrang Pharao my pato pi nai ka-richi atang hai bo.

⁶Nichi ly Aikupta pri mang y ang pyn nai khala y, Kanan pri y awm nai thym khala i nga nai yhmtheaungchi hawi tawnbawichi py syn u. Jakob ly my i kangpreang bawibawi ai mymy hawi vanrei:

⁷mymy i chapo chaniuchi, katuchi hawi yhm dengtheung bawibawichi ai Aikupta pri y hawi nai ne.

⁸Jakob hawi vanrei Aikupta pri mang y ang pyn nai yhm dengtheungchi ly hinichi ne; Chapo kalen keh Ruben hawi

⁹Ruben i chapochi ly Hanoh, Pallu, Hezaron hawi Karami,

¹⁰Simeon hawi ni i chapochi ly Jemuela, Jamin, Ohad, Jakin, Zohar hawi Kanan cheng neampachy i tapen nai Saula ne.

¹¹Levi hawi ni i chapochi ly kerashon, Kohath hawi Merarichi ne.

¹²Juda hawi ni i chapochi ly Era, Onan, Selah, Perez hawi Zerahchi ne. Huni theung i chapo Era hawi onan ly Kanan pri y dei vui bo. Pezer i chaponi ly Hezron hawi Hamula ni ne.

¹³Isakhar hawi ni i chapochi ly Tola, Puah, Jasub hawi, Simronchi ne.

¹⁴Zebulun hawi ni i chapochi ly Sered, Elon hawi Jaleelachi ne.

¹⁵Hini khumichi ly Mesopotamia pri y awm nai khala y Leah i tapen pi nai Jakob i chapochi hawi katuchi ne; chaniu Dinah ai kati y naimy, Leah dengdairei kangpreangchi ly phaipalyh leaung thomrei ne.

¹⁶Kad hawi ni i chapochi ly Zephon, Haki, Shuni, Ezabon, Eri, Arod hawi Arelichi ne.

¹⁷Aser hawi ni i chapochi ly Imnah, Isavah, Isavi, Beria hawi mychi i tuicho Serah ne. Beria i chaponi ly Hebera hawi Malkhiela ni ne.

¹⁸Hini leaung holai tariureichi ly Labana i chaniu Leah i miseaungnu Zilpah my tapen pi nai Jakob i kangpreangchi ne.

¹⁹Jakob i aju Rakeli i chapo leaung nyhrei ly Josepha hawi Benjamin ne.

²⁰Aikupta pri y awm nai khala y Josepha ly chapo leaung nyhrei Manase hawi Ephraim nini ai nga nai ne. Huni ly Heliopoli mary i pathyp pi nai keung Potiphera i chaniu Asenath my tapen pi nai ne.

²¹Benjamin i chapochi ly Bela, Bekera, Asabela, Kera, Naaman, Ehi, Rosh, Mupim, Hupim hawi Aradchi ne.

²²Hini leaung holai palyhreichi ly Rakeli my Jakob i vui tapen pi nai kangpreangchi ne.

²³Dan hawi ni i chapo Hushim.

²⁴Naphtali hawi ni i chapochi ly Jazeela, Kuni, Jeza hawi Shilemchi ne.

²⁵Hini leaung saryhreichi ly Ampo Labana my Rakeli i vui pei nai miseaung nu Bilaha my Jakob i vui tapen pi nai kangpreangchi ne.

²⁶Jakob i lengngochi ai kati y naimy Aikupta pri y vawi nai Jakob i kangpreangchi ly leaung vui tariu saryh tariurei awm.

²⁷Aikupta pri y Josepha i nga nai chapo leaung nyhrei ai kati baly, Aikupta pri y Jakob vawi nai khala y leaung vui saryhrei awm khypkhyp nai ne.

²⁸Jakob ly Josepha ai Kosen meingtym y mymychi hawi ka-vum sa ai nai Josepha teng y Juda ai pato man bo. Nichi ly Kosen meingtym y tym u nai ne.

²⁹Josepha ly ampo hawi avum ai nai Kosen meingtym mang y ka-ri hawi chei bo. Ampo hawi avum nai khala, Josepha ly ampo ai takawi iy kra parai pa-rei my vo nai ne.

³⁰Jakob ly Josepha teng y, “Kai ly nang i meimai niu iy nang heng jo nai py pany nai deaungkho y, vai kai ly dei i py paleung anyp bo,” napi.

³¹Naibaly Josepha my amjochi hawi ampo i takhra yhm dengtheungchi teng y, “Kaimy samrang teng y Kanan pri y awm nai kai i ampo i yhm dengtheungchi hawi, kai i amjochi ly kai teng y ang tym u bo, kanapi ai.

³²Nichi ly beram typ nai keungchi ne iy, tawnbawichi kry ai nai tla. Nichi ly beramchi, mi-ichi hawi awm nai vawnsai bawibawichi syn u bo, nanai kathui pi ai.

³³Samrang my nangchi ai ang palau iy nangchi ly ati kalop sa u mo? nanai ang deng baly;

³⁴Kaichi ly amsi pajochi deung i dengdai vaini khrairei, beram hawi sichi khawn u nai ne, nanai thui pi. Huna khala naini nangchi ai Kosen meingtym y awm ai nai ang pei ai,” nanai thui pi bo. Aikupta khumichi ly beram typ nai keungchi ai paso nai deaungkho y, Josepha my huna nai kamta thui hai nai ne.