Read Khumi Chin ATITI AWM ANGCHEI NAI 49 Bible Online

ATITI AWM ANGCHEI NAI 49 - Khumi Chin bible

ATITI AWM ANGCHEI NAI 49

¹Jakob ly chapochi ai palau iy, “Kai i sahawi y jeu u achu, kai my vai momang y nangchi teng tym ai nai sai kang thui pi ai:

²“Jakob i chapochi awi, jeu u ly tangai u. Nangchi i ampo Israela i leu tangai u.

³“Ruben awi, nang ly kai i chapo chalu tailuitang, kai i atho, kai hawi thym khala nga nai chapo chalu, kai i chapo leilachi theung y aly len keh iy, atho ham keh nai ne.

⁴Nang ly tui len nai thym khala i tui kamsau kamta ne. Na i py nang ly chapochi theung y chapo chalu lawm pajau y; ngampo i aju miseaung nu hawi nang ly i ahawi lawh; nang ly ampo i ira ai tahm khai y nai ne

⁵“Simeon hawi Levi ly amjo amnau ne. Nini ly haisau atheu iy khumi ai tleh bo.

⁶Nini ly kado theu hawi i khumi ai tleh iy si kataichi i kheu ai pakhau peu atyhtyh nai deaungkho y, kai ly nini i sa pavui naira y abawi y ai; nini i leu ka-rumra y py abawi pi ai ny y.

⁷Myni i kado theu rawn nai ly amsawi lawi sy: kai ly myni i kado theu nai molam y, Israela pri verei y ahei hai ai. Mymy ni i khumichi theung y taprei vui ai.

⁸“Juda nang ai ly ngamjo ngamnauchi my ang palo ai. Nang ly nang my i paleung ka-echi ai kaneaung y taau ai. Nang i ngamjo ngamnauchi my nang ai lu meung u ai.

⁹“Juda awi, nang ly khrangsi atawm i, mawi ai kei naimy tapiu y ang vum teang iy, kheu thawije naimy ambeu bo. Ami py ni ai nam vam y leang.

¹⁰Juda ly samrang i tivi syn ai; ni i kangpreangchi teng y peang naira haiho awm jojo ai. Cheng cheaungkhangchi ly ni teng y langseaung pei u ai. Ni i leu tangai u ai.

¹¹Ni ly my i keaungngo kano kasau cho ai kreip angjyn keung kahawi kehra y pakheng bo. Ni ly my i ateaungchi ai kreip hang thi kamsen hawi pasiu nai ne.

¹²Kreip hang nei nai deaungkho y ni i meichi ly pasen na bo; kanu nei nai deaungkho y ni i hochi ly kaleungdyh na bo.

¹³“Zebulun ly pangli peang y awm ai. Mymy i tuivum ly samphochi khen naira apu parai nai tuivum lawm ai. Mymy i pri ly Sidon mary y khrairei kau ai.

¹⁴“Isakhar ly keaungngo atangra nibaichi sala y ambeuje nai keaungngo kano kasau tanrei hawi y.

¹⁵Na i py ni ly anawnra hawi parai nai py, awm ai hawi parai nai py niu ai i, ni ly akeng akawi na pa-rei myn kaji pho nai miseaung lawm iy, kalop sa hai akhikan nai py avum ai.

¹⁶“Dan ly takhra Israela chengchi kamta, mymy i khumichi ai peang ai.

¹⁷Dan ly lam teng y akawi nai pavui, lamteng y amo nai pavui kangso lawm iy, keaungngo i kheupatui ai patiu nai deaungkho y, keaungngo atang nai khumi ai nithun mang y atlym hai ai.

¹⁸“Aw ARENG, kai ly nang i atleu naira ajeng jo nai ne.

¹⁹“Kad ly damrachi my tiu nai avum ai; na i py ni ly mymy ai tiu naichi ai tiu ali teang ai.

²⁰“Aser pri ly teicha tanei kahawichi theu ai. Ni teng i samrang cha ai nai teicha teinei nga ai.

²¹“Naphtali ly tlai leaunglang nai sisiu kamta ne. Mymy ly khrei ai hawi parai nai sisiu chochi tapen bo.[63]

²²“Josepha ly tuino sampum sahawi y tlai nai keaungngo kano kasau karam atawm. Ni ly mawi tahyh y tlai nai keaungngo kano kasau karam cho py atawm. [64]

²³Ni i paleung ka-echi ly ni ai thailiho hawi hui iy khri pa-rei tiu u bo.

²⁴Na i py Jakob i ati cheaungkhang sa thai nai Tameuh i sa thai naira hawi py, Israela ai ama hai nai beram typ nai keung i sabawm nai saho y py, ni i thailiho ly amchyh y iy, ni i kiubanchi py ham nai ne.

²⁵Nang ngampo i Tameuh ly nang ai sabawm nai keung ne; Ati cheaungkhang sa thai nai Tameuh ly salo mang i amtheaung hai nai kanitui, khaileaung mang i theu hai nai tui py, cho chanauchi hawi tawnbawichi amtheaung hai nai keung ne.

²⁶Amti amjangchi hawi kaseaung khuraichi ai py amtheaung hai sy; jangni i mawichi hawi, vai khrairei khaw jo nai mawichira i, apu parai nai atitichi py, nang ai amtheaung hai sy; hini amtheaung naira bawibawichi ly my i amjo amnauchi tleaung y tahm asang keh nai Josepha i lu tleaung y tym sy.

²⁷“Benjamin ly kasui kahyn atawm. Ni ly dym khawn tleirei mawi ai kei iy cha reng nai ne,” napi.

²⁸Hini khumichi ly Israela cheng holai nyhreichi ne; nichi i ampo my, chapo leaung leaungreichi ai amtheaung hai nai leu sai kataviu ne.

²⁹Naibaly Jakob my chapochi teng y, “Kai ly amsi pajochi i a-up naira y chei ai nai kasa bo; Kanan pri Mamre mary nisi mang i Hiti cheng Ephron i khaileaung, amsi pajochi i tapreaung y up ba.

³⁰Abraham ly Kanan pri Mamre mary, Makapela i lira y huni khaileaung hawi tapreaung ly Hiti cheng Ephron teng i van yb nai tapreaung meingtym ne.

³¹Huni tapreaungra y kai i amsi Abraham hawi amsichy Sarah ai up nai ne; kai i ampo Isaka hawi kai i amhm Rebeka ai py up i, Leah ai py kai my hu y up teang.

³²Huni khaileaung hawi tapreaung ly Hiti chengchi teng i van nai ne. Hunira y kai ai py up,” napi.

³³Jakob ly chapochi teng y huna nai leu taviu chum baly, mymy ly ira y aseaung teang i dei bo.