Read Khumi Chin ATITI AWM ANGCHEI NAI 50 Bible Online

ATITI AWM ANGCHEI NAI 50 - Khumi Chin bible

ATITI AWM ANGCHEI NAI 50

¹Josepha ly ampo i tlang tleaung y tabiu iy khri pa-rei vo naimy ampo i meimai y panam bo.

²Naibaly Josepha ly ampo i veu ai veaung y pa-rei asi sa ai nai leu pei.

³Veu veaung y pa-rei kani vui palyhrei asi y padeung u bo. Aikupta khumichi ly Jakob ai kani vui saryhrei vo hai nai ne.

⁴Paleung kasi vo tangam nai rym nai khala y, Josepha my samrang i miteaung kehchi teng y, “Pahen parai naimy samrang teng y satang thai hai pi kyh;

⁵Ngaai my ang taviu nai ly “Kai dei baly Kanan pri y mymy i sa yb nai tapreaung y veu pavum ba, nanai leu ang pei nai ne. Hunai deaungkho y pahen parai naimy, ngaai i veu ai pavum ai nai pei kyh, pavum pajau baly kang vawi ali teang ryp ai, nanai thui pi u kyh,” napi.

⁶Josepha my leu taviu nai kamta miteaung kehchi ly samrang teng y thui pi nai khala, samrang my, “Nang i ngampo teng y leu adeu nai kamta chei ly ngampo ai up ba,” napi.

⁷Hunaibaly Josepha ly ampo ai pavum ai nai chei bo. Samrang i miteaung kehchi py, samrang yhm i miteaung kehchi py, Aikupta pri i lu sa nai miteaung kehchi py mymy hawi vanrei abang u nai ne.

⁸Josepha i yhm dengtheungchi, mymy i amjochi, ampo i yhm dengtheung bawibawichi hawi my i miso bawibawichi py, mymy hawi vanrei chei u teang nai ne. Nichi i cho deaungdichi, beramchi, mi-ichi, sichi naini Kosen y awm u jo.

⁹Keaungngo ka-richi, keaungngo atang nai risachi py, abang u nai deaungkho y khumi mipui khri pa-rei nawi parai nai ne.

¹⁰Nichi ly Jordan tavo nisi mang Atad napi nai choh ati nai meingtym y tym u nai khala y, paleung si nai vo hang u bo; huni meingtym Josepha my Jakob i vui kani saryhrei paleung si vo tangam nai pawi sa pi nai ne.

¹¹Huni meingtym y awm u nai Kanan khumichi my Atad choh ati naira y khumichi i vo hang nai niu u nai khala nichi my, “Aikupta khumichi khri pa-rei vo tangam u na ly!” nanai thui u. Hunai deaungkho y Jordan tavo nisi mang i huni meingtym ai Abela Mizraim, [65]nanai amyn pathi bo.

¹²Hunaibaly Jakob i chapochi ly ampo my leu taviu nai kamta,

¹³ampo i veu ai Kanan pri mang y angjeaung u iy, Hiti cheng Ephron teng i Abraham my van nai khaileaung meingtym, Mamre nisi mang i Makapela y up u bo.

¹⁴Josepha ly ampo ai up pajau bo nabaly, mymy hawi vanrei amjo amnauchi py, veu pavumra y abang nai khumi bawibawichi py, Aikupta pri mang y vawi ali teang bo.

¹⁵Ampo dei nai bo y Josepha i amjo amnauchi my, “Achi ly Josepha i tlang tleaung y patang naira tym hai nai molam y, vawitheung tha lawh na a? nanai jei pahui bo.

¹⁶Hunai deaungkho y nichi ly Josepha teng y savai pato i,

¹⁷“Kaichi ly nang i tlang tleaung y sa tamang nai deaungkho y pahen kyh ba,” nanai takeng ai nai ngaai my dei y rai khala ang taviu yb nai ne. Huna nai y ngaai i ym nai Tameuh i miseaung kaichi i sa tamang nai pahen kyh ba,” nanai thui hai bo. Josepha ly huna nai amti pi nai leu thai nai khala khri pa-rei vo bo.

¹⁸Naibaly Josepha i amjo amnauchi ly ni teng y chei u nai, ni i mo y lu meung naimy chiu u iy, “Nang i miseaung kaichi ly nang i mo y kang tym u bo,” napi.

¹⁹Na i py Josepha ly amjochi teng y, “Jei u reng moh; kai ly Tameuh i meingtym y awm nai ny y leang.

²⁰Nangchi my kai i tlang tleaung y hawi y nai sa u teu i py, Tameuh my vaini khumi bawibawichi heng thai ai nai ka-vo sa pi nai teu bo.

²¹Nangchi ati sai py jei ai nai by y leang. Kaimy nangchi hawi nangchi i cho chanauchi ai kang kry pi ai mang,” napi. Huna nai kamta Josepha ly amjo amnauchi ai paleung khaw hai nai leu thui pi iy paleung pahawi nai ne.

²²Josepha ly Aikupta pri y ampo i yhm dengtheungchi hawi vanrei awm iy, mymy ly saneng chungvai atlo horei baly dei bo.

²³Mymy ly Ephraim i chanauchi hawi katuchi ai niu nai pa-rei heng. Mymy ly Manase i chapo Makhira i chanauchi ai py tapawm ai nai nga nai ne.

²⁴Josepha ly amjo amnauchi teng y, “Kai ly dei ai bo; kai by y i py Tameuh my nangchi ai ang kry takengkei ai. Nangchi ai hini pri i dengdairei ang patheu iy, Abraham, Isaka, Jakobchi teng y pei ai adeu nai pri mang y ang pahawi ai,” napi.

²⁵Naibaly Josepha ly mymy i khumichi teng y, “Tameuh my nangchi ai huni pri y ang pahawi nai khala, nangchi hawi vanrei kai i hiu py syn ai, nanai kai teng y leu adeu u,” napi iy vaineng abeu hai bo.

²⁶Naibaly Josepha ly saneng chungvai atlo horei awm baly, Aikupta pri y dei bo. Nichi my veaung y pa-rei asi sa iy, kheaung theung y khai me bo.