Read Khumi Chin ATITI AWM ANGCHEI NAI 6 Bible Online

ATITI AWM ANGCHEI NAI 6 - Khumi Chin bible

ATITI AWM ANGCHEI NAI 6

¹Khaileaung pri verei y khumichi ly peung dudu i, chaniuchi py tapen nai ne.

²Kanicho phyreichi ly[11]anglo hawi nai sai niu i, mychi ngai nai ngierei ai ly pom u bo.

³Naibaly ARENG my, “Kai ly khumichi ai heng sau hai y leang bo; nichi ly dei nai amjychi ne. Vai i dengdairei saneng 120 rei heng hai ai khyh bo,” napi.

⁴Huni neng khala y hawi kangkhym i neng khala py, kanichochi hawi khaileaung i khumi neampachychi apom iy tapen nai kangpreangchi ly khumi py len, atho py awm; jangni i amyn amthang nai sorai theu nai khumichi ne.

⁵Khaileaung pri verei y awm nai khumichi ly khumi aso y iy, paleung ka-dawn hawi y jojo nai sai ARENG my niu nai khala,

⁶mymy ly khaileaung pri y khumi ai sa nai hawi, khumi ai khai nai ly tamang bo, nanai paleung ka-dawn pipi hawi y i, mymy ly khri pa-rei paleung ama bo.

⁷Naibaly mymy ly “Kaimy i sa nai hini khumichi ai khaileaung tleaung i nai katamyh vui ai; tavochi hawi amso mawichi ai py tamyh ai; nichi ai sa nai deaungkho y kai pipi paleung hawi y,” nanai thui bo.

⁸Na i py Nova ly ARENG i paleung kangai hawi avum nai khumi ne.

⁹Hini ly Nova i satang ne. Nova ly Sema, Hama, Japheth napi nai chapo leaung thomrei awm. Ni ly kamngo by y iy, huni deung i khumi bawibawichi theung y ni leaungrei naini khumi kahawi ne. Ni ly Tameuh hawi amkawm iy heng bo.

¹¹Na i py khumi bawibawichi ly Tameuh i mei ka-niu y kamngo ne; meingtym tleirei y atho y khrukhra naira ly kawi bo.

¹²Tameuh my khaileaung pri y khen i, khumichi i heng nai sai hawi y nai niu.

¹³Tameuh my Nova teng y, “Kaimy khumi angso bawibawichi ai tamyh vui ai nai dawn bo. Ati mana nai mo nabaly khaileaung pri ly khumichi i atho y khrukhra hai nairachi kawi nai deaungkho y kai ly nichi ai katamyh keng ai.

¹⁴Nangmy i vui dengkeaung ngan kahawi hawi paleaung pui thiu ly panglaichi py so; theung mang py angam mang py dengkeaung katli pajui typ ba.

¹⁵Jeng kasau ly miu chungvai thomrei, ka kalen ly miu vui pangrei, ka-sang ly miu phairei awm ai nai tla.

¹⁶Paleaung pui salo y amphu tabiu iy, paleaung ka-ki amphu hawi miurei akhan ai nai tla. Sambeu thomrei sa iy pana mang y katheu pa-kho harei khai ai nai tla.

¹⁷Kaimy khaileaung i heng nai cheaungkhangchi tamyh ai nai khaileaung pri y tuibai tuitleng theu hai ai; naibaly khaileaung i heng nai cheaungkhang ly dei bebe ai.

¹⁸Na i py kai ly nang hawi Leu Maikawm asa ai. Nangmy hawi vanrei aju py, nang i chapochi py, paleaung pui theung y atang u.

¹⁹Heng nai mawi cheaungkhangchi hawi tavo cheaungkhangchi theung i nu kalo ka-bomchi heng thai ai nai nangmy hawi vanrei paleaung pui theung y kun hai.

²¹Nangmychi i vui hawi, nichi i vui py teicha teinei cheaungkhang syn ba,” napi.

²²Tameuh my leu pei nai kamta Nova ly ati cheaungkhangchi sa angym bo.