Read Khumi Chin ATITI AWM ANGCHEI NAI 8 Bible Online

ATITI AWM ANGCHEI NAI 8 - Khumi Chin bible

ATITI AWM ANGCHEI NAI 8

¹Tameuh my paleaung pui theung y awm nai, Nova hawi amso mawichi ai pany jo nai ne; mymy ly ali aho hai i tui ly kang dudu bo.

²Naibaly khaileaung anui i tuino bawibawi hawi kanitui pa-khochi py kho pi iy, kani nai nai py aham bo.

³Tui kang dudu nai ly kani chungvai atlo vui pangrei akan nanai ne.

⁴Lo saryhrei kani holai saryhrei kani y, paleaung pui ly Ararat mawi y apa rang bo.

⁵Tui ly kang dudu i, lo horei angchei kani y mawi saleungchi amteng dudu nai ne.

⁶Kani vui palyhrei bo y, Nova my thaibeng katheu paeaung i,

⁷o-a harei patleaung i huni ly tym ali teang y; na i py tui kang y ryrei ly akheang veangveang nai ne.

⁸Kra y nai sala y, Nova my tui kang mo, kang y mo pany ai nai buhu ai patleaung bi bo;

⁹na i py buhu ly tui kang y nai deaungkho y chymra ngo y i paleaung pui mang y akheang tapai teang; naibaly Nova my kiu jaha nai patiu iy paleaung theung y khai teang bo.

¹⁰Huni bo y kani saryhrei ajeng bi i, buhu ai patleaung bi.

¹¹Buhu ly dym mang i neng y olive sengreang pakeang tarete naimy paleaung mang y vawi ali teang. Hunai deaungkho y Nova ly tui kang bo, nanai pany bo.

¹²Huni bo y kani saryhrei ajeng taleang bi i, buhu ai patleaung bi; vai i nai ly buhu ly tym ali teang y leang bo.

¹³Nova saneng 601, angchei i lo, angchei kani y, Nova ly paleaung pui amphu lei iy angdeang aki prei i, tui lawi khaileaung phui nai niu bo.

¹⁴Pa-nyh lo kani apom phai saryhrei khala, khaileaung ly phui hawihai bo.

¹⁵Tameuh my Nova teng y,

¹⁶“Paleaung pui theung i dengdairei, nang hawi nang i aju py, nang i chapochi py, nang i lengngochi py theu u.

¹⁷Khaileaung y peung ai nai, nang hawi vanrei awm nai amso mawichi py, tavochi py patheu,” nanai leu pei bo.

¹⁸Naibaly Nova ly aju hawi chapo lengngochi ai py paleaung pui theung i nai patheu bo.

¹⁹Tavochi hawi amso mawichi py, nichi i amjy ka-thui ka-thui paleaung theung i dengdairei theu u bawi bo.

²⁰Nova ly ARENG teng y apathyp ai nai maicham sa i, mymy ly no-na by y nai mawi cheaungkhang hawi tavo cheaungkhang theung i ha harei la iy maicham tleaung y bomverei leng patlum nai talam bo.

²¹Apathyp nai mui katui ai ARENG ly kawn i, Nova teng y, “Khumichi atiti sa nai deaungkho y khaileaung ai kapasawi bi y leang bo; khumi i paleung dawn naichi ly deaungdichy khala i ka-so hawi y jojo nai kapany; vai i kamta heng nai cheaungkhangchi ai katamyh bi y leang bo.

²²Khaileaung pri awm nai ryrei ly hlau sa nai neng, amti amjang pati nai neng, cho tyn nai neng, bi nai hawi savai nai, kaseih, kani pui, nicho, kani thun hawi vum awm jojo ai,” napi.