Read Khumi Chin ATITI AWM ANGCHEI NAI 9 Bible Online

ATITI AWM ANGCHEI NAI 9 - Khumi Chin bible

ATITI AWM ANGCHEI NAI 9

¹Tameuh my Nova hawi chapochi ai amtheaung hai nai leu ly “Nang i kangpreangchi ly khaileaung pri verei y kawi ai nai cho chanau neangneang so u,” napi.

²Amso mawichi, tavochi hawi ngochi py nang ai jei naimy awm u ai, nichi ly nang i sa thai naira anui y heng u ai.

³Nangchi ly huni amso mawi hawi amti amjangchi cha pajau mang; huni bawibawi ly nangchi cha ai nai kang pei nai ne.

⁴Na i py thi abawi nai mawi cho moh; hengra ly thi y awm nai deaungkho y cho y ai nai, kaimy leu kang pei.

⁵Khumi ami py, khumi ai padei baly mymy ai pajeng teang ai. Khumi ai padei nai amso mawi ai ly kaimy padei teang ai.

⁶Tameuh mymy ka-tawm khyp naimy khumi ai sa nai ne i, amimi py khumi ai padei nai keung ai ly ami my padei teang ai.

⁷“Nangchi ly cho chanau neangneang so u; naibaly nangchi i kangpreang ly khaileaung pri verei y peung u ai,” napi.

⁸Tameuh my Nova hawi chapochi teng y,

⁹“Vai kai ly nang hawi py, nang i kangpreangchi hawi py Leu Maikawm asa ai;

¹⁰nang hawi vanrei paleaung pui theung i theu nai, heng nai amjy cheaungkhang, tavochi hawi amso mawichi hawi py sa ai.

¹¹Heng nai amjy cheaungkhangchi ai tui hawi taphra bi y ai nai nangchi hawi Leu Maikawm sa mang.

¹²Kaimy nang hawi sa nai Leu Maikawm ly heng nai amjy cheaungkhangchi i vui deungtasarei khaw hai nai ka-ma-ra ne.

¹³Kaimy tamai salo y seaungjai kang khai pi mang. Huni ly kai hawi khaileaung pri sala y kai i Leu Maikawm sa nai ka-ma-ra ne.

¹⁴Kani mang tamai salo y seaungjai amteng nai tleirei,

¹⁵kaimy heng nai amjy cheaungkhangchi ai py, amso mawichi ai py, tui hawi taphra bi y leang bo, nanai nang teng y leu adeu nai ly kapany jo ai mang.

¹⁶Tamai salo y seaungjai amteng nai kaniu nai kha y, khaileaung salo y heng nai amjy cheaungkhangchi hawi, kai hawi sala deungtasarei Leu Maikawm asa nai ai ly kapany jo ai.

¹⁷Huni ly kaimy heng nai amjy cheaungkhangchi hawi leu adeu nai ka-ma-ra ne,” napi.

¹⁸Paleaung pui i dengdairei theu nai, Nova i chapochi ly Sema, Hama hawi Japhethchi ne. (Hama ly Kanan i ampo ne.)

¹⁹Khaileaung pri verei y awm nai khumi bawibawichi ly Nova i chapo leaung thomrei kangpreangchi ne.

²⁰Nova ly li hlau py, kreip akho py sa man nai keung ne.

²¹Mymy ly kreip hang pavui nai deaungkho y, ateaung aleng pan iy kanih tangbeung theung y jawn jo bo.

²²Kanan i ampo, Hama ly ampo tlang ka-keu naimy jawn jo nai niu i, angam mang y theu iy amnau ni teng y thui pi.

²³Naibaly Sema hawi Japheth nini ly kanih la iy paleang y achang hawi naimy nithun mang anaw hawi; ampo tlang ka-keu naimy jawn jo nai ly khen hawi y nai deaungkho y niu y nai ka-awi sa hawi i, ampo ai kanih khiu hawi bo.

²⁴Nova ly cheng vau nai khala chapo katheang i sa nai ly pany bo.

²⁵Mymy ly “Kanan ly amsawi lawi kalei sy! Mymy ly amjo amnauchi teng y miseaung achei sy.

²⁶Sema i ARENG Tameuh ai ly palo u! Kanan ly Sema teng y miseaung achei sy.

²⁷Tameuh my Japheth ai ly tahm pasang sy! Mymy i kangpreangchi ly Sema hawi vanrei awm u jojo sy! Kanan ly Japheth teng y miseaung achei sy,” napi.

²⁸Tuibai tuitleng theu nai bo y, Nova ly saneng chungvai thom palyh vui pangrei heng rai.

²⁹Naibaly saneng chungvai takaw hongan vui pangrei khala y dei bo.