Read Khumi Chin 2 SAMUELA 11 Bible Online

2 SAMUELA 11 - Khumi Chin bible

2 SAMUELA 11

¹Huni saneng nisa theu nai, samrangchi tavai atiu reng nai neng tym nai khala y, Davida ly Juaba ai my i tavai luchi hawi, Israela tavaimi kamkawmchi ai pato i, nichi ly Ammon khumichi ai tiu nai pajau iy Rabah mary ai taki meuh vui bo. Na i py Davida ly Jerusalem mary y awm jo nai ne.

²Kanirei nai khala y Davida ly kani thun y i nai anglaw i, samrang yhm amphu salo y lyn kalau iy aleaung nai thym khala y, neampachy leaungrei tui ahiu nai niu; huni neampachy ly khen nai mo-cha khri pa-rei hawi parai nai ne.

³Naibaly Davida ly khumi pato i, ami mo nanai deng hai. neampachy ly Eliam i chaniu, Hiti cheng Uriah i aju Bathaseba ne, nanai pany bo.

⁴Samrang ly khumi pato i, huni neampachy ai palau hai iy nihawi i ahawi bo. (Bathaseba ly neampachychi i tlangchai tym i, pachai pyn chum nai neng ne.) Naibaly neampachy ly yhm mang y vawi ali teang bo.

⁵Huni bo y neampachy ly deaungdi aniu i, Davida teng y satang thai hai nai ne.

⁶Huna nai khala y Davida ly Juaba teng y, “Hiti cheng Uriah ai kai teng y pato,” napi ai nai khumi pato. Hunaibaly Juaba ly Uriah ai Davida teng y pato bo.

⁷Uriah tym nai khala y Davida ly Juaba hawi tavaimichi i noso satang hawi, tavai atiu nai satangchi deng.

⁸Naibaly samrang ly Uriah teng y, “Yhm mang y vawi ly amdaw nem ba,” napi. Uriah theu jo nai khala y Davida ly yhm mang y langseaung tha pi bo.

⁹Na i py Uriah ly yhm mang y vawi y naimy, tamcheaung tym naichi hawi vanrei, samrang i yhm katheu pa-khora y i nai ne.

¹⁰Davida my Uriah ly yhm mang y vawi y nai satang thai i ni teng y, “Nang ly khuleaung kamlora i vaimy tym nai ne i py, ati mana nai yhm mang y vawi y lawh mo? nanai deng.

¹¹Uriah my, “Israela khumichi hawi Juda khumichi ly kamlo paraira y, tavai atiu naimy awm u nai ne. Leu Maikawm Pawm py nichi hawi vanrei awm. Kai i tavailu areng Juaba hawi tavai luchi py, angdym angdengra y tai u nai ne. Ati mana nai y kai ly yhm y vawi iy cha nei naimy, aju hawi amo theu i pajau ai mo? Kai ly huna nai so y ai, nanai vaineng abeu bo!,” nanai pathang.

¹²Naibaly Davida my, “Tuna baly hini meingtym y my, vaini amdaw rai, khawndam ly kang pato teang ai,” napi. Naibaly Uriah ly huni kani hawi khawn pa-nyh ryrei, Jerusalem mary y awm.

¹³Davida ly ni ai dym biu cha ai nai palau i, pavui pa-rei nei cha hai bo. Na i py Uriah ly huni dym py yhm y vawi y naimy, samrang yhm tamcheaung typ naichi i meingtym y kanih bai iy i nai ne.

¹⁴Khawn mang y Davida ly Juaba teng y cha harei tajiu i, Uriah nithun pa.

¹⁵Tajiu nai cha ly “Tavai ho keh nai mo mang y Uriah ai pato. Naibaly dei hai ai nai nang ly anaw veng,” nanai ne.

¹⁶Naibaly Juaba ly mary ai katanmeuh nai thym khala y, Uriah ai atho awm parai nai paleung ka-echi mang y pato bo.

¹⁷Paleung ka-e tavaimichi ly mary i nai theu iy, Juaba i tavaimichi hawi atiu u i, Davida i tavau lu phyreichi dei nai ne. Huna nai dei naira y Uriah py abawi teang.

¹⁸Naibaly Juaba ly Davida teng y tavai atiu nai satang pa i,

¹⁹savai teng y, “Tavai atiu nai satangchi samrang teng y amti pi chum nai khala y,

²⁰samrang ly kado theu naimy, ‘Nangchi ly paleung ka-echi ai tiu ai nai mary sahawi y ati mana nai chei u lawh mo? Paleung ka-echi my mary apai salo mang dengdairei, thailiho hawi ang ko ai, nanai pany u y nai sai a?

²¹Kideon i chapo Abimelek ly ati mana dei mo, nanai pany u y nai sai a? Thebe mary i neampachy leaungrei ly mary apai salo mang dengdairei, choh nip naira sum hawi, ni ai pala hai ka bo. Ati mana nai deaungkho y nangchi ly mary apai sahawi mang y chei u lawh mo?’ nanai angdeang baly ni teng y, ‘Nang i tavailu Uriah py dei bo’ nanai amti pi,” napi.

²²Naibaly savai ly Davida teng y tym i, Juaba i leu pei nai kamta amti pi bo.

²³Ni ly samrang teng y, “Paleung ka-echi ly kaichi tleaung y atho awm i, kaichi ai tiu ai nai mary theung i dengdairei, mary angam mang y theu u. Na i py kaichi ly nichi ai mary apai pa-kho y tym teang pa-rei tiu bo.

²⁴Naibaly nichi ly mary apai salo mang dengdairei thailiho hawi ang ko i, nang i tavailu phyreichi dei, nang i tavailu Uriah py dei bo,” nanai amti pi.

²⁵Davida my savai teng y, “Tavai keung y ly ami dei ai mo, nanai ami py thui khyp thai y. Hunai deaungkho y Juaba teng y paleung phra y ai nai, atho pei nai leu thui pi. Ham parai naimy atho sa teang iy, huni mary tiu vui pajau ai nai py thui pi,” napi.

²⁶Bethaseba ly my i juvo dei nai satang thai nai khala y, paleung si vo tangam bo.

²⁷Vo tangam nai neng tem nai khala y, Davida ly ni ai samrang i yhm y palau hai i, samrangnu ra y palyn iy chapo tapen bo. Na i py ARENG ly Davida i sa nai sai khrei pi y nai ne.