Read Khumi Chin 2 SAMUELA 13 Bible Online

2 SAMUELA 13 - Khumi Chin bible

2 SAMUELA 13

¹Davida i chapo Abasalom ly amyn Tamar napi nai, mo-cha kahawi tuicho awm. Davida i chapo Amanon ly huni tuicho ai khri pa-rei khrei.

²Ni ly Tamar ai khri pa-rei khrei nai deaungkho y, paleung bi no nga bo. Tiucho ly anglo lengmyn ne i, Amanon ly my i ngai nai aly nga ai nai ka-vo dawn pajau y na.

³Na i py ni ly Jonada napi nai ahawi awm. Jonada ly Davida i amjo Shamah i chapo ne. Ni ly khri pa-rei tau cheng nai khumi

⁴Jonada my Amanon teng y, “Nang ly samrang i chapo ne iy, kani tleirei paleung bi nai kang niu bo. Ati mana nai mo nanai kai ai thui pi cham,” napi. Amanon my, “Kai ly ampo vanrei, amhm takhra nai amjo Abasalom i tuicho Tamar ai kakhrei nai ne,” napi.

⁵Jonada my ni teng y, “Nang ly ira tleaung y aseaung ly no ka-awi so. Ngampo my no de nai khala y, ‘Kai i tuicho Tamar ly kai ai pacho panei ai nai kai teng y pato pi kyh. Kai i mo y biu an amsi nai, ni my kai ai pasawm patau pacho panei sy,’ nanai takeng,” napi.

⁶Hunai deaungkho y Amanon ly ira tleaung y aseaung i, no ka-awi sa bo. Samrang Davida ly no de nai ni teng y chei i, Amanon my, “Tamar ai kai teng y pato pi ly kai i mo y tako maidenreichy sa hai iy, ni i kiu hawi kai ai pacho pi sy,” napi.

⁷Hunaibaly Davida ly samrang yhm theung y awm nai Tamar teng y khumi pato i, “Amanon i yhm y chei ly ni i vui teicha teinei so pi,” nanai leu taviu bo.

⁸Tamar tym nai khala y Amanon ai, ira tleaung y aseaung nai niu. Tamar ly tako dei maidanrei la iy nip i, Amanon i mo y tako maidanrei sa pi. Naibaly tako paawp i,

⁹Amanon cha ai nai paawpra i tako la iy khai pi bo. Na i py Amanon ly cho y i, “Khumichi ly kai teng i nai theu u pawn,” napi. Nichi ly theu u pawn bo.

¹⁰Huna nai khala y ni ly Tamar teng y, “Tako ly kai i ira mang y jeu hai ly kai ai tui,” napi. Tamar ly my i sa yb nai tako syn iy, Amanon teng y chei hai bo.

¹¹Tako talam pi nai khala y Amanon ly Tamar i kiu ai amkhaw iy ryh i, “Kai hawi vanrei i ahawi sina,” napi.

¹²Tamar my, “Hini hawi y nai so moh! Hini ly amso ngai hawi nai ne!

¹³Kai ly khumichi theung y mana meimai amteng vam ai mo? Nang py Israela chengchi theung y, pipi tahm awm ai ny y. Pahen parai naimy samrang teng y takeng ba. Huna nai takeng baly samrang my kai ai, nang teng y pei y nai ly awm ai ny y,” napi.

¹⁴Na i py Amanon ly Tamar i leu tangai pi y. Ni ly Tamar tleaung y atho awm nai deaungkho y, Tamar ai pajang bo.

¹⁵Hunaibaly Amanon ly Tamar ai pipi niu ngai y vui nai ne. Ni ly vaichi khala y khri pa-rei khrei teu i py, vai ly pipi niu ngai y lawh nai deaungkho y Tamar teng y, “Theu la!” napi.

¹⁶Tamar my, “Kai ai hina nai patheu nai ly vaichi khala y nang i sa tamang nai kamngo tleaung y malawn py, typ keh na ly!” napi. Na i py Amanon ly Tamar i leu tangai y naimy,

¹⁷ni ly my i miseaung ai palau iy, “Hini neampachy ai kai i mei ka-niu i nai patheu vui ly katheu atleang veng! napi.

¹⁸Miseaung ly ni ai angam mang y patheu vui i, katheu atleang hai vui bo. Tamar ly huni neng khala y yhmtheaung so y rai nai, samrang i chaniuchi amchiu reng nai baichu kasau amchiu nai ne.

¹⁹Tamar ly my i lu y maidym aphui i, ateaung py sei iy meimai y kiu hawi atamym naimy, vo nai tarawi y theu jo bo.

²⁰Ni i ampro Abasalom my, “Nang ai Amanon my mei aniu y nai kangji ang pei a? Nang ly takhra ami teng y py thui moh. Ni ly nang hawi ampo vanrei, amhm takhra nai tuicho ampro ne. Hini molam y paleung hawi y nai awm moh,” napi.

²¹Davida ly huna nai sa nai saichi thai nai khala y, khri pa-rei kado theu bo.

²²Abasalom ly my i tuicho Tamar ai Amanon my pajang nai molam y, Amanon ai pipi niu ngai y i, leu arum hai y naimy awm bo.

²³Saneng nyhrei nai bo y Abasalom ly Ephraim mary sahawi Balahazor avang y, mymy i beram mui vau nai pawi sa. Naibaly ni ly samrang i chapo bawibawichi ai, huni pawira y palau nai ne.

²⁴Ni ly samrang Davida teng y chei iy, “Samrang awi, kai ly beram mui vau nai pawi sa ai i, nang hawi bangtangchi py jeu u ba,” napi.

²⁵Samrang my, “Deang awi, kaichi kang jeu y leang bo. Kang jeu lawh baly nang i vui myn ji parai ai,” napi. Abasalom ly samrang ai ngo y, nga pa-rei palau teu i py samrang ly abang y i, Abasalom ai amtheaung hai iy tako hai bo.

²⁶Na i py Abasalom my, “Tuna lawh baly ati py ne sy, kai i amjo Amanon ai chei ai nai pei ba,” napi. Samrang my, “Ati deaungkho y ni ai chei hai ai mo?” napi.

²⁷Na i py Abasalom ly ngo y, nga pa-rei, palau akhikan bo. Naibaly kangkhym y ly samrang my Amanon hawi takhra chapochi ai chei ai nai pei pi nai ne.

²⁸Abasalom ly samrangchi hawi amlau nai cha nei pawi pui angveirym iy miseaungchi teng y, “Amanon ly kreip hang nei nai pavui tleaungleaung nai khala y, kaimy leu kang pei ai. Huna nai khala y nangchi ly ni ai tleh u, jei u moh. Kaimy rara ne sy. Vam parai naimy so u! mynkym u moh! " napi.

²⁹Miseaungchi ly Abasalom my leu pei nai kamta, Amanon ai padei u bo. Hunaibaly Davida i takhra chapo bawibawichi ly mymychi i keaungngo kano kasau atang u iy preang u nai ne.

³⁰Nichi ly yhm y vawi nai, lam y awm u rai nai thym khala y, “Abasalom ly nang i chapo bawibawichi ai tleh pawn bo; leaungrei py tleaung y nai ne,” nanai satang ly Davida teng y tym.

³¹Samrang ly paleung si parai naimy, mymy i ateaung sei iy khaileaung y atlym na bo. Huni meingtym y samrang hawi vanrei awm nai miseaungchi py, mychi i baichuchi sei u teang.

³²Na i py Davida i amjo Shamah i chapo Jonada my, “Samrang awi, nang i chapo bawibawichi ai tleh nai ny y leang. Amanon leaungrei ai tleh nai teu. Abasalom ly my i tuicho Tamar ai Amanon my pajang nai kani dengdairei, hina nai sa ai nanai dawn yb nai ly ni i meimai y amny nai ne.

³³Naibaly nang i chapochi dei pawn bo, nanai satang ly ym moh ba. Amanon leaungrei naini dei nai teu,” napi.

³⁴Huna nai thym khala y Abasalom ly preang veng bo. Naibaly kra y naimy tamcheaung typ nai leaungrei ly Horonam mary lam, mawi salo mang khumi phyrei satla nai niu i, samrang teng y, “Horonam lam mawi salo mang, khumi phyreichi ang satla u,” napi.

³⁵Jonada my Davida teng y, “kaimy kang thui pi nai kamta, huni khumichi ly nang i chapochi ne,” napi.

³⁶Ni i leu tem phai tem baly Davida i chapochi ly tym u bo. Nichi vo u nai deaungkho y, Davida hawi bangtangchi py khri pa-rei vo u nai ne.

³⁷Abasalom ly preang i, keshura pri Amihud i chapo Talamai teng y chei. Davida ly Chapo Amanon i vui y, kani kra parai pa-rei vo tangam nai ne. Abasalom ly keshura pri y saneng thomrei awm.

³⁹Samrang ly dei veng nai Amanon i molam y paleung si rym nai bo baly, Abasalom ai paleung si hai bi nai ne.