Read Khumi Chin 2 SAMUELA 16 Bible Online

2 SAMUELA 16 - Khumi Chin bible

2 SAMUELA 16

¹Davida ly mawi saleung palem prei nai khala y Mephiboseth i miseaung Ziba hawi avum. Ziba ly tako phi chungvai nyhrei, kreip athai kajei phrawn chungvairei, kreip athai kangmyn phrawn chungvairei hawi kreip hang mawipeih adym kawirei, hunichi ai keaungngo kano kasau nyhrei tleaung y tang naimy tym hai bo.

²Samrang Davida my, “Nang ly hini vawnsaichi ai ati aly jeu hai nai mo?” nanai deng. Ziba my, “Hini keaungngo kano kasauchi ly areng nang i yhm dengtheungchi atang ai nai ne; tako hawi thengthaichi ly nang i khumichi cha ai nai ne i, kreip hang ly daichi ka-vym theung y nichi akawm u nai khala, nei ai nai ne,” nanai pathang.

³Samrang my, “Nang i yhmkeung, Sawla i katu Mephiboseth ly ma y mo?” nanai deng. Ziba my, “Ni ly vai Jerusalem mary theung y awm; ati mana nai mo nabaly Israela chengchi my, ni i amsipui Sawla teng i pri ly my teng y au ai, nanai ym nai deaungkho y ne,” nanai pathang.

⁴Samrang my Ziba teng y, “Mephiboseth i peang nai yhmtheaung katui ngiereichi ly nang teng y kang pei ai,” napi. Ziba my, “Kai ly nang i miseaung ne; kai ly nang teng y meimai ngo jojo sy!” nanai pathang.

⁵Davida ly Bahurim mary y tym nai khala y, Sawla i amjo amnau ka-bi Kera i chapo Shimei ly Davida ai pasawi naimy mary theung i nai theu bo.

⁶Davida ai tamcheaungchi hawi khumichi my taki teungtareung teu i py, Shimei ly Davida hawi bangtangchi ai lengseaung hawi aphi.

⁷Shimei my, “Khumi ai padei nai keung! kamngocho! leh la! leh la!

⁸Nang ly Sawla i pri lawm vui iy, ni i dengtheungchi ai padei nai molam y vai, ARENG my nang ai pajeng nai bo. ARENG ly nang i chapo Abasalom teng y pri au vui bo. Nang khumi ai padei nai keung awi! nang ly ati sai py ny y nai lawm bo,” nanai pasawi nai ne.

⁹Zeruiah i chapo Abisai ly samrang teng y, “Areng awi, ati mana nai hini ui kadei ai ly ati mana nai nang ai pasawi ai nai pei lawh mo? Kai ly chei iy ni i lu tameang vui si!” napi.

¹⁰Samrang ly Abisai hawi ni i amjo Juaba teng y, “Hini ly nang i kalop ny y leang; ARENG my leu pei nai deaungkho y, kai ai pasawi nai ne lawh baly ni teng y, ‘nang ly ati mana nai y hina nai sa lawh mo?’ nanai ami my deng ai mo?” napi.

¹¹Naibaly Davida ly Abisai hawi samrang i bangtangchi teng y, “Kai i chapo kypkyp my malawn py kai ai padei ai nai sa nai deaungkho y, hini benjamin khumi i sa nai ly lyh u lawh a? Mymy ngai ngai so sy, pasawi teu sy; ARENG my leu pei nai deaungkho y, ni ly hina nai sa nai ne.

¹²ARENG ly kai i patang nai niu nai deaungkho y, huni khumi i pasawi nai jeng y, amtheaung naira ang pei tang ang pei lym ai,” napi.

¹³Naibaly Davida hawi my i nithun abang naichi ly tako u bi nai ne. Shimei ly mawi laileaung mang tako i, pasawi nai tarawi y lengseaungchi hawi aphi; spryhchi hawi py hei bo.

¹⁴Samrang hawi my i khumi bawibawichi ly Jordan tavo y tym nai khala, akawm u nai deaungkho y, hu y amdaw u bo.

¹⁵Abasalom ly my i nithun abang nai Israela cheng bawibawichi hawi vanrei, Jerusalem mary y kun bo. Nichi hawi vanrei Ahithophela py abawi nai ne.

¹⁶Davida i ka-ym awm nai ahawi Hushai ly Abasalom ai avum nai khala, “Samrang ly heng sau sy! Samrang ly heng sau sy!” nanai aeu naimy lamchung bo.

¹⁷Abasalom my, “Nang i ahawi Davida i tlang tleaung y ka-ym awm nai sai ly mana vui lawh mo? Nang ly ati mana nai deaungkho y, ni teng y abang y lawh mo?” nanai deng.

¹⁸Hushai my, “Kai ly mana abang thai ai mo? ARENG my vawi takhra nai keung, hini khumichi hawi Israela cheng bawibawi my vawi takhra nai keung i miseaung y kaawm ai; kai ly nang hawi vanrei awm ai.

¹⁹Kai ly kaimy yhmkeung i chapo teng y kalop so y baly, ami teng y kasa ai mo? Kai ly nang i ampo i kalop sa pi nai kamta vai, nang i kalop sa ai,” napi.

²⁰Naibaly Abasalom my Ahithophela mang y amhi iy, “Vai, kaichi ly ati sa ai mo? kaichi ai tau pei kyh ba,” napi.

²¹Ahithophela my, “Samrang i yhm typ ai nai ngampo my khai nai samrangnu ai kry naichi teng y kun ly nichi hawi i ahawi; huna nai sa baly ngampo ly nang ai paleung ka-e palawn bo, nanai khumichi my pany nai khala, nang i nithun abang naichi ly khri pa-rei atho nga u ai,” napi.

²²Naibaly Abasalom ly samrang i yhm amphu salo y kanih tangbeung jang hai chum baly, khumichi i mei ka-niu y ampo i samrangnu ai kry naichi hawi i ahawi bo.

²³Hunai thym khala y khumichi my Ahithophela i tau pei nai ly Tameuh teng i tau pei nai palawn u. Davida hawi Abasalom nini py dawn hawi teang bo.