Read Khumi Chin 2 SAMUELA 18 Bible Online

2 SAMUELA 18 - Khumi Chin bible

2 SAMUELA 18

¹Samrang Davida ly my i khumichi ai angym hai iy, leaung sangrei kamkawm, leaung chungvairei kamkawm sa i, hunichi ai peang ai nai tavai luchi khai bo.

²Naibaly ni ly huni tavaimi kamkawmchi ai phy thomrei phy iy pato. Phy harei ly Juaba teng y, phy harei ly Juaba i amnau Abisai teng y, takhra kamkawm harei ai ly kath mary i Itai teng y au iy lu sa hai bo. Naibaly samrang ly my i khumichi teng y, “Kaimy py nangchi hawi vanrei chei ai,” napi.

³Khumichi my, “Nang ly kaichi hawi vanrei chei moh ba; kaichi bawibawi preang pawn lawh teu i py, kaichi theung i ka-hyhrei dei lawh teu i py, paleung ka-echi i vui ly ati sai py ny y leang. Nang ly kaichi khumi leaung meaung kateaungrei hawi ahyh nai ne. Nang ly mary theung y awm iy kaichi ai sabawm nai ly hawi keh ai,” nanai thui u.

⁴Samrang my py, “Nangchi my hawi keh nai dawn nai kamta, kasa ai,” napi. Naibaly ni ly leaung sangrei kamkawm, leaung chungvairei kamkawmchi tavai amsa u nai thym khala y, mary apai katheu sahawi y angdo bo.

⁵Davida ly Juaba, Abisai hawi Itai teng y, “Kai i meimai y dawn iy deaungdi Abasalom ai patang naira tym hai moh ba,” nanai leu taviu. Hina nai kamta tavai luchi teng y leu taviu nai ly tavaimichi thai u bo.

⁶Davida i tavaimi kamkawm ly Israela chengchi ai tiu ai nai mary angam mang y theu u iy, Ephraim daichi theung y atiu u bo.

⁷Israela chengchi ly Davida i khumichi kiu y, khrikhri pa-rei tavai sum u. Huni kani y mychi mang i khumi leaung 20,000 rei dei u nai ne.

⁸Atiu nai ly daichi theung mang y ahei phro na i, daichi theung y dei nai ly tavai keung y dei nai khumichi tleaung y malawn py nawi nai ne.

⁹Abasalom ly Davida i khumi phyreichi hawi, vaimy avum bo. Ni ly keaungngo kano kasau atang iy, ngopraibiu keung pui anui y kun i, ni i kaneaung ly dengkeaung changpichi ra y atakei thleng bo. Keaungngo kano kasau ly ampreng veangveang nai deaungkho y, Abasalom ly ali theung y abang leaunglang naimy amjo bo.

¹⁰Davida i khumi leaungrei ly ni ai niu i Juaba teng y, “Areng awi, Abasalom ly ngopraibiu keung tleaung y abanghau nai kaniu bo!” napi.

¹¹Juaba my, “Nang niu nai ne baly ati mana nai huni meingtym y my padei y lawh mo? nang phai padei lawh baly nang ai tangka chang tlau horei hawi khobai py langseaung kang pei ai chybo,” napi.

¹²Na i py huni khumi my, “Nang ly kai ai tangka chang sangrei pei lawh teu i py, kai ly samrang i chapo ai kiu pajeung kadeaungchy hawi malawn py, kateaung ai ny y. Samrang my nang ai py, Abisai hawi Itai ai py, ‘Kai i meimai ai dawn iy deaungdi Abasalom ai ly patang hai u moh ba,’ nanai leu ang taviu nai ly achi bawibawi my thai nai ne.

¹³Na i py kai ly samrang i leu pei nai tangai y naimy, Abasalom ai padei lawh ai nabaly samrang my thai y, pany y nai ly ati sai py by y nai deaungkho y, huni satang ly thai tanga ai. Huna nai khala y nang ly kai mang y asa iy thui pi ai ny y leang,” napi.

¹⁴Juaba my, “Kai ly nang hawi neng pasum atyhtyh bi ai nai ngai y leang bo,” nanai thui chum baly tivi jeung thomrei syn iy, ngopraibiu keung ra y abang hau naimy heng rai nai Abasalom i paleung y thun vau bo.

¹⁵Naibaly Juaba i risa leaung horeichi ly Abasalom ai padei u preu bo.

¹⁶Juaba ly atiu nai anawn hai ai nai baw eng hai bo. Naibaly ni i tavaimichi ly Israela chengchi ai tiu naira i nai ali u teang bo.

¹⁷Nichi ly Abasalom i veu la iy daichi theung i angawm kathiu harei theung y aphi i, lengseaungchi hawi taphum u bo. Israela cheng bawibawichi py mychi i awm nai meingtym tleirei y preang u nai ne.

¹⁸Abasalom ly mymy teng y chapo by y nai deaungkho y, my i amyn tamo y ai nai heng nai thym khala y my, samrang leaunghawira y leaungcheng pado iy, mymy i amyn Abasalom leaungcheng, nanai vaini khrairei amyn awm jo nai ne.

¹⁹Naibaly Zadok i chapo Ahimaz ly Juaba teng y, “ARENG ly samrang ai paleung ka-echi kiu i nai atleu bo, nanai satang kahawi ly samrang teng y thai hai ai nai pei,” nanai takeng.

²⁰Juaba my, “Vaini nang ly mani satang kahawi ai py thai hai moh; takhra kani ha harei khala, thai hai ai nai kang pei ai. Samrang i chapo dei bo i, vaini chei ai nai avo y,” napi.

²¹Naibaly Juaba ly my i miseaung Kusi cheng khumi teng y, “Chei ly nang i niu naichi samrang teng y amti pi,” nanai thui i, Juaba ai lu meung chum baly ampreng jo bo.

²²Ahimaz my, “Kai ai py huni satang thai hai ai nai pei ba; ka-jeira avum ai nai ne teu i py, kai ly ati sai py dawn y leang,” nanai takeng bi. Juaba my, “deang awi, nang ly ati mana nai hini satang thai hai ai nai ngai lawh mo? Huna nai sa nai molam y kawn vang ngo y leang,” napi.

²³Ahimaz my py, “Ka-jeira avum ai nai ne teu i py, kai ly chei ai nai ngai,” nanai hnei taleang bi. Juaba my, “Hina nai ne lawh baly nang, chei ba,” napi i, Ahimaz ly Jordan tavo leaunghawi lam mang angpreng iy, Kusi cheng khumi ai katlen vui bo.

²⁴Davida ly mary angam katheu hawi angtheung katheu sala i, khaileaung adymchyra y ateh nai ne. Tamcheaung ly mary apai salo y lyn iy, apai katheu salo mang angdo iy khen baly, khumi leaungrei ahawi abawi y naimy angpreng tapai nai niu.

²⁵Samrang teng y aeu iy thai hai bo. Samrang my, “Huni khumi ly bengtlairei kyh lawh nabaly, satang kahawi ang syn nai ne lym ai,” napi. Angpreng naimy jeu nai khumi py, sahawi y tym bo.

²⁶Huna nai khala tamcheaung ly khumi takhra leaungrei angpreng naimy ang jeu nai niu bi i, apai katheu typ nai keung teng y, “Khen cham! khumi takhra leaungrei, angpreng naimy ang jeu tapai bi bo!” nanai aeu iy thui pi. Samrang my, “Huni khumi py satang kahawi syn nai khumi ne lym ai,” napi.

²⁷Tamcheaung my, “Angchei i khumi angpreng nai ly Ahimaz i angpreng nai hawi atawm,” napi baly samrang my, “Ni ly khumi kahawi ne i satang kahawi ang syn pi ai,” napi.

²⁸Ahimaz ly samrang ai chibai sa chum baly, ni i mo y khaileaung y ambeu naimy, “Paleung ka-echi i tlang tleaung y samrang nang ai eaung hai nai keung nang i ARENG Tameuh ly nang parai nai awm sy!” napi.

²⁹Samrang my, “Deaungdi Abasalom ly hawi a?” nanai deng. Ahimaz my, “Aw areng, kai ai nang i tavailu areng Juaba my pato nai thym khala y khrukhrala nai thym ne nai deaungkho y, kai ly pathang thai y leang,” nanai pathang.

³⁰Samrang my, “Humang y asyh ly angdo ba,” napi baly Ahimaz ly asyh iy angdo bo.

³¹Naibaly Kusi cheng khumi ly tym i samrang teng y, “Kai ly samrang nang i vui satang kahawi kang syn pi nai ne. Vaini nang ai ARENG my paleung ka-e bawibawichi tlang tleaung y eaung hai bo!” napi.

³²Samrang my, “Deaungdi Abasalom hawi rai a?” nanai deng. Kusi cheng khumi my, “Areng, nang i paleung ka-echi hawi nang ai tiu u nai khumichi ly huni Abasalom kamta lawm u na sy,” nanai pathang.

³³Samrang ly khri pa-rei paleung si tangam naimy, mary apai katheu amphu salo y awm nai takun theung mang y chei iy vo bo. Huna nai lyn kalau nai thym y, “Aw kai i chapo! kai i chapo Abasalom! Abasalom kai i chapo! nang i jeng y kai dei ai nai ngai. Kai i chapo Abasalom! kai i chapo!” nanai vo tangam bo.