Read Khumi Chin 2 SAMUELA 2 Bible Online

2 SAMUELA 2 - Khumi Chin bible

2 SAMUELA 2

¹Naibaly Davida ly ARENG teng y, “Kai ly Juda marychi theung i mary ha hareira y chei iy peang ai a?,” nanai deng. ARENG my, “Ne, chei pajau mang,” nanai pathang. Davida my, “Mani mary y mo?,” nanai deng. ARENG my, “Hebron mary y chei,” napi.

²Naibaly Davida ly my i aju leaung nyhrei, Jezarela mary i Ahinoam hawi Karamela mary Nabala i aju lumai Abikaila ai hawi iy, Hebron mary y chei.

³Ni ly my i khumichi hawi yhm dengtheungchi ai raurei hawi iy, Hebron mary sahawi i marychira y awm hai bo.

⁴Hunaibaly Juda mipuichi ly Hebron mary y jeu u iy, Davida ai Juda samrang y palyn u bo. Sawla i veu ai Kilead pri Jabe mary i khumichi my up nai satang Davida thai nai khala y,

⁵huni khumichi teng y khumi phyreichi ai pato i, “Nangchi ly Sawla i veu up nai molam y, amychi i samrang ai ka-ym awm nai sai amteng bo. Hunai deaungkho y ARENG ly nangchi ai amtheaung hai sy.

⁶ARENG ly nangchi ai ka-ym awm naimy pahen sy; nangchi i sa nai sai hawi nai molam y, kai py nangchi ai pahen ai.

⁷Nangchi ly vam parai naimy atho so u! Nangchi i samrang Sawla ly dei veng bo i, Juda mipuichi my kai ai mychi i samrang lawm ai nai asitui ang leih pi bo,” nanai pany hai nai cha tajiu iy pei pi nai ne.

⁸Sawla i tavailu areng, Nera i chapo Abana ly Sawla i chapo Isboseth hawi vanrei Jordan tavo angpeang iy, Mahanaim mary mang y preang hawi bo.

⁹Abana ly huni mary Kilead khu ka-peang, Aser[1]khu ka-peang, Jezarela khu ka-peang, Ephraim khu ka-peang, Benjamin khu ka-peang hawi Israela pri verei peang ai nai, Isboseth ai samrang palyn bo.

¹⁰Isboseth ly Israela samrang lawm nai thym khala y, saneng vui palyhrei awm i, saneng nyhrei peang ai nga. Na i py Juda chengchi ly Davida ai tahm khai u bo.

¹¹Davida ly Hebron mary y awm iy, Juda pri ai saneng saryhrei bo y lo tariurei peang nai ne.

¹²Abana ly Isboseth i tavaimichi hawi vanrei, Mahanaim mary i dengdairei Kibeon mary mang y chei bo.

¹³Zeruiah i chapo Juaba hawi Davida i tavaimi risachi py, Kibeon tuikan sahawi y tym iy, nichi hawi avum u. Nichi khumi kamkawm nyhrei ly tuikan i makeng makengrei mang y meingtym la u.

¹⁴Abana my Juaba teng y, “Achi makeng makengrei mang i thawndeang phyreichi ai tavai tiu hai u sina,” napi. Juaba my, “Hawi mang, atiu u sy,” nanai pathang.

¹⁵Hunai deaungkho y Isboseth hawi Benjamin khumichi i jeng y khumi leaung holai nyhreichi ly Davida i khumi leaung holai nyhreichi hawi tavai atiu u bo.

¹⁶Khumi luteng mymy hawi atiu ai tla nai khumi hawi, lu tengtawi amkhaw iy haisau hawi pana y athun u i, nichi bawibawi ly dei u bo. Hini molam y Kibeon khu ka-peang i hini meingtym ai “atleh ahum nai angdym,” nanai palau u.

¹⁷Naibaly khri pa-rei tavai atiu u i, Abana hawi Israela mipuichi ly Davida i khumichi kiu y tavai sum u bo.

¹⁸Zeruiah i chapo leaung thomrei, Juaba, Abisai, Asahelachi ly tavai keung y abawi u. Asahela ly sisiu kamta angpreng rang parai nai ne.

¹⁹Ni ly Abana ai patyp iy hui veangveang bo.

²⁰Abana ly nithun mang y khen i ni teng y, “Nang ly Asahela ne a?,” nanai deng. Ni my, “Ne,” nanai pathang.

²¹Abana my, “Kai ai hui moh jau! takhra risa leaung leaungrei ai hui iy patiu ly ni teng i nga nai vawnsai phai lo,” napi. Na i py Asahela ly ni ai hui veangveang nai ne.

²²Abana my, “Kai ai hui veangveang moh; nang ai kang padei ai nai ngai y; nang ai padei lawh baly, nang i ngamjo Juaba teng y kai, meimai mana patei ai mo?,” napi.

²³Na i py Asahela ly hui veangveang nai deaungkho y, Abana ly my i tivi hawi nithun mangmy takhu i, tivi ly Asahela i kajeu y chawm nai ly pri leu vui na. Asahela ly khaileaung y atlym i dei bo. Naibaly ni i dei nai meingtym y tym nai khumi bawibawichi ly mo mang y hui bi y naimy hunira y angdo u bo.

²⁴Na i py Juaba hawi Abisai nini ly Abana ai tiu ai nai hui hawi bo. Nini ly kani dym nai khala y, Kibeon daichi ka-vym mang y chei nai lam sahawi, Kiah mary nisi mang i Ammah mawi y tym hawi bo.

²⁵Benjamin cheng khumichi ly Abana teng y akachu u i, mawi saleung y tai u nai ne.

²⁶Abana my Juaba teng y, “Achi ly tavai atiu u veangveang ai bo a? kangkhym y ly ati sai py ny y naimy, paleung atho di naira tym lawh na, nanai nang niu y nai sai a? Kaichi ly nangchi i suibang ka-meaung amjo amnauchi ne. Nang ly nangmy i khumichi ai, kaichi ai tiu nai anawn hai ai nai leu pei y naimy, awm jojo ai bo a?,” nanai aeu iy thui bo.

²⁷Juaba my, “Nangmy hina nai kamta thui pi y i khyly, kai i khumichi ly nangchi ai khawndam khutawi pa-rei hui u ai, nanai Tameuh kangheng teng y kai ly vaineng abeu bo,” nanai pathang.

²⁸Naibaly Juaba ly baw eng i, ni i khumichi ly Israela chengchi ai hui nai anawn u bo. Hunaibaly tavai atiu nai ly anawn u nai ne.

²⁹Abana hawi my i khumichi ly vum torei, Jordan tavo leaunghawi tako u prei. Nichi ly Jordan tavo angpeang u iy, kani pa-nyh kani khengrei tako u chum baly, Mahanaim mary y tym u bo.

³⁰Juaba ly Abana ai hui nai anawn hai chum baly, my i khumichi ai angym hai bo. Huna nai khala y Asahela hawi khumi leaung holai takawreichi tama nai pany bo.

³¹Davida i khumichi ly Abana i khumi Benjamin cheng theaung khumi leaung 630 reichi ai padei u nai ne.

³²Juaba hawi my i khumichi ly Asahela i veu la iy, Bethlehem mary mymy i yhm dengtheungchi i tapreaung y up nai ne. Naibaly nichi ly vum torei tako u i, khutawi y rai khala y, Hebron mary y tym u ali teang bo.