Read Khumi Chin 2 SAMUELA 20 Bible Online

2 SAMUELA 20 - Khumi Chin bible

2 SAMUELA 20

¹Kilakala mary y Benjamin nupai Bikri i chapo Seba napi nai khumi kamthu kamleaung leaungrei awm. Ni ly baw eng iy, “Davida ai aly ngai y, Kaichi ly ni i nithun abang ai nai ngai y. Israela khumichi awi, achi ly yhm y vawi u sina!” nanai aeu bo.

²Hunai deaungkho y Israela pri i khumichi ly Davida ai khai su iy Seba nithun abang u. Na i py Juda pri i khumichi ly ka-ym awm naimy Jordan tavo dengdairei Jerusalem mary y tym pa-rei, Davida nithun abang u nai ne.

³Davida ly Jerusalem mary y awm nai mymy i yhm y tym nai khala y, samrang i yhm typ ai nai khai jo nai, samrangnu ai kry nai leaung horeichi ai vym vui iy, tamcheaung typ naichi i anui y khai bo. Nichi i vui aly ngai nai ateaung alangchi pei pi teu i py, samrang ly nichi hawi i ahawi y leang. Nichi ly neampachy lumai kamta, deungrei awm u ai nai tla bo.

⁴Samrang ly Amasa teng y, “Nang ly Juda pri khumichi ai pangym ly khawnvai nichi hawi vanrei hini meingtym y tym ai nai tla,” napi.

⁵Amasa ly Juda khumichi ai pangym ai nai theu jo teu i py, samrang i adeu nai khala y tym pajau y nai ne.

⁶Hunai deaungkho y samrang ly Abisai teng y, “Seba ly Abasalom tleaung y malawn py, achi ai rai naira tym hai ai; kai i khumichi ai palau iy ni i nithun hui u; ti y baly ni ly mary apai kakhaw awm nai marychi tiu vui iy, achi kiu i nai tleaung vui lawh na,” napi.

⁷Hunaibaly Juaba i khumichi, samrang i tamcheaung tavaimichi hawi takhra risa bawibawichi ly Abisai hawi vanrei Seba ai hui ai nai, Jerusalem mary i dengdairei theu u bo.

⁸Kibeon mary i lengseaung puira y tym nai khala y, nichi ly Amasa hawi avum u. Juaba ly tavai atiu ai nai tavai ateaung amthyp naimy, haisau ai keura y pacheang iy, akeng y akawm; ni ly mo mang y asyh nai khala, haisau ly ahaw vui.

⁹Juaba ly Amasa teng y, “Ahawi ngai parai nai awi, noso hawi a?” napi iy pachawm ka-awi sa i, lamtang kiu hawi Amasa i labeaung mui y amkhaw cheng.

¹⁰Naibaly Amasa mynkym vui nai thym khala y, Juaba ly langvawi kiura syn nai haisau hawi thun i, tivichi khaileaung y tla iy Amasa ly vaimy dei bo. Naibaly Juaba ly pa-nyh thun bi ai nai aly ngai y bo. Huni bo y Juaba hawi ni i amnau Abisai ly Seba nithun hui u bo.

¹¹Juaba i miseaung leaungrei ly Amasa i veu sahawi y angdo iy, Juaba hawi Davida i khumi ngiereichi ly Juaba nithun abang u!” nanai aeu bo.

¹²Amasa i veu ly lam y thi hawi angtlen na bo. Khumi luteng huni meingtym y tym nai khala anawn u nai ly Juaba i khumichi my niu i, veu ai ly adym mang y ryh vui iy kanih hawi khiu bo. Ati mana nai mo nabaly huni sahawi mang tako nai khumi bawibawichi ly huni veu niu u nai deaungkho y ne.

¹³Lam salo i veu kasyh vui nai khala khumi bawibawichi ly Seba ai patiu ai nai Juaba nithun abang u bo.

¹⁴Seba ly Israela cheng nupaichi awm naira tleirei y amki i, Abelabemakha mary y tym. Hunaibaly akachu u i, Bikri cheng nupai ngiereichi ly ni i nithun abang u nai, mary theung y kun u bo.

¹⁵Naibaly Juaba i khumichi py tym u i, mary theung y Seba aheu nai satang thai nai deaungkho y, mary ai katan u meuh bo. Nichi ly mary angam mang i apai ra abiri iy abyhrachi sa u i, mary apai anawi hai ai nai apai kheutang khaileaung tai u.

¹⁶Huni mary theung y tau cheng nai neampachy leaungrei awm; ni my, “Nangchi tangai u! tangai u! kai ly Juaba hawi leu arum ai nai ngai; ni ai hini meingtym y jeu hai u,” nanai mary apai salo mang aeu bo.

¹⁷Juaba tym nai khala neampachy my, “Nang ly Juaba ne a?” nanai deng. Juaba my, “Ne,” nanai pathang i eampachy my, “Nang ly kai i leu tangai ba,” napi. Juaba my, “Kai, tangai mang,” napi.

¹⁸Neampachy my, “Pany angym ai nai ngai baly Abela mary y chei, nanai thui achi leu awm; khumichi ly huna nai kamta py sa u.

¹⁹Kaichi i mary ly nang parai nai mary, Israela pri tlamsa ai nai ngai keh, ka-ym awm keh nai mary ne. Nang ly hini mary taphra ai nai ati mana nai atho sa lawh mo? ARENG my peang nai ai nang ly phra hai ai nai ngai lawh a?” nanai deng.

²⁰Juaba my, “Huna ny y leang! kai ly mana khala py nangchi i mary taphra ai ny y!

²¹Taphra ai nai py kaichi ly dawn y leang; Ephraim mawira i Bikri chapo Seba napi nai khumi ly Davida ai tiu ai nai sa bo. Huni khumi leaungrei ai kai teng y au baly, kai ly hini mary i nai theu ai mang,” napi. Neampachy my, “Huni khumi i lu ai mary apai salo mang aphi pi ai,” napi i,

²²mary i khumichi teng y chei iy tau pei pi bo. Nichi ly Seba i lu tameang iy, apai salo mang Juaba teng y aphi pi nai ne. Juaba ly baw eng nai khala ni i khumi bawibawichi ly huni mary i nai theu u i, mymychi i awm naira mang y vawi u. Juaba py Jerusalem mary samrang i yhm y vawi tang.

²³Juaba ly tavailu areng keh lawm iy Jehoiada i chapo Benaja ly Davida i tamcheaung typ nai risachi ai peang nai ne.

²⁴Adiniram ly miseaung kamta kalop sa naichi ai peang iy, Ahilud i chapo Jehoshapha ly vuikanai kry nai keung ne.

²⁵Sheva ly Tara jeung i secretary ne iy, Zadok hawi Abiatha nini ly pathyp pi nai keung ne.

²⁶Ja-ira mary i Ira py Davida i pathyp pi nai keung leaungrei ne.