Read Khumi Chin 2 SAMUELA 22 Bible Online

2 SAMUELA 22 - Khumi Chin bible

2 SAMUELA 22

¹Davida ly Sawla hawi takhra paleung ka-echi kiu i, ARENG my atleu pi nai khala y, hini khulym hawi ARENG ai palo bo.

²ARENG ly kai ai atleu nai keung, kai i khaw parai nai khengsi apai ne.

³Kai i Tameuh ly kai ai atleu nai deaungkho y, kai ly chymme naira nga bo. Mymy ly khupui kamta kai ai ama hai; mymy ly kai mang y asa hai iy kai ai chymme naimy ang khai bo. Mymy ly kai i atleu keung ne; kai ai ama hai iy pahyp y naimy ana naira i py atleu bo.

⁴Kai ly ARENG teng y hnei takeng nai khala, mymy ly kai ai paleung ka-echi kiu i nai atleu pi bo. ARENG ai ly palo u!

⁵Dei areng i tui sampyhchi ly kai ai katanmeuh bo; tama naira tui sampyhchi ly kai i tlang tleaung y um na bo.

⁶Tavau pri i vuinawnchi ly kai ai ang pi na bo; dei areng ly kai ai patiu ai nai deaung pateung yb bo.

⁷Kai ly patang naira theung i nai ARENG ai kapalau bo; kasabawmra nga ai nai kaimy i Tameuh teng y aeu nai ne. Mymy ly Achura yhm theung i dengdairei, kai i raawi thai; kasabawmra nga ai nai kai i aeu nai raawi thai bo.

⁸Hunaibaly Tameuh i kado theu nai molam y khaileaung ly amchyh na; kani mang i atitichi ly ahyn u bo.

⁹Notareang theung i dengdairei maikhyhchi py, labeaung mang dengdairei kang hai reng nai mai kadeu hawi mai-aichi py theu bo.

¹⁰Mymy ly kani katheu paeaung iy satla kathiu bo; kheu padawi anui y vengpang nai khupanymchi awm.

¹¹Mymy ly Kheruben tleaung y atang naimy, ali kamrawi y satla kaliki bo.

¹²Mymy ly mymy ai kaveng hawimy khiu bo; mymy i sahawi y tui kamhui kawi meng nai khupanymchi awm.

¹³Mymy i mo y amlosadi theu nai deaungkho y, mai-aichi ly a-ai jawn na bo.

¹⁴Naibaly ARENG ly kani mang dengdairei, kani pajyh hai; ati cheaungkhang sa thai nai Tameuh i raawi ly theu.

¹⁵Mymy ly thailihochi hawi ko iy paleung ka-echi ai ahei hai; amlosadi theu hai iy nichi ai preang hai bo.

¹⁶ARENG ly paleung ka-echi tlang tleaung y kado theu iy hang hai nai khala, suida pangli paichi hawi khaileaung i langdengchi amteng seaungkhrang na bo.

¹⁷ARENG ly kani mang dengdairei kiu jaha iy, kai ai amkhaw bo; tui thiu parai naira i dengdairei kai ai atleu bo.

¹⁸Mymy ly sa thai naira awm nai paleung ka-e, kai ai niu ngai y nai khumi bawibawichi kiu i nai kai ai atleu bo. Nichi ly kai, hui kai pajau y na pa-rei atho awm.

¹⁹Kai patang naira avum nai khala y, nichi ly kai ai tiu u; na i py ARENG ly kai ai ama hai bo.

²⁰Mymy ly kai ai patangra i nai lawi hai ai nai sabawm; kai ai paleung bie nai deaungkho y atleu bo.

²¹Kai ly kateng sa nai deaungkho y, ARENG ly kai ai kawn vangchi pei; kai ly kamngo by y nai deaungkho y, mymy ly kai ai amtheaung hai bo.

²²Kai ly ARENG i reita leu pei naichi tangai nai ne; kaimy i Tameuh ai nithun thun vai y leang.

²³Kai ly mymy i reita leu pei nai ngiereichi kry bo; mymy i leu pei naichi ai akhi vai y leang.

²⁴Kai ly kamngo by y nai khumi nanai py, hawi y nairachi amkyn nanai py, mymy pany.

²⁵Huna nai y kai ly kamngo by y nai khumi ne, nanai pany nai deaungkho y py, kai ly kahawi sa nai deaungkho y py, mymy ly kai ai kawn vangchi ang pei.

²⁶Aw ARENG, nang ly ka-ym awm nai khumichi ai, ka-ym awm naimy kry bo; cheh ai nai by y na pa-rei hawi angym naichi ai py, temra by y na pa-rei pahen pi ai.

²⁷Paleung y chai nai khumichi teng y chai nai paleung ka-dawn py, khumi hawi y naichi teng y paleung ka-awi py, amteng hai ai.

²⁸Mymy ly paleung apanem nai khumichi ai atleu; na i py paleung len amlyh nai khumichi ai ly tahm anem hai bo.

²⁹Aw ARENG, nang ly kai i kangvang ne iy, kai i veng naira ai angvang hai bo.

³⁰Nang ly paleung ka-echi ai tiu ai nai atho py, nichi i amtangrachi taphra ai nai sa thai naira py, kai ai pei bo.

³¹Hini Tameuh i sa nai kalopchi ly angym nai ne; mymy i leu py ym ai nai hawi parai na ly! Mymy ly mymy ai ym nai khumi bawibawichi i vui khupui kamta ne.

³²ARENG leaungrei naini Tameuh ne; Tameuh naini achi i abyhra ne.

³³Hini Tameuh ly kai i abyhra, khaw parai nai khengsi apai ne; mymy ly kai i tako ai nai lam ai chymme hai bo.

³⁴Mymy ly kai ai sisiu kamta kheu khaw hai iy, mawichira y chymme naimy ang khai.

³⁵Ham parai nai thailiho a-eaung pajau ai nai tavai keung i vui, kai ai acham hai bo.

³⁶Aw ARENG, nang ly kai ai ama hai iy atleu bo; nang ly sabawm nai deaungkho y, kai ly veang ryh nai ne.

³⁷Nang ly kai ai paleung ka-e my patiu pajau y ai nai ka-vo sa pi; kai ly mana khala py sum nai avum vai y.

³⁸Kai ly paleung ka-echi ai patiu iy nichi ai tiu nai pajau y ryrei ly anawn ai ny y.

³⁹Kai ly paleung ka-echi ang thau pajau y pa-rei tiu bo; nichi ly kai i kheu keung y atlym u i, sum u nai ne.

⁴⁰Nang ly kai ai tavai thau pajau ai nai atho pei; paleung ka-echi tlang tleaung y eaung ai nai py pei bo.

⁴¹Nang ly kai mo i paleung ka-echi ai angpreng hai pawn bo; kai ly kai ai niu ngai y nai khumichi ai tamyh pawn ai nai nganai ne.

⁴²Nichi ly atleu ai nai keung hau i py, atleu nai keung by y; ARENG ai palau u teu i py, pathang pi y.

⁴³Kai ly nichi ai tamyh nai deaungkho y, nichi ly spryh kamta dei lawm u na bo; lam salo i aneaung kapan chiu nai kamta, kai ly nichi ai kachiu bo.

⁴⁴Nang ly kai ai tiu nai mipuichi kiu i nai atleu iy, khumi cheng cheaungkhangchi ai peang ai nai pei bo. Kai apany vai y nai khumichi ly vai i neng y kai teng y kahm pei u.

⁴⁵Cheng takhra khumichi ly kai i mo y lu meung u; nichi ly kai i leu pei nai thai baly, tangai u nai ne.

⁴⁶Nichi ly sorai paleung tama u veng bo i, mychi i lengseaung yhmchi ra i nai, kaso theu naimy theu u bo.

⁴⁷ARENG ly heng! kai ai ama hai nai keung ai palo u! Sa thai naira awm iy kai ai atleu nai Tameuh ly nang parai nai ne, nanai aeu u!

⁴⁸Mymy ly kai ai paleung ka-echi ai eaung ai nai pei bo; khumi cheng cheaungkhangchi ai, kai i kiu anui y tym hai iy

⁴⁹paleung ka-echi kiu i nai kai ai atleu bo. Aw ARENG, nang ly kai ai paleung ka-echi ai eaung ai nai pei iy khrukhra hai nai khumichi teng i nai ama hai bo.

⁵⁰Hunaibaly kai ly khumi cheng cheaungkhangchi mo y, nang ai palo iy, nang i nang parai nai ai khulym thui ai.

⁵¹Tameuh ly mymy i khai takhra nai samrang ai eaung naira pei; mymy i khai takhra nai samrang Davida dengdairei, kangpreangchi teng y khaw parai nai tamen naira ly deungtasa khrairei patei pi bo.