Read Khumi Chin 2 SAMUELA 23 Bible Online

2 SAMUELA 23 - Khumi Chin bible

2 SAMUELA 23

¹Tameuh my tahm pasang nai samrang lawm iy, Jakob i Tameuh my khai takhra nai Israela pri y tangai hawi parai nai khulym adi nai keung, Jese i chapo Davida i kangkhym i thui nai leu ly hinichi ne:

²ARENG i phailo ly kai mang dengdairei leu pei bo; mymy i leu ly kai i labeaung teng y awm.

³Israela chengchi ai atleu nai keung, Israela chengchi i Tameuh ly kai teng y hina nai leu pei bo: “Tameuh ai jei kaji naimy tahm khai iy, leu meitang adyh adawi naimy peang nai samrang ly

⁴kani nai chum nai bo y khupanym aheang pawn i, khutawimo neng khala achachi kangvang sadi hai nai kanito hawi atawm.”

⁵Hunai kamta teang, Tameuh ly kai i katu chanauchi ai amtheaung naira pei ai; ati mana nai mo nabaly mymy ly phra pajau y, athli vui thai y nai deungtasa Leu Maikawm ly kai hawi asa nai deaungkho y ne. Hunaibaly kai i kangai angym bo; hini ly kai i eaung naira ne; huna nai kamta tym hai ai nai Tameuh ly dawn pi khyp ai.

⁶Na i py Tameuh ai pany y nai khumichi ly aphi su nai aleng keungchi hawi atawm; huni aleng keungchi ai ly ami py kiu hawi syn pajau y.

⁷Hunichi ai syn ai nai tamo ateaung, ti y baly tivi teaung ai nai tla; huni aleng keungchi ly mai hawi leng iy taphra naira avum ai.

⁸Hini ly Davida i sorai risachi i amynchi ne: angchei i sorai risa ly Haponi mary y awm nai sorai risa leaung thomreichi i lu Joshe Bashebeth ne. Ni ly atiu nai tlenreira my, khumi leaung chungvai tajareichi ai my i tivi hawi thun iy padei pajau nai keung ne.

⁹Sorai leaung thomreichi theung i pa-nyh sorai ly Ahoh i cheng theaung Dodo i chapo Eliaza ne. Kanirei nai khala y Eliaza ly tavai atiu ai nai angveirym nai Philistia chengchi ai tiu ai nai Davida hawi vanrei abang bo. Israela chengchi nithun mang y anaw u i py,

¹⁰ni ly anaw y naimy kiu khohai iy haisau patlaw thai y na pa-rei, Philistia chengchi ai tiu bo. Huni kani y ARENG ly eaung pui eaung hai nai deaungkho y, atiu nai pajau nai khala Israela chengchi ly kadeichi teng i, tavai ateaungchi la ai nai Eliaza i awm naira y jeu u bo.

¹¹Pa-thom i sorai ly Aki i chapo, Harar mary i khumi Shamah ne. Philistia chengchi ly khubi bai awm nai Lehi meingtym y angym u. Israela chengchi ly Philistia chengchi teng i dengdairei, preang u pawn teu i py,

¹²Shamah ly khubi bai i anaw y naimy, amtang iy Philistia chengchi ai tleh i, huni kani y ARENG ly eaung pui eaung hai bo.

¹³Chohkatui neng kasa nai khala y, risa leaung phaireichi theung i amyn amthang nai sorai leaung thomreichi ly Davida awm nai Adulam mang y satla u kathiu bo. Huni neng khala Philistia cheng phyreichi ly tavai tiu ai nai Rephaim leaunghawira y akachu u thym nai ne.

¹⁴Huni neng y Davida ly mawi saleung i amtangra theung y awm iy, Philistia cheng phyreichi ly Bethlehem mary ai tiu vui bo.

¹⁵Davida ly yhm mang y adawn nai deaungkho y, “Bethlehem mary apai katheu pa-kho sahawi y awm nai tuikanra i tui kanei ai nai, leaung leaungrei my jeu hai khyly!” nanai kadeaung bo.

¹⁶Amyn kamthang risa leaung thomreichi ly Philistia tavaimichi tai naira theung y kun prei iy, tuikanra i tui deu i, Davida teng y tym hai. Na i py samrang ly huni tui nei y i, ARENG teng y talam nai leih vui iy,

¹⁷“Aw ARENG, kai ly mana mo i py hini tui nei pajau y leang! mychi i tlang areu naimy tui deu naichi i thi kanei nai hawi atawm ai!” napi. Hunai deaungkho y nei y bo. Hini ly amyn amthang nai sorai risa leaung thomreichi i sa vam nai saichi ne.

¹⁸Juaba i amnau Abisai ly amyn amthang nai risa leaung phaireichi i lu ne. Ni ly khumi leaung chungvai thomreichi ai tivi hawi padei pajau nai deaungkho y, amyn amthang nai risa leaung phaireichi theung y amyn len nai ne.

¹⁹Ni ly amyn amthang nai risa leaung phaireichi theung y amyn len nai ne i py, sorai risa leaung thomrei kamta ly amyn len y. Davida ly ni ai tamcheaung typ naichi i lu ra y khai bo.

²⁰Kazila mary y awm nai Jehojada i chapo Benaja ly amyn amthang nai sorai risa leaungrei ne. Ni ly vam parai nai kalopchi sa; ni ly khri pa-rei tlang atho awm nai Moba tavaimi risa leaung nyhrei ai padei nai ne. Naibaly khri pa-rei savai nanai kaseih neng, kanirei nai khala y ni ly tapiu theung y kun iy, khrangsi harei ai padei pajau.

²¹Ni ly khri pa-rei tlang len iy tivi syn nai Aikupta khumi leaungrei ai py padei nai ne. Benaja ly huni khumi ai tamtleang hawi ni iy, ni teng i tivi lawm vui; naibaly huni tivi hawimy, huni khumi ai padei nai ne.

²²Hini ly amyn kamthang risa leaung phaireichi theung i, Benaja i sa vam nai saichi ne.

²³Ni ly amyn amthang nai risa leaung phaireichi theung y amyn amthang nai ne i py, sorai risa leaung thomrei kamta amyn len y. Davida ly ni ai tamcheaung typ nai risachi i lu y khai bo.

²⁴Amyn amthang nai risa leaung phaireichi theung y abawi naichi ly hinichi ne: Juaba i amnau Asahela Bethlehem mary y awm nai Dodo i chapo Elahanan Harod mary y awm nai Shamah hawi Elika Pelet mary y awm nai Heleza Tekoa mary y awm nai Ikesa i chapo Ira Anatho mary y awm nai Abieza Husha mary y awm nai Mebunai Ahoh mary y awm nai Zalmon Netopha mary y awm nai Maharai Netopha mary y awm nai Baana i chapo Heleb Benjamin khu Kibeah mary y awm nai Ribai i chapo Itai Pirathon mary y awm nai Benaja Kasa sahawi i leaunghawi ra y awm nai Hidai Arabah mary y awm nai Abiabon Bahurim mary y awm nai Azamaveth Shaalabon mary y awm nai Elijaba Jashan i chapochi Jonathan Harar mary y awm nai Shamah Harar mary y awm nai Shara i chapo Ahiam Maaka mary y awm nai Ahasabai i chapo Eliphelet Kilo mary y awm nai Ahithophela i chapo Eliam Karamela mary y awm nai Hezaro Arab mary y awm nai Paarai Zobah mary(...)