Read Khumi Chin 2 SAMUELA 24 Bible Online

2 SAMUELA 24 - Khumi Chin bible

2 SAMUELA 24

¹Huni bo y ARENG ly Israela chengchi tlang tleaung y kado theu nai deaungkho y, nichi ai pajeng ai nai molam, Davida ai kamngo sa hai. ARENG my Davida teng y, “Chei ly Israela hawi Juda pri y khumi vuikanai lo.” napi.

²Hunai deaungkho y Davida ly my i tavailu areng keh Juaba teng y, “Nang i tavai luchi hawi vanrei khuteng katem y khrairei, Israela cheng awm naira tleirei y chei ly khumi vuikanai lo u achu. Khumi vuikanai majirei awm mo, nanai kai pany ai nai ngai,” napi.

³Na i py Juaba my, “Samrang awi, nang i ARENG Tameuh ly Israela chengchi ai vai i tleaung y phy chungvairei peung hai na sy; nang my hunai kamta peung nai niu nai pa-rei heng sau sy. Na i py samrang nang ly ati mana nai y, hina nai sa ai nai ngai lawh mo?” napi.

⁴Na i py samrang ly Juaba hawi tavai luchi teng y, my i leu pei nai kamta sa hai. Nichi ly Israela cheng khumi vuikanai la ai nai, mymy teng i nai theu u bo.

⁵Nichi ly Jordan tavo angpeang u chum baly Kad khu ka-peang leaunghawi um y awm nai Aroer mary tokalawi mang y tai u. Naibaly hunira i dengdairei tosyh mang y awm nai Jaza mary mang py,

⁶hu i nai bi baly Kilead pri hawi Hiti khu, Kadesa mary mang py khuleaung amsa u bi nai ne. Naibaly Dan mary hawi Sidon mary tengtang y chei u bo.

⁷Naibaly yhm ka-sang awm nai Turu mary mang y chei iy Hivit chengchi hawi Kanani chengchi awm nai marychi mang py, kangkhym y Juda pri tokalawi mang y awm nai Beraseba mary mang py chei u nai ne.

⁸Hunai deaungkho y nichi ly pri tleirei y amki iy, lo takawrei bo y kani apomrei bo baly, Jerusalem mary y vawi u teang bo.

⁹Nichi ly Israela pri y tavai thau pajau nai khumi leaung 800,000 rei hawi, Juda pri y leaung 500,000 rei awm, nanai samrang teng y amti pi bo.

¹⁰Na i py Davida ly khumi amyn vuikanai la chum nai khala, mymy teng y patang nairachi tym i ARENG teng y, “Kai ly hini ka-jei awm nai kamngo sa lawh bo; kai i kamngo pahen pi kyh ba; kai ly kamthu kamleaung kamta sa tamang lawh bo,” napi.

¹¹ARENG ly Davida i amo Kad teng y, “Nang ly Davida teng y chei ly kai i sa ai awm nai amjy thomreichi theung y, ngai nai harei vawi ai nai thui pi; ni i vawi nai baly kaimy sa ai,” napi. Kani pa-nyh khawn mang Davida i anglaw nai khala,

¹³Kad ly jeu i, my teng y ARENG i leu pei nai kamta samrang teng y thui pi i, “Samrang awi, nang i pri theung y saneng thomrei takang theu nai, paleung ka-echi teng i lo thomrei preang nai, kani thomrei no kanghawi tym nai, hunichi theung y mani patangra ngai mo? kai ly ARENG teng y mana pathang ai mo, nanai adawn ba,” napi.

¹⁴Davida my, “Kai ly khri pa-rei rai naira avum lawh bo hi ly! na i py khumi my pajeng nai ly tym hai mo sy; ARENG my phai pajeng na sy. Mymy ly pahen nai keung ne,” nanai Kad teng y thui pi.

¹⁵Hunai deaungkho y ARENG ly khawn mang dengdairei khai yb nai neng ryrei, Israela chengchi tlang tleaung y chym thai nai no kanghawi tym hai bo. Khuteng katem y khrairei, Israela cheng leaung 70,000 reichi dei nai ne.

¹⁶ARENG i kani pri amtaw thau my Jerusalem mary ai taphra ai nai thym khala, ARENG ly khumichi ai pajeng nai molam y paleung amtlau teang i, kani pri amtaw thau teng y, “Angym bo! anawn jau!” napi. Huni neng khala kani pri amtaw thau ly Jebusi cheng Araunah i choh ati nai meingtym sahawi y angdo nai ne.

¹⁷Khumichi ai pajeng nai kani pri amtaw thau ai Davida my niu nai khala, ARENG teng y, “Kamngo awm nai ly kai ne; sa tamang nai khumi ly kai ne; hini khumichi ly ati kamngo sa u mo? nang ly kai hawi kai i yhm dengtheungchi ai naini, pajeng naira tym hai ba,” napi.

¹⁸Huni kani y my Kad ly Davida teng y chei i ni teng y, “Nang ly Jebusi khumi Araunah i choh ati nai meingtym y chei ly ARENG i vui maicham so,” nanai ARENG i leu pei nai amti pi bo.

¹⁹Davida ly ARENG i leu pei nai kamta Araunah i choh ati nai meingtym y chei bo.

²⁰Araunah ly khen i, mymy mang y samrang hawi bangtangchi jeu nai niu khala, Davida i mo y khaileaung y angbeu iy,

²¹“Samrang awi, ati mana nai hini meingtym y jeu lawh mo?” napi. Davida my, “No kanghawi anawn vui thai ai nai molam y, ARENG i vui maicham sa ai nai ngai nai deaungkho y, nang i choh ati nai meingtym vang ai nai kang jeu nai ne,” napi.

²²Araunah my, “Samrang awi, hini choh atyhra meingtym lo ba; nang i ngai nai kamta ARENG teng y talam ba. Maicham salo y leng patlum ai nai si kataichi py hi y awm; theng palawn ai nai li thawnra taveangchi, choh atyhra ateaungchi py, hi y awm.

²³Hini bawibawichi samrang nang teng y kang talam bo; nang i ARENG Tameuh ly nang i talam naichi kawn pi na sy,” napi.

²⁴Na i py samrang my, “Hina nai ny y leang, vang kang pei ai; kai ly vang pei y naimy nga nai katalamrachi ai, kai i ARENG Tameuh teng y talam ai ny y,” napi. Naibaly samrang ly choh ati nai meingtym hawi sichi ai, tangkacho vui pangrei hawi van bo.

²⁵Samrang ly huni meingtymra y ARENG i vui maicham sa iy leng patlum nai hawi amkawm teang nai kapathyprachi talam bo. ARENG my py samrang i chiu sa nai pathang pi i, Israela pri y no kanghawi anawn hai bo.