Read Khumi Chin 2 SAMUELA 5 Bible Online

2 SAMUELA 5 - Khumi Chin bible

2 SAMUELA 5

¹Huna nai khala y Israela cheng theaung bawibawichi ly Davida awm nai Hebron mary y jeu u i, Davida teng y, “Nang hawi kaichi ly thi ngan kangpreangchi ne.

²Vaichi khala Sawla samrang lawm nai thym khala y, nang ly Israela cheng theaung bawibawichi ai lu sa iy, tavai thau nai ne. ARENG my py ‘Nang ly kai i khumichi ai lu sa iy, nichi ai peang ai nai tla ai’ nanai nang ai leu ang pei bo,” napi u.

³Naibaly Israela cheng lu sa nai keung bawibawichi ly samrang Davida awm nai Hebron mary y tym u. Davida ly Tameuh i mo y nichi hawi vaineng asa nai deaungkho y, nichi my Davida ai samrang y palyn nai asitui leih pi u. Naibaly Davida ly Israelachi i samrang y lawm bo.

⁴Davida samrang lawm nai khala y saneng phairei awm. Ni ly saneng vui palyhrei peang nai ne.

⁵Ni ly Juda pri samrang y, Hebron mary y saneng saryhrei bo y lo tariurei, Israela pri verei hawi Juda samrang y, Jerusalem mary y saneng phai palyh thomrei peang nai ne.

⁶Davida hawi ni i tavaimichi ly Jerusalem mary y tiu ai nai amsa u bo. Huni mary y awm nai Jebusi chengchi my, Davida ly huni mary ai tiu pajau ai ny y, nanai dawn u i, Davida teng y, “Nang ly mary theung y kun pajau y ai nai, mei kamjuchi hawi kheu kangbaichi my malawn py paka pajau nai ne,” napi u.

⁷(Na i py Davida ly Zion lengseaung apai ai tiu pajau vui nai deaungkho y, huni ly Davida i mary, nanai amthang bo.)

⁸Huni kani y Davida ly mymy i khumichi teng y, “Jebusi chengchi ai kai, niu ngai y nai kamta niu ngai y nai khumichi awm a? Nichi ai padei vam a? Vam nai khumi awm baly tavo tui paleaungra sa nai leaunghawi mang lyn kalau ly mei kamju, kheu kangbaichi ai tiu u,” napi. (Huni molam y mei kamju, kheu kangbaichi ly ARENG i yhm y kun ai nai ngo y, nanai thui achi awm.)

⁹Davida my amtangra lengseaung apai nga vui chum baly, huni apai theung y awm iy huni ai “Davida mary,” nanai pathi bo. Samrang ly huni apai ka-kira y, mawi aheung nisi mang, khaileaung taphum nai meingtym mang dengdairei amteaung iy mary sa.

¹⁰Ati cheaungkhang sa thai nai deungtasa ARENG Tameuh ly Davida hawi vanrei awm hai nai deaungkho y, sa thai naira awmra awmra nai ne.

¹¹Turu samrang Hiram ly Davida teng y savaichi pato. Samrang i yhm sa ai nai i vui y Seda keung, lasama hawi iusai yhm sa kawp nai keungchi pato pi bo.

¹²Naibaly Davida ly mymy ai Israela samrang y ARENG my khaw hai nai hawi, mymy ly my i khumichi hawi ai nai i vui y, tlamsa hai bo, nanai pany ryh pany ryh nai ne.

¹³Davida ly Hebron mary dengdairei Jerusalem mary y ang pyn nai bo y, samrang nu ai kry naichi hawi, aju neangneang la bi i, cho chanauchi nga bi nai ne.

¹⁴Jerusalem mary y awm nai thym khala y, ni i vui tapen pi nai cho chanauchi ly: Shammua, Shobab, Nathan, Solomon,

¹⁵Ibaha, Elishua, Nephe, Japhia,

¹⁶Elishama, Eliada hawi Elipheletchi ne.

¹⁷Davida ly Israela samrang lawm bo, nanai Philistia chengchi thai u i, ni ai patiu ai nai amsa u. Huni satang ai Davida my thai nai khala y, amtangra lengseaung apai awm naira mang y satla kathiu bo.

¹⁸Philistia chengchi ly Rephaim leaunghawi ai tiu i, nga u bo.

¹⁹Davida ly ARENG teng y, “Kai ly Philistia chengchi ai tiu ai nai avo na a? Nangmy kai ai eaung hai ai a?,” nanai deng. ARENG my, “Chei, kai ly nang ai eaung hai ai!” nanai pathang.

²⁰Naibaly Davida ly Bala Perazim mary mang y chei i, Philistia chengchi ai tiu nai pajau chum baly, ARENG ly tavo tui kaho lem hai heu nai kamta, kai i paleung ka-echi ai panawi bo,” nanai thui. Hunai deaungkho y huni meingtym ai ly Bala Perazim, nanai amyn pathi nai ne.

²¹Philistia chengchi ly mychi i chiu nai mynchi ai huni meingtym y khai u su i, hunichi ai Davida i khumichi my vym u bo.

²²Naibaly Philistia chengchi ly Rephaim leaunghawi mang y vawi u i, huni meingtym y tiu nai nga u vui bi bo.

²³Davida ly ARENG teng y deng bi i, mymy ly “Nichi ai hini meingtym mang dengdairei tiu u moh. Nichi i tai nithun mang tapai iy, po kalang keungchi sahawi mang nichi ai tiu u.

²⁴Nang ly dengkeaung keungchi salyh mang tavai thau nai katyn thai nai khala y tiu u amteaung. Huna nai khala y kai ly Philistia tavaimichi ai tamyh ai nai, nang i mo mang tako manme yb ai,” napi.

²⁵Davida ly ARENG i leu pei nai kamta sa iy, Philistia tavaimichi ai Keba mary i dengdairei, Kazera mary y tym pa-rei paryh u pajau nai ne.