Read Khumi Chin 2 SAMUELA 6 Bible Online

2 SAMUELA 6 - Khumi Chin bible

2 SAMUELA 6

¹Kanirei nai khala y Davida ly Israela pri i vawi patyp nai tavaimi leaung 30,000 reichi ai palau achu iy,

²Kherubenchi i pakhi deung nai salo y awm nai, ati cheaungkhang sa thai nai deungtasa ARENG i amyn pathi nai, Leu Maikawm Pawm la ai nai Juda pri Bala mary mang y amsa u bo.

³Nichi ly mawi aheung y awm nai Abinada yhm i dengdairei, ka-ri kangtha harei salo y tang iy syn u. Abinada i chapo Uzah hawi Ahio nini ly Leu Maikawm Pawm ka-ri pahawi hawi.

⁴Ahio ly Pawm mo mang pahawi nai ne.

⁵Davida hawi Israela cheng bawibawichi ly ARENG i nang parai nai sai palo ai nai ham parai naimy lam u bo. Nichi ly taro champreng, atym, cha-mi, baw hawi sa-rachi beu u nai ne.

⁶Nichi ly Nakon i choh atyhra meingtym y tym nai khala y, si kataichi athei nai deaungkho y, Uzah ly Leu Maikawm Pawm ai kiu jaha iy amkhaw cheng nai ne.

⁷ARENG ly kado theu i, Uzah i sa nai ly tahm khai y nai lawm vui nai y padei vui. Naibaly Uzah ly Leu Maikawm Pawm sahawi y dei bo.

⁸Hunai deaungkho y huni meingtym ai Perez Uzah, nanai vaini khrairei palau u. ARENG ly Uzah ai kado theu i, pajeng nai deaungkho y Davida ly khri pa-rei kado theu bo.

⁹Naibaly Davida ly ARENG ai jei nai deaungkho y, “Vai, kai ly hini Leu Maikawm Pawm ai mana angjeaung ai mo?” nanai thui iy,

¹⁰my i awm nai Jerusalem mary mang y syn y naimy, kath mary y awm nai Obed Edom i yhm mang y angjeaung iy tha u bo.

¹¹Leu Maikawm Pawm ai ly hu y lo thomrei khai i, ARENG my Obad Edom hawi ni i yhm dengtheungchi ai amtheaung hai bo.

¹²Leu Maikawm Pawm saho y Obed Edom i yhm dengtheung hawi ni i awm nai bawibawichi ai, ARENG my amtheaung naira pei nai satang ly Davida my thai nai khala y, huni Pawm ai pawi sa hai iy Obed Edom yhm i dengdairei, Jerusalem mary mang y angjeaung vui bo.

¹³Leu Maikawm Pawm angjeaung nai khumichi ly kheu kan tariurei takan baly Davida my anawn hai iy, ARENG teng y si katai harei hawi veung hawi nai sicho harei kapathypra talam bo.

¹⁴Davida ly ateaung kanem harei naini amthyp iy, ARENG i nang parai nai sai palo nai, ham parai naimy lam.

¹⁵Naibaly samrang hawi Israela cheng bawibawichi ly amo theu nai aeu iy, bawchi eng naimy Leu Maikawm Pawm ai, Jerusalem mary mang y angjeaung u nai ne.

¹⁶Pawm ai mary theung y angjeaung u nai thym khala y, Sawla i chaniu Mikhala ly thaibeng pa-kho mang angdeang i, samrang Davida ai achaw naimy lam nai niu baly, samrang ai kaji hai bo.

¹⁷Khumichi ly Pawm angjeaung u i, Davida my sa yb nai tai theung i pasym yb nai meingtymra y khai u bo. Naibaly Davida ly ARENG teng y leng patlum nai kapathyprachi hawi amkawm nai kapathyprachi talam nai ne.

¹⁸Huna nai talam chum nai khala y, ni ly ati cheaungkhang sa thai nai keung ARENG i amyn y, khumichi ai amtheaung hai bo.

¹⁹Israela pri y awm nai neampacho, neampachy ngireichi ai tako phirei, mawi dang nai akawirei hawi kreip athai phi ha harei anga pa-rei paji pi. Naibaly khumi bawibawichi ly mychi i yhm mang y vawi u bo.

²⁰Naibaly Davida ly mymy i yhm dengtheungchi ai kawn ai nai yhm mang y vawi nai khala y, Sawla i chaniu Mikhala ly ni ai lamchung ai nai theu. Mikhala my, “Kangji by y nai khumi ka-khum i ateaung alei nai kamta, miteaung kehchi i miseaung neampachychi i mo y, amy i ateaung alei nai Israela samrang ly vaini, phum-ang len parai na ly!” napi.

²¹Davida my, “Kai ai nang i ngampo hawi katu chanauchi ai katlen hai vui iy, Israela chengchi i lu lawm ai nai vawi takhra pi nai, ARENG i nang parai nai ai palo nai ka-lam nai teu. ARENG i tahm awm nai palo ai nai, mo mang py lam ai i,

²²kaimy i tlang ai hini tleaung y kangji kangai nga hai ai. Nang ly kai ai tahm khai y teu i py, huni miseaung neampachychi my tahm ang khai u ai,” napi.

²³Sawla i chaniu Mikhala ly mymy deungrei, cho chanau ngo y bo.