Read Khumi Chin 2 SAMUELA 9 Bible Online

2 SAMUELA 9 - Khumi Chin bible

2 SAMUELA 9

¹Davida my, “Sawla yhm dengtheungra i khumi leaung leaungrei awm rai a? Awm lawh baly kai ly Jonathan i meimai y ni ai kapahen ai nai ngai,” napi.

²Huna nai khala y khumichi ly Ziba napi nai khumi leaungrei ai samrang Davida teng y tym hai bo. Huni khumi ly Sawla yhm dengtheung i, miseaung leaungrei ne. Samrang my ni teng y, “Nang ly Ziba ne a?” nanai deng. Ziba my, “Ne, areng awi,” nanai pathang.

³Samrang my ni teng y, “Kai ly Tameuh i ngai nai kamta pahen nai hawi ka-ym awm nai khumi, nanai patei pajau ai nai, Sawla i yhm dengtheungra y leaung leaungrei awm rai a?” nanai deng. Ziba my, “Jonathan i chapo leaungrei awm jo rai, ni ly kheu tabai nai ne,” nanai pathang.

⁴Samrang my, “Ni ly ma y awm mo?” nanai deng. Ziba my, “Lodebar avang y awm nai Amiela i chapo Makhira i yhm y awm na a!” nanai pathang.

⁵Hunaibaly Davida ly Jonathan i chapo ai palau hai bo.

⁶Sawla i katu, Jonathan i chapo Mephiboseth tym nai khala y, Davida i mo y tahm khai nai ambeu i lu meung bo. Davida my, “Mephiboseth awi,” nanai palau i, Mephiboseth my, “Nang i miseaung hi y awm,” nanai pathang.

⁷Davida my, “Jei moh, kai ly nang i ampo Jonathan i meimai y, nang ai kang pahen ai. Nang i amsi Sawla i peang nai khaileaung ngiereichi, kang pei teang ai. Nang ai kai i sabawi y kani tleirei, cha nei ai nai pei ai,” napi.

⁸Mephiboseth ly lu meung bi iy, “Ui kadei kamta lawm nai kai ai, nang ly ati mana nai pahen lawh mo?” napi.

⁹Huna nai khala y samrang ly Sawla i miseaung Ziba ai palau i ni teng y, “Nang i yhmkeung i katu Mephiboseth teng y, Sawla i yhm dengtheungchi my peang nai cheaungkhangchi ly kapei pi teang ai.

¹⁰Nang hawi nang i chapochi py, nang i miseaungchi py, nang i yhmkeung Sawla yhm dengtheungchi i vui, li hlauchi sa iy, amti amjangchi ly nichi i vui pei pi ai nai tla. Na i py Mephiboseth ly kai i sabawi y kai hawi vanrei, cha nei ai nai nga ai,” napi. (Ziba ly chapo leaung holai pangrei hawi, miseaung leaung apomrei awm nai ne.)

¹¹Ziba my, “Samrang nang i leu pei nai kamta, kaimy sa pi ai,” napi. Hunai deaungkho y Mephiboseth ly samrang i chapo leaungrei kamta, sabawi y vanrei cha nei ai nai nga.

¹²Mephiboseth ly Mikha napi nai chapo leaungrei awm. Ziba i yhm dengtheung bawibawichi ly Mephiboseth i miseaung lawm u bo.

¹³Naibaly kheu nyhrei tabai nai Mephiboseth ly Jerusalem mary y awm iy, samrang i sabawi y kani tleirei cha nei ai nai nga nai ne.