Read Khumi Chin 1 ARENG KEH 1 Bible Online

1 ARENG KEH 1 - Khumi Chin bible

1 ARENG KEH 1

¹Samrang Davida ly khri pa-rei miteaung cheang nai khala, miseaungchi my kanihchi khiu pi teu i py, ngan kabi ngo pajau y bo.

²Hunai deaungkho y samrang i bangtangchi my ni teng y, “Samrang awi, nang ai kry ai nai hawi pasawm patau ai nai anglo leaungrei, kaichi my hau pi ai. Huni neampachy ly nang i sahawi y abiri naimy i ai i, nang ai bi-um pa-rei ang sa pi ai mang,” napi u.

³Naibaly nichi ly Israela pri verei theung y mo-cha hawi parai nai neampachy leaungrei ai hau u i, Shunem mary y awm nai Abisha napi nai anglo ai avum; naibaly ni ai samrang teng y hawi u.

⁴Mo-cha khri pa-rei hawi parai nai huni neampachy ly samrang ai pachawm patau bo; na i py samrang ly ni hawi ta-pui ta-chi apho ahawi y leang.

⁵Davida hawi Hakith nini i chapo Adonijah ly khri pa-rei mo-cha hawi parai; Abasalom dei nai bo baly ni ly Davida i chapochi theung y, chapo kalen lawm bo. Davida ly ni ai ati mo ra py, thui parip nai awm vai y; ni ly samrang lawm ai nai athang khai nai ne i, my i vui ka-richi, keaungngochi hawi mo amtheung nai khumi leaung vui pangreichi py awm.

⁶

⁷Ni ly Zeruiah i chapo Juaba, pathyp pi nai keung Abiathachi hawi adeng ahui i, nichi my ni ai sabawm ai nai ngai u bo.

⁸Na i py pathyp pi nai keung Zadok, Jehojada i chapo Benajah, amo Nathan, Shimei, Re-i hawi Davida i tamcheaungchi ly Adonijah mang y abawi u y leang.

⁹Kanirei nai khala y Adonijah ly Anrokela micheaung sahawi i pavui lengseaungra y beram, si katai, veung hawi nai sichochi hawi apathyp bo. Davida i takhra chapochi hawi Juda pri samrang i bangtangchi ai py huni pawira y palau.

¹⁰Na i py ampo y vanrei, amhm takhra nai amnau Solomon, amo Nathan, Benajah hawi samrang i bangtangchi ai ly palau y nai ne.

¹¹Hunaibaly Nathan ly Solomon i amhm Bethaseba teng y chei i ni teng y, “Hakith i chapo Adonijah ly mymy ai mymy naimy samrang y apalyn nai ly thai bo a? Samrang Davida malawn py huni satang thai y leang rai!

¹²Nang ly nangmy i tlang hawi nang i chapo Solomon i tlang ai atleu ai nai ngai baly, nang ai kaimy tau kang pei ai.

¹³Nang ly vaimy samrang Davida teng y chei iy ni teng y, ‘Samrang awi, kai i chapo Solomon ai nangmy i meingtym samrangra y kapalyn ai, nanai kai teng y adeu khyp nai ny y a? Vai ly ati mana nai deaungkho y Adonijah ly samrang lawm vui lawh mo?’ nanai deng.

¹⁴Hunai kamta deng nai thym khala y kai ly kun ai i, nang i leu khaw hai ai,” napi.

¹⁵Hunai deaungkho y Bathaseba ly samrang ira takun theung mang y samrang hawi avum ai nai chei bo. Samrang ly khri pa-rei miteaung cheang bo i, Shunem mary i neampachy Abisha my ni ai pasawm patau nai ne.

¹⁶Bathaseba ly samrang i mo y lu meung nai khala y samrang my, “Nang ly ati aly ngai nai mo?” nanai deng.

¹⁷Bathaseba my, “Samrang awi, nang ly kai i chapo Solomon ai nangmy i meingtym amtym ai i, samrang palyn ai, nanai nangmy i ARENG Tameuh i amyn y leu adeu bo.

¹⁸Nai i py vai, Adonijah ly samrang y lyn vui bo; huni satang ly nang pany y leang rai.

¹⁹Ni ly si katai, beram, veung hawi nai sichochi hawi apathyp i, nang i chapochi, pathyp pi nai keungchi hawi, nang i tavailu areng Juaba ai py heang bo; na i py nang i chapo Solomon ai ly heang y.

²⁰Samrang awi, nang i meingtym samrang y ami ai palyn ai mo, nanai Israela cheng vereichi ly nang i leu ajeng u nai ne.

²¹Nang ly hinai kamta leu pei y baly, kai hawi kai i chapo Solomon ly nang by y vui nai bo y, reita taphra naichi ang palawn ai i, khumi hawi y naichi lawm ai,” napi.

²²Hunai kamta amti pi nai thym khala y amo Nathan tym.

²³Amo tym nai satang samrang teng y amti pi u bo. Nathan py takun theung y kun iy samrang i mo y lu meung naimy,

²⁴“Samrang awi, Adonijah ai nang i meingtym y amtym hai ai nai nangmy satang thai hai bo a?

²⁵Vaini my ni ly maichamra y chei iy si katai, beram, sicho veung hawi naichi hawi apathyp bo. Ni ly nang i chapo bawibawichi hawi, nang i tavailu areng Juaba hawi, pathyp pi nai keung Abiatha ai py heang i, vai i neng y nichi ly Adonijah hawi vanrei cha nei u iy, ‘samrang Adonijah heng sau sy!’ nanai aeu u bo.

²⁶Na i py Adonijah ly nang i miseaung kai hawi, pathyp pi nai keung Zadok, Benaja hawi, Solomon ai ly heang y.

²⁷Hina nai sa naichi ai ly nangmy ngai nai sai a? Nang i samrang meingtym y ami ai palyn ai mo, nanai nangmy i bangtangchi teng y pany hai y pui naimy, hina nai kamta nang sa lawh a?” napi.

²⁸Samrang Davida my, “Bathaseba awi, takun theung y kun teang ba,” napi i, Bathaseba ly kun iy ni i mo y angdo.

²⁹Naibaly samrang my, “Kai ai patang naira cheaungkhang theung i atleu nai keung, heng nai ARENG i amyn y kai, leu adeu mang.

³⁰Kai ly nang i chapo Solomon ai kai i meingtym y amtym ai nai samrang kapalyn ai, nanai Israela chengchi i ARENG Tameuh i amyn y vaineng adeu nai kamta kai, kasa ai, nanai vaini kai adeu mang,” napi.

³¹Bathaseba ly lu meung naimy, “Kai i areng, kai i samrang ly heng sau sy!” nanai thui.

³²Naibaly samrang Davida ly Zadok, Nathan hawi Benaja ai palau hai bo. Nichi tym u nai khala,

³³samrang my nichi teng y, “Kai i bangtangchi ai palau u ly kai i chapo Solomon ai kai i keaungngo kano kasau tleaung y atang hai iy, Kihon micheaung mang y pahawi u.

³⁴Huni meingtym y Zadok hawi Nathan nini my ni ai, Israela samrang lawm ai nai asitui leih pi hawi sy. Naibaly baw eng iy, ‘Samrang Solomon heng sau sy!’ nanai aeu u.

³⁵Ni ly kai i samrang atehra tleaung y ateh ai nai, hi y vawi ali teang nai khala nangchi py, ni i nithun abang u ai nai tla. Ni ai ly Israela pri hawi Juda pri i vui samrang lawm ai nai kaimy vawi takhra bo. Hunai deaungkho y ni ly kai i meingtym y amtym nai samrang lawm ai,” napi.

³⁶Benaja my, “Nang i leu pei nai kamta kasa pi ai. Nang i ARENG Tameuh my py, huni leu pei nai khaw hai sy.

³⁷ARENG ly nang hawi vanrei awm hai nai kamta, Solomon hawi vanrei py awm hai iy, ni i peang nai neng khala ly nang i peang nai neng tleaung y nang chawn hai keh na sy,” napi.

³⁸Hunai deaungkho y Zadok, Nathan, Benaja hawi samrang i tamcheaung risachi ly Solomon ai samrang Davida i keaungngo kano kasau atang hai iy, Kihon micheaung mang y chei hai u bo.

³⁹Zadok ly ARENG i awmra taichyra i asitui syn iy, Solomon ai samrang palyn nai asitui leih pi bo. Huni bo y baw eng nai khala khumi bawibawichi ly “Samrang Solomon heng sau sy!” nanai aeu u.

⁴⁰Naibaly amo theu parai naimy aeu u iy, byhlyhchi eng u i, khaileaung amchyh na pa-rei katyn pasau naimy, Solomon nithun abang u bo.

⁴¹Adonijah hawi ni i angvynchi ly cha nei u nai pajau u vi nai khala, huni katyn thai u nai ne. Juaba ly baw eng nai katyn thai nai khala y, “Mary theung i hini katyn ly ati mana nai mo?” nanai deng.

⁴²Ni i leu tem y rai khala my pathyp pi nai keung Abiatha i chapo Jonathan tym i Adonijah my, “Kun ba, nang ly khumi kahawi ne i, satang kahawi syn nai khumi ne ai,” napi.

⁴³Jonathan my, “Satang kahawi athang khai y; achi i areng samrang Davida ly Solomon ai samrang palyn veng bo.

⁴⁴Samrang ly Zadok, Nathan, Benaja hawi samrang i tamcheaung risachi pato i, Solomon ai samrang i keaungngo kano kasau tleaung y tang iy, pahawi hai bo.

⁴⁵Naibaly Zadok hawi Nathan nini my Solomon ai, Kihon micheaungra y samrang palyn nai asitui leih hawi bo. Nichi ly amo theu aeu u naimy, mary theung y kun u i, mary i khumichi ly vai, aeu nai raawi tyn tukulu nai ne. Nang i thai nai katyn ly huni khumichi i katyn ne.

⁴⁶Solomon ly vai, samrang lawm veng bo.

⁴⁷Samrang i bangtangchi ly samrang Davida teng y tahm khai ai nai chei u iy, ‘Nang i Tameuh ly Solomon ai, nang tleaung y amthang hai keh sy; nang i peang nai deung tleaung y Solomon i peang nai deung ly nang chawn nai pri lawm hai sy’ napi u bo. Naibaly samrang Davida ly mymy i ira tleaung y lu meung naimy,

⁴⁸‘Kai i kangpreang theung i leaungrei ai samrang y palyn pi nai khyh chang y i, kai ai py hunichi niu ai nai pei nai keung, Israela chengchi i ARENG Tameuh ai palo u sina,’ nanai chiu sa bo,” nanai pathang.

⁴⁹Naibaly Adonijah i angvynchi ly jei u nai deaungkho y ang thau i, vawi u akyhkyh pawn bo.

⁵⁰Adonijah ly Solomon ai khri pa-rei jei nai deaungkho y, ARENG i awmra taichy yhm theung y kun iy, maicham takichi amkhaw cheng naimy,

⁵¹“Samrang Solomon ly kai ai padei ai ny y, nanai vaineng adeu man sy,” nanai thui. Huni satang ai samrang Solomon teng y amti pi u nai ne.

⁵²Solomon my, “Ni ly ka-ym awm nai khumi ne baly, ni i lura i sam amairei ai malawn py, kiupajeung kadeaung hawi teaung y ai; ka-ym by y nai khumi ne lawh baly dei naira avum ai,” napi.

⁵³Naibaly samrang Solomon ly khumi pato iy, Adonijah ai maichamra i nai palau hai bo. Adonijah ly samrang teng y tym i, ni i mo y lu meung naimy chiu bo. Naibaly samrang my ni teng y, “Nangmy i yhm y vawi pajau bo,” napi.